Abandi batandatu binjiye mu Nama Njyanama y’Umujyi wa Kigali bamenyekanye (Amafoto)

Yanditswe na Akayezu Jean de Dieu, Habimana James, Sekamana Mathias
Kuya 17 Kanama 2019 saa 09:35
Yasuwe :
0 0

Kuri uyu wa Gatandatu tariki 17 Kanama 2019, Umujyi wa Kigali wabonye Inama Njyanama nshya, ari nayo igomba gutorwamo Umuyobozi w’umujyi n’abamwungirije babiri, bazawuyobora mu myaka itanu iri imbere.

Mu gitondo hatowe abajyanama batandatu barimo Kayihura Muganga Didas na Rutera Rose bahagarariye Akarere ka Kicukiro; Rubingisa Pudence na Rose Baguma bahagarariye Gasabo; Umutoni Gatsinzi Nadine na Mutsinzi Antoine bahagarariye Nyarugenge.

Biyongereye ku bandi batanu baraye bemejwe na Perezida Paul Kagame.

Abajyanama bashyizweho ni Dr. Jeannette Bayisenga, Gentille Musengimana, Gilbert Muhutu, Regis Rugemanshuro na Dr. Ernest Nsabimana.

Biteganyijwe ko ku gicamunsi cyo kuri uyu wa Gatandatu batorwamo Komite Nyobozi y’Umujyi wa Kigali.

Abajyanama b’Umujyi wa Kigali baboneka binyuze mu matora batorerwa muri buri karere k’Umujyi wa Kigali, ku buryo buziguye kandi mu ibanga n’Abagize Inama Njyanama z’Imirenge igize ako Karere.

Uko igikorwa cyo gutora abajyanama cyagenze:

- Kicukiro: Mu bagabo, Kayihura Muganga Didas atsinze n’amajwi 60. Mu bagore Rutera Rose yatsinze n’amajwi 66.

Rutera Rose ashimiye abamutoye, avuga ko yumva afite umusanzu ukomeye azatanga mu nama njyanama mu Mujyi wa Kigali. Kayihura Didas nawe ashimiye abamutoye, ashimira n’abo bari bahatanye. Yavuze ko yiteguye kujya abegera bakamuha izindi nama zizamufasha mu kazi ke.

Rutera Rose na Muganga Kayihura Didas batsinze, bari kumwe n'uwayoboye itora (uri hagati)

- Nyarugenge: Umutoni Gatsinzi Nadine na Mutsinzi Antoine nibo batsindiye kuba abajyanama b’Umujyi wa Kigali. Muri Nyarugenge abari bagize inteko itora bari 193, gusa hatoye 136 bangana na 70%.

Mutsinzi Antoine na Gatsinzi Nadine Umutoni bahagarariye Akarere ka Nyarugenge mu nama njyanama y'Umujyi wa Kigali

- Kicukiro: Nyuma y’uko abajyanama bose bamaze gutora, ubu hatangiye igikorwa cyo kubarura amajwi. Mmu bagore uwitwa Rutera Rose akomeje kuza imbere, naho mu bagabo Kayihura Muganga Didas niwe ukomeje kuza imbere.

12:15 Gasabo : Rubingisa Pudence na Rose Baguma nibo batsindiye kuba abajyanama b’Umujyi wa Kigali bahagarariye Akarere ka Gasabo. Rubingisa yagize amajwi 160 naho Baguma agira 147.

Kicukiro: Gutora abajyanama byatangiye, utora arajya aho yiherera agashyira ikimenyetso imbere y’uwo atoye.

Mu kwiyamamaza, Byiringiro Alfred usanzwe ushinzwe ibikorwa remezo muri Minisiteri y’ibikorwa remezo (Mininfra) ati "Nzarahanira ko Umujyi wa Kigali ugira amazi kuri bose, nzaharanira ko ikibazo cy’abantu babura imodoka gikemuka ndetse nzaharanira ko Umujyi wa Kigali uzanwamo amagare akoresha amashanyarazi."

Naho Kayihura Didas usanzwe ari umuyobozi w’ishuri rya ILPD, we yavuze ko azateza imbere ibikorwa by’ubujyanama no gufasha abatishoboye mu Nkiko.

11:54: Muri Gasabo kubarura amajwi bimaze nk’iminota itatu, ababarura barimo gusoma amazina ya Baguma Rose na Rubingisa Pudence ku bwiganze budasanzwe.

11:42 Kicukiro: Abakandida baracyarimo kwiyamamaza, barimo kwibanda cyane ku kuvugurura imiturire y’Umujyi wa Kigali, Ku buryo uba umujyi ubereye buri muturage uko ubushobozi bwe bungana.

11:35 Gasabo: Itora rirasojwe, Perezida wa Komisiyo y’igihugu y’amatora Prof. Kalisa Mbanda amaze kubaza niba nta wacikanwe, mbere yo kuzana udusanduku imbere y’inteko itora ngo hatangire kubarwa amajwi.

Hatoye abantu 170 muri 310 bagombaga gutora, kubarura amajwi biratangiye.

- Nyarugenge: Mu kwiyamamaza, abakandida bibanze cyane kukuzibanda ku kunoza imiturire bijyanishwa n’ibikorwaremezo ndetse no gutwara abantu n’ibintu mu Mujyi wa Kigali.

Uwitwa Mukamusoni Anitha yagize ati "Niba ari uguhuza umudugudu nagira ngo n’urwego rwo gutwara abantu n’ibintu bijyane, ndabasaba rero kuza gutora Anitha Mukamusoni, nzabahagararira neza."

Muri aka Karere ka Nyarugenge harimo Muhutu Gilbert washyizweho na Perezida Kagame nk’umujyanama nubwo yari mu biyamamarije muri aka karere.

11:20: Gasabo: Abari biyamamaje bari 11 none Perezida Kagame yashyize Dr Bayisenge Jeanette mu bajyanama kuri uyu wa Gatanu, abandi basoje kwiyamamaza, amatora yatangiye.

- Kicukiro: Abakandida bari 14 ariko babiri mu batanze kandidatire (Nsabimana Erneste na Musengimana Gentille) bagizwe abajyanama bashyizweho na Perezida Kagame. Bivuze ko hasigayemo 12 aribo bagombaga gutorwamo abajyanama babiri, umugore umwe n’umugabo umwe.

Kwiyamamaza hagati y’abakandida 12 barimo abagore batandatu n’abagabo batandatu byatangiye, buri mukandida arahabwa iminota itanu yo kuvuga imigabo n’imigambi bye.

Saa 10: 20 Nyarugenge: Ibikorwa by’amatora biratangiye. Ushinzwe ibikorwa by’Amatora mu Karere ka Nyarugenge, Rutikanga Jean Bosco yatangiye ashimira abitabiriye, aha ikaze Mbabazi Judith, Komiseri muri Komisiyo y’Igihugu y’Amatora ngo avuge bimwe mu biragenderwaho muri aya matora.

Yavuze ko igikorwa cyo kwiyamamaza kitagomba kurenza isaha imwe n’iminota icumi. Yavuze kandi ko abiyamamaza batagomba gukoresha imvugo igaragaza ivangura cyane cyane irishingiye ku mitwe ya politiki kuko bagiye kuyobora mu nzego z’ibanze.

Abakandida muri aka karere ni Ntezirembo Valens; Uwimbabazi Beatrice; Mutsinzi Antoine; Umutoni Gatsinzi Nadine; Semapondo Charles; Mukashyaka Immaculée na Anitha Mukamusoni.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza