Mu mibare: Ibibazo icumi by’ingutu bibangamiye abatuye mu Karere ka Huye

Yanditswe na Prudence Kwizera
Kuya 15 Ukwakira 2019 saa 11:14
Yasuwe :
0 0

Mu Karere ka Huye hagaragara ibibazo bikomeye bigera ku icumi bibangamiye imibereho myiza y’abaturage bisaba kwitabwabo by’umwihariko n’inzego zitandukanye. Ibyo bibazo ni inzitizi ikomeye ituma abaturage batabasha kwiteza imbere n’imibereho myiza yabo ikahazaharira.

IGIHE yagiranye ikiganiro n’Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciata, asobanura uko ibyo bibazo bizakemuka n’aho ubushobozi buzaturuka.

Birimo iby’imiryango isembera, abafite inzu zimeze nka nyakatsi, abararana n’amatungo mu nzu, abarwaye amavunja, abatagira ubwiherero, abana bafite imirire mibi, ingo zangijwe n’ibiza, abangavu baterwa inda imburagihe, abana bataye ishuri n’abakoreshwa imirimo ivunanye.

Abasembera

Imibare yerekana ko mu Karere ka Huye hari imiryango 193 itagira aho kuba na mba. Iyo miryango ahanini usanga itunzwe no guca inshuro cyangwa gusabiriza igamije kubona icyo kurarira ngo iramuke.

Muri make biragoranye ko yabasha gutekereza ku iterambere ryayo ry’ejo hazaza, itabona n’ibituma ibaho neza uyu munsi.

Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciata, avuga ko amafaranga yo kububakira yashyizwe mu ngengo y’imari y’uyu mwaka kandi hazifashishwa n’umuganda ukorwa n’abaturage.

Ati “Tuzifashisha umuganda w’abaturage babumbe amatafari bazamure inzu noneho akarere gatange isakaro, inzugi n’amadirishya. Biri mu ngengo y’imari bifite amafaranga yateganyijwe n’uko bizakorwa.”

Kankesha avuga ko bihaye umuhigo ko icyo kibazo kigomba kuba cyarangiye bitarenze muri Kamena 2020.

Ababa mu nzu zimeze nka nyakatsi

Mu Rwanda haciwe nyakatsi ariko kugeza ubu usanga hari abaturage bakiba mu nzu zitameze neza bitewe n’impamvu zirimo ubushobozi buke. Izo nzu usanga ntaho zitaniye na nyakatsi bitewe n’imiterere yayo.

Mu Karere ka Huye hagaragara ingo zifite inzu zimeze nka nyakatsi zigera ku 1 157 nk’uko imibare itangwa n’ubuyobozi ibigaragaza.

Izo nzu usanga harimo izishaje cyane kuko ibisenge biva andi izindi zifite ibikuta byapfumutse ku buryo ubuzima bw’abazituyemo buteye impungenge.

Kankesha avuga ko na bo bazubakirwa kuko byashyizwe mu ngengo y’imari y’uyu mwaka ariko hakanewe n’uruhare rw’abaturage.

Ati “Hari izigera kuri 32 zimaze gusanwa; (…) icyo tubashishikariza ni ukuvuga ngo ‘kosora ahari ikibazo isakaro akarere kararishaka’. Ni rwa ruhare umuturage agomba kugira mu bimukorerwa.”

Akarere ka Huye kihaye umuhigo ko ikibazo cy’abafite inzu zimeze nka nyakatsi kizarangira bitarenze muri Kamena 2020.

Ingo zitagira ubwiherero

Abaturage bo mu karere ka Huye bagera kuri 348 ntibagira ubwiherero na mba.

Ushatse kwiherera ajya gutira mu baturanyi cyangwa agafata isuka akajya munsi y’urugo cyangwa mu bihuru. Ni ikibazo gikomeye kuko biteza umwanda n’indwara ziwuturukaho.

Usibye abo hari n’abafite ubwiherero butujuje ibisabwa burimo ubutindishije imitumba y’insina n’ubwubakishije ibyatsi bugera ku 11 252. Ubwo bwiherero buteza umwanda kuko usanga amasazi abuturukamo asanga abantu mu rugo.

Bushobora guteza n’impanuka kuko buba budatinze neza bikaba byatuma ubugiyemo agwamo.

Kankesha avuga ko biyemeje kurangiza icyo kibazo vuba cyane, bitarenze uyu mwaka.

Ati “Abaturage bacukura umwobo, umuganda ukabubakira naho twe nk’akarere tukabaha isakaro. Twabiteguye neza twatangiye gukorera mu masibo y’aho batuye.”

Avuga ko bashyizeho igitondo cy’ubuzima n’igitondo cy’isuku bibafasha kumenya ibyo bibazo noneho isibo y’aho igahita itangira kubikemura yunganiwe n’akarere.

Kuva mu Ntangiriro za Nzeri 2017 mu Karere ka Huye hamaze kubakwa ubwiherero 147 bikozwe n’abaturage mu muganda hamwe n’amasibo y’intore.

Imirire mibi ku bana

Imibare yerekana ko Huye ifite abana 10 bari mu mirire mibi mu buryo bukabije kuko bari mu ibara ry’umutuku, n’abandi 141 bafite ikibazo cy’imirire mibi mu buryo budakabije, bari mu ibara ry’umuhondo.

Kankesha yavuze ko abana bafite imirire mibi bari mu ibara ry’umutuku bajyanywa ku Kigo Nderabuzima kuvuzwa naho abari mu muhondo bagafashirizwa mu gikoni cy’umudugudu.

Ati “Mu cyumweru kimwe muri abo bana 141 bari mu muhondo hamaze gukiramo 10, turakomeje kugira ngo n’abandi bakire.”

Avuga ko hashyizweho igikoni cy’umudugudu cyo kwigishirizamo ababyeyi gutegura indyo yuzuye bakoresheje ibiribwa bigaragara hafi yabo.

Bigishwa kandi uko umubyeyi yitwara igihe atwite, uko yonsa neza umwana n’uko amushakira imfashabere kugira ngo amurinde imirire mibi.

Abadafite ubushobozi bagurirwa indagara n’ifu y’igikoma byo guha abana babo.

Kankesha ati “Mfite icyizere ko muri Kamena 2020 kizaba cyakemutse.”

Yavuze ko hari amafaranga y’inkunga ya Banki y’Isi yashyizwe muri ibyo bikorwa byo gukumira no kurwanya imirire mibi n’igwingira.

Abararana n’amatungo

Imibare yerekana ko muri Huye hari imiryango 3 076 irarana n’amatungo mu nzu.

Kankesha avuga ko bari gufatanya n’izindi nzego n’abaturage gukaza amarondo hakumirwa abajura biba amatungo.

Abaturage bari kwigishwa n’uburyo bwo kororera mu bikumba bagasabwa no kubaka inzu mu gikari zagenewe amatungo magufi.

Abarwaye amavunja

Imibare yerekana ko muri Huye hari abaturage 38 barwaye amavunja ku buryo bukabije. Ubuyobozi buvuga ko abenshi ari abafite uburwayi bwo mu mutwe kandi batitabwaho n’imiryango yabo.

Kankesha avuga ko ku bufatanye n’inzego zitandukanye ku bafite ubumuga ndetse n’imiryango yabo bari kubahandura no kubavuza.

Ati “Muri abo 38 tumaze guhandura abagera kuri 33 kandi bari gukira. Iyo tumaze kubahandura tujya kubavuza uburwayi bwo mu mutwe.”

Mu rwego rwo gukumira amavunja hakomeje ubukungurambaga bwo gutoza abaturage isuku.

Abana bavuye mu ishuri

Muri Huye hari abana bagera ku 1 271 bo mu mashuri abanza n’ayisumbuye bataye ishuri bituma umubare w’inzererezi mu Mujyi wa Huye wiyongera.

Abo bana bataye ishuri ngo biganjemo abiga mu burezi bw’ibanze bw’imyaka icyenda na 12. Usibye abajya kuzerera mu muhanda, abangavu bo bibaviramo ingaruka zo guterwa inda imburagihe.

Kankesha yagize ati “Turi gukorera mu masibo mu mudugudu tureba bana babuye mu ishuri n’icyabavanyemo kugira ngo gikemurwe basubiremo.”

Avuga ko mu mirenge imwe n’imwe bamaze kubarura abo bana bamwe basubizwa mu ishuri abandi bakaba bazasubirayo muri Mutarama umwaka utaha bagiye gutangira umwaka.

Hagamijwe ko ababyeyi bita ku myigire y’abana babo iyo hari umwana usibye ishuri umubyeyi we ahamagazwa ku ishuri agasobanura impamvu agasabwa ko umwana we agaruka kwiga.

Abasenyewe n’ibiza

Ingo zasenyewe n’ibiza mu Karere ka Huye mu mvura iheruka kugwa zigera kuri 512. Minisiteri y’Ubutabazi imaze gutanga amabati ku ngo zigera ku 141.

Ubuyobozi bw’Akarere ka Huye buvuga ko buzakomeza gukora ubuvugizi kugira ngo uwagizweho ingaruka n’ibiza wese abe yafashwa kongera kwiyubaka.

Kankesha yasobanuye ko abasenyewe n’ibiza bazajya bafashwa kubakirwa biyuze mu muganda ukorwa n’abaturage, bahabwe isakaro n’akarere.

Abafite indi mitungo yangijwe n’ibiza na bo ngo bari gukorerwa ubuvugizi kugira ngo bahabwe inkunga na Minisiteri y’Ubutabazi.

Inda ziterwa abangavu

Muri uyu mwaka wa 2019, abana b’abakobwa batarageza ku myaka y’ubukure bagera kuri 669 bo mu Karere ka Huye batewe inda imburagihe bibagiraho ingaruka zitandukanye. Umwaka ushize abazitewe bari 338.

Bamwe bavuye mu ishuri babaho mu buzima bushaririye kubera inshingano zo kurera abana kandi nabo ari abana.

Nta washidikanya kuvuga ko ikibazo cy’abangavu baterwa inda imburagihe ari kimwe mu byongera umubare w’abana bata ishuri, umubare w’inzererezi n’abajya mu biyobyabwenge.

Kankesha avuga ko bari gukora ubukangurambaga mu kwigisha abangavu kwirinda ibishuko ariko bikajyana no gushakisha bagabo babateye inda kugira ngo bahanwe.

Ati “Turi kwigisha duhereye hasi mu mashuri abanza; ariko turi no gusaba ababyeyi kudufasha kwigisha bana babo. Ikindi ni urugamba twatangiye rwo gushakisha abagabo babasambanya kugira ngo bahanwe bibere abandi isomo.”

Icyo kibazo cy’uburenganzira bw’abana kijyanye n’ikindi ikibazo cy’abana bato bakoreshwa imirimo ivunanye irimo kurinda umuceri n’abakoreshwa mu ngo.

Abatanga akazi banengwa kuba baha akazi umwana wagombye kuba ari mu ishuri bakaburirwa ko bihanwa n’amategeko.

Abatagira ubwishingizi mu kwivuza

Kugira ubwishingizi mu kwivuza ni ingirakamaro kuko bitabara umuntu mu buzima iyo agize ibyago byo kurwara.

Hari benshi mu baturage batagira ubwo bwishingizi bitewe n’impamvu zirimo kutabyitaho cyangwa se ubushobozi bukabura.

Mu Rwanda hashyizweho uburyo bwo gufasha abaturage kujya bivuza bitabagoye ari bwo ‘gutanga umusanzu w’ubwisungane mu kwivuza’ buri mwaka.

Hari ubwo usanga bamwe mu baturage batabyitabira kandi batabuze ubushobozi.

Mu Karere ka Huye imibare yerekana ko mu mpera za Kanama 2018 abari bamaze kwitabira bari ku ijanisha rya 75.1 %.

Ugendeye ku mubare w’abaturage batuye akarere ka Huye bangana na 554 851 bivuze ko hari abaturage bagera ku 83 628 batagira ubwishingizi bwo kwivuza.

Kankesha avuga ko imirenge yo mu Mujyi ari yo iri inyuma mu bwitabire agasanga ahagomba gushyirwa ingufu ari mu bukangurambaga.

Yavuze ko ibyo bibazo byose bizakemuka ari uko abaturage, ubuyobozi n’abafatanyabikorwa babigizemo uruhare.

Huye ni kamwe mu turere dufite umujyi washyizwe mu yunganira Kigali. Gutera imbere k’uwo mujyi mbere na mbere bizaturuka mu iterambere ry’abatuye akarere muri rusange.

Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciata yavuze ko ibibazo byugarije akarere bari kubivugutira umuti
Akarere ka Huye kabangamiwe n'ibibazo birimo iby’imiryango isembera, abafite inzu zimeze nka nyakatsi, abararana n’amatungo mu nzu, abarwaye amavunja, abatagira ubwiherero, abana bafite imirire mibi, ingo zangijwe n’ibiza, abangavu baterwa inda imburagihe, abana bataye ishuri n’abakoreshwa imirimo ivunanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza