Gasabo: KCB yageneye inkunga y’ibiribwa imiryango 160 y’abarokotse Jenoside

Yanditswe na Nkurunziza Ferdinand
Kuya 15 Gicurasi 2020 saa 08:16
Yasuwe :
0 0

Banki y’Ubucuruzi ya KCB Rwanda yahaye inkunga y’ibiribwa abanyamuryango ba Association Tubeho, igizwe n’abarokotse Jenoside yakorewe Abatutsi mu 1994, batuye ahazwi nko mu Mudugudu wa Avega wo mu Murenge wa Kimironko mu Karere ka Gasabo.

Inkunga yatanzwe igizwe n’umuceri, ibishyimbo, akawunga, isukari n’amavuta yo guteka, bifite agaciro ka miliyoni eshatu n’ibihumbi magana ane by’amafaranga y’u Rwanda, izasaranganywa imiryango 160, igizwe n’abantu basaga 800.

Ubuyobozi bwa KCB buvuga ko iki gikorwa cyabaye kuri uyu wa Gatanu, tariki ya 15 Gicurasi 2020, kigamije kunganira iyi miryango igizwe n’impfubyi, abapfakazi n’incike za Jenoside yakorewe Abatutsi mu 1994, muri ibi bihe bikomeye byo guhangana n’icyorezo cya Coronavirus cyaje gihuriranye no Kwibuka ku nshuro ya 26 Jenoside yakorewe Abatutsi.

Umuyobozi wa Avega mu Murenge wa Kimironko, Mukamunana Verediane, yavuze ko bakiriye neza inkunga bahawe kuko yaberetse ko hari abantu baba babatekereza no mu bihe bikomeye byo kwibuka.

Ati “Mu by’ukuri aba bantu baje kudufata mu mugongo […] ni ikintu gikomeye muri ibi bihe byo kwibuka, aho tuba dufite ibibazo bitandukanye. N’ubwo tuba dufite umubabaro turi kwibuka […] iyo dufite ikintu kibasha kutwunganira hari icyo birema mu buzima bwacu.”

Umuyobozi ushinzwe Imishinga na Gahunda mu Muryango Ibuka ku rwego rw’igihugu, Ngabo Brave Olivier, yavuze ko banyuzwe cyane n’inkunga yatanzwe na KCB.

Ati “Muri iki gihe cyo kwibuka, iyo tubonye umuntu udutera inkunga, akaturemera […] adusubizamo imbaraga cyane cyane muri iyi minsi 100 yo kwibuka; ariko bikaba umwihariko muri iki gihe cya COVID-19 turimo, aho abantu badashobora kujya ku mirimo nkuko bisanzwe, ubukungu bukaba bwarazahaye.”

Ngabo avuga ko ibihe bya COVID-19 byagize ingaruka ku Isi muri rusange, bityo ko n’abacitse ku icumu rya Jenoside yakorewe Abatutsi batasigaye.

Umuyobozi w’Ishami rishinzwe Ubufasha muri KCB, Ndahiro Steven, wari uyoboye itsinda ryatanze iyo nkunga yavuze ko igikorwa cyo gutanga inkunga ku barokotse, gishingiye ku ntego bihaye yo kubaka ubushobozi bw’umuryango mugari w’Abanyarwanda barimo n’abakiliya babo.

Yagize ati “Abantu batariho, na banki yacu nta cyizere cyo kuramba yaba ifite. Ibi ni ibintu dushyira mu bikorwa byacu bya buri munsi kandi bigakorwa mu gihe nk’iki.”

Ndahiro akomeza avuga ko mu bihe bya COVID-19, ibigo by’ubucuruzi bitandukanye byahuye n’igihombo, ariko ko bo nka banki ya KCB, icyo bashyize imbere ari imibereho y’abantu.

Usibye iyi nkunga yahawe abacitse ku icumu rya Jenoside yakorewe Abatutsi batuye mu Mudugudu wa Avega, KCB iherutse guha Guverinoma y’u Rwanda miliyoni 100 z’amafaranga y’u Rwanda yo kunganira gahunda yo guhangana n’ingaruka za COVID-19 mu baturage.

Ibiribwa byatanzwe bifite agaciro ka miliyoni 3,4 z'amafaranga y'u Rwanda
Abakozi ba KCB bazanye inkunga y'ibiribwa, babanje kuganira na bamwe mu bayigenewe, hanafatwa umunota wo kwibuka abazize Jenoside yakorewe Abatutsi mu 1994
Umuyobozi ushinzwe imishinga na gahunda mu Muryango Ibuka ku rwego rw’igihugu, Ngabo Brave Olivier, yavuze ko banyuzwe cyane n’inkunga yatanzwe na KCB
Umuyobozi wa Avega mu Murenge wa Kimironko, Mukamunana Verediane, yavuze ko bakiriye neza inkunga bahawe kuko yaberetse ko hari abantu baba bari kubatekereza no mu bihe bikomeye byo kwibuka
Ibiribwa byatanzwe byashyizwe aho ababigenewe bazajya babisanga, hubahirizwa amabwiriza yo kwirinda COVID-19
Umuyobozi w’Ishami rishinzwe ubufasha muri KCB, Ndahiro Steven, yavuze ko igikorwa cyo gutanga inkunga ku barokotse, gishingiye ku ntego bihaye yo kubaka ubushobozi bw’umuryango mugari w’Abanyarwanda
Nyuma yo gushyikiriza inkunga abacitse ku icumu rya Jenoside batuye Mudugudu wa Avega, hafashwe ifoto y'urwibutso

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .