00:00:00 IGIHE NETWORK KN KINYARWANDA EN ENGLISH FR FRANCAIS

RDC yadukanye iturufu nshya yo gushinja u Rwanda kubangamira amatora

Yanditswe na Musangwa Arthur
Kuya 25 Mutarama 2023 saa 09:37
Yasuwe :

Guverinoma ya Repubulika Iharanira Demokarasi ya Congo (RDC) yadukanye umuvuno mushya wo gushinja u Rwanda kubangamira amatora ateganyijwe mu mpera z’uyu mwaka.

Ni mu itangazo RDC yasohoye kuri uyu wa Kabiri tariki 24 Mutarama 2023, nyuma y’uko indege yayo ya Sukhoi-25 y’ingabo za FARDC irashweho n’ingabo z’u Rwanda, ubwo yinjiraga mu kirere cyarwo mu karere ka Rubavu. Amashusho yafashwe yerekana ko yagiye kuzimirizwa i Goma.

Guverinoma ya Congo yahakanye ko indege yayo yavogereye ikirere cy’u Rwanda, ivuga ko ‘yarashwe mu gihe yiteguraga kugwa ku kibuga cy’indege cya Goma, iri mu kirere cya Congo’.

Yavuze ko ‘icyo gitero cy’u Rwanda ari ubushotoranyi bufatwa nk’igikorwa cy’intambara kigamije kubangamira imbaraga ziri gukoreshwa mu ishyirwa mu bikorwa ry’amasezerano ya Luanda na Nairobi agamije kugarura amahoro mu burasirazuba bwa Congo no mu biyaga bigari.

Mu gitondo cyo kuri uyu wa Kabiri umutwe wa M23 wigaruriye agace ka Kitchanga mu Ntara ya Kivu y’Amajyaruguru muri Repubulika Iharanira Demokarasi ya Congo, nyuma y’amasaha menshi iri mu mirwano n’ingabo za Leta, FARDC.

Guverinoma ya Congo nk’uko bisanzwe ikaba yongeye kwitirira ibi bitero ingabo z’u Rwanda, ivuga ko ‘mu gihe hatangiye ibikorwa byo kubarura abazatora, isaba umuryango mpuzamahanga gushyira igitutu ku Rwanda no ku mutwe wa M23 kugira ngo bahagarike ibikorwa bishobora kubangamira amatora’.

Umusesenguzi mu bya politiki, amategeko akaba n’umunyamakuru, Gatabazi Tite, asanga iri tangazo rigaruka ku mvugo n’andi matangazo y’umuvugizi wa guverinoma, Patrick Muyaya, weruye akavuga ko ‘aya matora atazaba’.

Ati “Kuvuga ko u Rwanda rushaka kubangamira amatora ‘ni umurongo usanzwe wafashwe na RDC wo kwegeka ku Rwanda ibibazo byose ifite’."

Gatabazi akomeza avuga ko Tshisekedi yarananiwe guha abaturage amashuri, ibitaro, imihanda, amazi meza, amashanyarazi n’ibindi by’ibanze, akaba ashaka uwo abyegekaho kugira ngo abaturage bijujutire u Rwanda ko ari rwo rwatumye babura iby’ibanze.

Ati “Tshisekedi ari kwanga kunyura inzira y’amahoro yaba iya Luanda cyangwa Nairobi kugira ngo azasubike amatora, nanone ariko agashaka imvugo azabwira Abanye-Congo ko kudakora amatora byaturutse ku Rwanda”.

Ku rundi ruhande, Komisiyo y’amatora muri RDC iri kunanizwa na guverinoma iyima iby’ingenzi ikeneye.

Iyi komisiyo imaze kuvuga kenshi gashoboka ko ititeguye, ko yimwe amafaranga ngo ikore akazi kayo ku gihe. Ku mbuga nkoranyambaga hagaragaye imikorere mibi mu kubarura abazatora, nko gutanga amakarita atari yo, yaba indangamuntu, ikarita y’itora na pasiporo .

Komisiyo y’amatora yasabye kenshi ko bohererezwa ibikoresho byo kubarura abaturage mu ntara ariko ntibirakorwa.

Gatabazi ati “Ibi byonyine birerekana ko nta ruhare na rumwe ikindi gihugu cyagize mu migendekere mibi y’akazi ka komisiyo y’amatora. Inshingano zose ni iza Guverinoma ya Congo”.

Perezida Kagame aherutse gushinja Perezida wa Congo gushaka impamvu yo gusubika amatora ya Perezida yo mu mwaka utaha ashyira ku Rwanda ibibazo by’umutekano mucye mu burasirazuba Congo.

Ati “Atari n’uko yatsinze amatora ya mbere nk’uko tubizi. Niba ashaka ubundi buryo amatora akurikiyeho yakwigizwayo yashaka izindi mpamvu zitari twebwe.”

Abatavuga rumwe n’ubutegetsi bwa Tshisekedi, bakunze gushinja Tshisekedi gutegura umugambi wo kuzerekana ko komisiyo y’amatora yananiwe gukora iby’ingenzi bitangirirwaho ngo amatora azabe, bityo azabyitwaze asubike amatora, avuga ko komisiyo hari ibyo itakoze.

Inkuru wasoma:U Rwanda rwarashe indege y’intambara ya RDC, isubira i Goma yaka umuriro

Tshisekedi akomeje gushaka impamvu zose zo gusubika amatora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .