00:00:00 IGIHE NETWORK KN KINYARWANDA EN ENGLISH FR FRANCAIS

Putin yigereranyije n’Umwami w’u Burusiya wazengereje u Burayi mu buryo budasanzwe

Yanditswe na Bukuru JC
Kuya 11 June 2022 saa 11:15
Yasuwe :

Perezida w’u Burusiya, Vladimir Putin, yatangaje ko afatira urugero kuri ‘Peter the Great,’ Umwami w’Abami wa mbere w’u Burusiya wabayeho hagati ya 1672 na 1725, akaba yaragize uruhare runini mu bitero byaguye u Burusiya, ashinga Umujyi wa St Petersburg ndetse anateza imbere ibijyanye n’ubumenyi mu ikoranabuhanga.

Peter The Great ni we washinze Ubwami bw’u Burusiya, yubaka igisirikare gikomeye, yohereza abanyeshuri benshi kwiga mu mahanga ndetse anashyiraho uburyo bw’imiyoborere bwatumye u Burusiya buba igihugu gikomeye mu kinyejana cya 18 na nyuma yaho.

Ubwo Putin yari yagiye kwifatanya n’abanyeshuri mu kwizihiza isabukuru y’imyaka 350 ishize uwo Mwami avutse, yavuze ko ibyo yakoze mu gihe cye bisa nk’ibiri kuba ku Burusiya magingo aya.

Yashimangiye ko intambara za Peter zitari zigamije kwigarurira ubutaka bw’ibindi bihugu, nk’uko abantu bamwe bakunze kubivuga, ahubwo zabaga ari ugusubiza u Burusiya ubutaka bwahoranye, ati “Peter the Great yatangije intambara mu majyaruguru mu gihe cy’imyaka 21. Bishobora gusa nk’aho yarimo kurwana na Suède, nk’aho hari ubutaka yabakuyeho. Ntabwo yigeze abakuraho [ubutaka bwabo ahubwo] yagaruye ubwahoze ari ubw’u Burusiya.”

Umujyi wa St Petersburg wigaruriwe na Peter the Great mu 1703 wahoze ari uwa Suède, ukaba ari wo Mujyi wa kabiri munini mu Burusiya n’uwa kane mu guturwamo n’abaturage benshi mu Burayi. Niwo Mujyi Putin akomokamo, ukaba ikirango cy’intangiriro y’ubwami mu Burusiya ndetse n’ikimenyetso cy’ubuhangange bw’icyo gihugu mu Burayi.

Putin yavuze ko ibibazo byariho mu gihe cya Peter the Great bisa nk’ibyo u Burusiya buri gucamo muri ibi bihe, aca amarenga ko Abarusiya b’iyi minsi bafite inshingano zo kwigarurira ibice by’igihugu cyabo byatwawe n’amahanga, ariko ntiyigeze akomoka kuri Ukraine mu izina.

Yagize ati “Nitwe dutahiwe mu kugarura ibyahoze ari iby’u Burusiya ndetse no gusubiza u Burusiya ubuhangange. Nidukomeza kwizera ko ibyo bitekerezo [byo kugarura ibyo u Burusiya bwanyanzwe] ari ingenzi cyane mu mibereho yacu, tuzabasha gukemura ibibazo duhura nabyo muri iyi minsi.”

Benshi mu banenga Putin bavuga ko ibitekerezo nk’ibi ari byo ashingiraho mu ntambara akomeje kurwana muri Ukraine, igihugu yavuze ko kidatandukanye n’u Burusiya kuko byahoze ari bimwe.

Kugeza ubu, Ingabo z’u Burusiya zigenzura 20% by’ubutaka bwa Ukraine, amakuru akavuga ko Leta y’u Burusiya iri gutegura uburyo igice yigaruriye muri Ukraine izakigira Akarere k’u Burusiya, uretse ko Putin aherutse kuvuga ko icyemezo cy’ahazaza h’ibyo bice hazagenwa n’abaturage baho, bikavugwa ko ibi bishobora gukorwa muri kamarampaka zishobora kubaho mu mpeshyi.

Uyu muyobozi kandi yavuze ko nubwo ibihugu by’u Burayi bitumvaga gahunda y’ibikorwa bya Peter the Great, amaherezo byaje kugera aho bikamwumva, bikamurekera ibice yari yarigaruriye, asa nk’uca amarenga ko na magingo aya, abatumva gahunda y’ibitero by’u Burusiya bazayumva ndetse bakaburekera ibice bwigaruriye.

Putin yashimagije Peter the Great wateye ibihugu byinshi by'u Burayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .