Bane mu baregwaga gukoresha nabi umutungo wa KOADU bagizwe abere

Yanditswe na Mukwaya Olivier
Kuya 10 Mutarama 2021 saa 03:42
Yasuwe :
0 0

Urukiko rukuru urugereko rwa Musanze rwagize abere bane mu baregwa mu rubanza rwa Koperative Dukundumurimo(Koadu)ikora umurimo wo kubaga inka mu murenge wa Rubavu, naho rutegeka ko babiri mu bahoze ari abayobozi bayo bakomeza gufungwa imyaka itandatu.

Mu isomwa ry’urubanza ryabaye kuri uyu wa kane, urukiko rwagize abere Hakizimana Hassan na Nzabandora Théogene ba rwiyemezamirimo bafite kompanyi ya Kicoseca yubatse ibagiro rya Rutagara, Hamuri Bahati noteri w’umurenge wa Rubavu na Ndagijimana Théophille wari ukuriye komite ngenzuzi.

Bari bahamijwe icyaha cyo gukoresha inyandiko mpimbano yemezaga umwenda wa miliyoni 435 536 527 z’amafaranga y’u Rwanda, aho byavugwaga ko batumije inama ikitabirwa n’abantu 28 ariko bagasinyira abanyamuryango 62 noteri w’umurenge nawe akabyemeza ashyiraho kashe.

Urukiko rwashimangiye igifungo cy’imyaka itandatu kuri Mbanjimbere Faustin wahoze ayobora Koadu na Rwango Jean Claude, wari Umunyamabanga.

Urukiko rwategetse Mbanjimbere Faustin na Rwango Jean Claude gufatanya gusubiza Koadu amafaranga 310 000 yiswe insimburamubyizi ndetse na 52 22 900 Frw yagombaga gukoreshwa mu kwakira abashyitsi. Basabwe kwishyura miliyoni 3 Frw y’indishyi z’akababaro na miliyoni imwe y’igihembo cy’uwayiburaniye.

Urukiko rwategetse Mbanjimbere Faustin guha Koadu 12 000 000 Frw ku kibanza cya Koperative yagurishije muramu we.

Perezida wa koperative Koadu, Musabyimana Nyarubisi Bertin yavuze ko batishimiye imikirize y’urubanza bakaba bagiye gukomeza kujurira.

Ati “Ubu ikiriho ni ukujurira kuko bemeje ko abari abayobozi bafungwa ariko nta ndishyi ifatika bemeje. Ni amafaranga make n’ikibanza ngo bazaduha miliyoni 12 kandi ni makeya nayo.”

Koperative KOADU yashinzwe mu 2009, igamije gukora ububazi bw’inka. Mu 2012 ni bwo yatangiye kubaka ibagiro ryagombaga kurangira mu 2015 biza kugaragaramo ibibazo ku buryo mu 2016 ari bwo Ikigo cy’Igihugu gishinzwe Amakoperative (RCA) cyahagaritse Komite yayiyoboraga nyuma yo gutahura uburiganya mu masoko yatangwaga mu myubakire y’ibagiro.

Inkuru bijyanye: Umuzi w’ibibazo bya koperative KOADU byafungishije abari abayobozi bayo

Inyubako y'ibagiro rya Rutagara ariyo nyirabayazana w'iki kibazo kimaze iminsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .