Umuzi w’ibibazo bya koperative KOADU byafungishije abari abayobozi bayo

Yanditswe na Uwimana Abraham
Kuya 20 Ugushyingo 2020 saa 01:39
Yasuwe :
0 0

Imyaka imaze kuba myinshi humvikana ibibazo cya Koperative KOADU icuruza inyama yo mu Karere ka Rubavu ndetse byanageze mu nkiko haburanishwa imanza ku bintu bitandukanye.

Koperative KOADU yashinzwe mu 2009, igamije gutunganya inyama z’inka. Mu 2012 ni bwo yatangiye kubaka ibagiro ryagombaga kurangira mu 2015 biza kugaragaramo ibibazo ku buryo mu 2016 ari bwo Ikigo cy’Igihugu gishinzwe Amakoperative (RCA) cyahagaritse Komite yayiyoboraga nyuma yo gutahura uburiganya mu masoko yatangwaga mu myubakire y’ibagiro.

Ibibazo muri iyi Koperative byatangiye kugaragara mu 2015, ubwo abanyamuryango y’iyi koperative bashyiraga mu majwi abari abayobozi bayo barimo Mbanjimbere Faustin wahoze ayobora Koadu, Rwango Jean Claude wari umunyamabanga, Theophile Ndagijimana na Justin Uwimana Nyagahunde, bose bari abayobozi ba komite ngenzuramikorere b’iyi koperative.

Iki kibazo cy’imicungire mibi y’iyi koperative cyahagurukije Ikigo cy’Igihugu gishinzwe Amakoperatvie, (RCA), gikora igenzura gisanga hari amafaranga atagaragazwa uko yakoreshejwe n’abayoboraga iyi koperative.

Nyuma yo kuganira n’abanyamuryango ku bibazo bitandukanye byari byugarije Koperative byari bishingiye ahanini ku micungire y’umutungo itanoze, hemejwe ko Ubuyobozi bw’iyi koperative buseswa hagashyirwaho ubundi ndetse umutungo wanyerejwe ugakurikiranwa ku bufatanye bwa Koperative, Akarere, RCA ndetse na Minisiteri y’Ubucuruzi n’Inganda.

Nyuma y’uko abari abayobozi b’iyi koperative bambuwe inshingano bitewe n’imicungire mibi y’umutungo w’iyi koperative, bahise batabwa muri yombi bakurikiranyweho ibyaha byo kunyereza umutungo, gucunga nabi imari ya koperative n’imiyoborere mibi.

Nyuma y’ibi haje gushibuka ikibazo, ari nacyo zingiro rya byose, cyavuye mu iyubakwa ry’ibagiro rya kijyambere, aho Sosiyete y’ubwubatsi ya King Construction and service Company Limited yubatse iri bagiro yareze iyi koperative kwanga kuyishyura agera kuri miliyoni 450 Frw.

Iri bagiro ryuzuye ritwaye amafaranga miliyoni 372 Frw, ubuyobozi buza kugirana amasezerano na rwiyemezamirimo y’imirimo y’inyongera yatwaye angana na miliyoni 450 Frw.

Hari inyandiko yo ku wa 23 Mutarama 2015 yiswe amasezerano y’inyongera ashamikiye ku masezerano y’isoko ryo kubaka iri bagiro, afite agaciro ka 435.536.397 Frw, akaba yarashyizweho imikono n’abahagarariye KOADU.

Icyari kigamijwe muri aya masezerano ni uburyo n’igihe cyo kwishyura amafaranga yose yemeranyijweho ku mpande zombi zagiranye amasezerano y’ibanze, n’igiciro cyangwa ingano nyir’izina y’amafaranga agomba kwishyurwa kugeza ubu, kuko imirimo y’ubwubatsi bw’ibagiro yarangiye ariko kwishyurwa ntibirangire ku gihe cyari cyemeranyijwe n’impande zombi.

Niyo mpamvu hakozwe aya masezerano kandi mu gihe atari yubahirizwa iri bagiro rigafatwa nk’ingwate y’ubwinshingizi y’uwarangije kubaka ari we wahawe isoko.

Nyuma y’ibi ngo habaye inama y’abanyamuryango, bivugwa ko yari igamije kwiga ku kibazo cy’uyu mwenda KOADU yari ibereyemo KICOSECA Ltd.

Inyandiko y’iyi nama yabaye ku wa 10 Kamena 2015 bivugwa ko yemerejwemo aya masezerano yo kwishyura ayo mafaranga, yometseho urutonde rw’amazina n’imikono y’abanyamuryango bose b’iyi koperative uko ari 90 bemera ko aya mafaranga azishyurwa King Construction and Service Company.

Iyi nyandiko ngo yanemejwe na noteri w’Umurenge wa Rubavu, Hamuri Bahati, wemeje ko ari ukuri.

Bamwe mu banyamuryango bitabiriye iyi nama bavuze ko yitabiriwe n’abanyamuryango bake kandi n’ibyemerejwe mu nama atari byo bashyizeho umukono ahubwo ko basinye bisanzwe nk’abitabiriye inama kugira ngo bahabwe insimburambubyizi.

N’ubwo badahuriza ku mubare nyawo w’abitabiriye iyo nama, bose bemeza ko iyo nama itarimo abanyamuryango bose, ndetse benshi bahuriza ku kuba yaritabiriwe n’abanyamuryango batagera kuri 30, bityo ko imikono y’abandi yashyizweho ari imyiganano, hari n’abanyamuryango bagaragaje ko batamenye ko iyo nama yabaye.

Isesengura ry’imvugo z’abantu babajijwe mu iperereza rigaragaza ko bose badahuriza ku byabaye ku wa 10 Kamena 2015, kuko hari bamwe bemera ko inama yabaye ariko ntibahurize ku mubare w’abayitabiriye, naho abandi bagahakana ko iyo nama itigeze ibaho, mu gihe hari umunyamuryango wemeje ko iyo nama yasubitswe bitewe no kutageza ku mubare uteganywa.

Imiterere y’urubanza

Kuva mu 2015 kugeza kuwa 11 Werurwe 2017, Mbanjimbere Faustin yari Perezida wa Koperative KOADU, nyuma y’aho arangirije manda agasimburwa na Ndayishimiye Jean Martin, Ubushinjacyaha bwamukurikiranyeho icyaha cyo kunyereza umutungo w’iyo koperative ungana na 1.090.000 Frw.

Ndayishimiye Jean Martin nawe yaje gukurikiranwaho icyaha cyo kurigisa no konona umutungo n’icyaha cyo gukoresha inyandiko yahinduwe cyangwa irimo ibinyoma, naho Ngabo Rutimirwa Joseph na Munyaneza Yoboka bari abanyamuryango b’iyo koperative bakurikiranywaho icyaha cyo gukoresha inyandiko yahinduwe cyangwa irimo ibinyoma.

Mu kubakurikirana, ubushinjacyaha buvuga ko ikigo cy’Igihugu Gishinzwe Amakoperative (RCA) cyabakoreye igenzura, kiza gusanga Mbanjimbere Faustin yaranyereje amafaranga angana na 1.090.000 Frw ayakoresha mu nyungu ze bwite naho Ndayishimiye Jean Martin na Ngabo Rutimirwa Joseph nabo banyereza 20.032.800 Frw.

Ndetse banakoze amasezerano atavugisha ukuri bemera ko Koperative ibereyemo inguzanyo uwitwa Rugondo Mugabe Xavier ingana na miliyoni 40 kandi nyamara amasezerano bagiranye agaragaza ko bamufitiye ideni ringana na miliyoni 20 Frw, ayo masezerano bakoze atavugisha ukuri akaba yaranasinyweho na Munyaneza Yoboka nawe akaba yari ayakurikiranyweho.

Urukiko rwisumbuye rwa Rubavu, rushingiye ku kuba ayo mafaranga baregwa yose barayagaragarije icyo bayakoresheje mu nyungu za Koperative, rwemeje ko badahamwa n’icyaha bakurikiranyweho cyo kunyereza umutungo wa KOADU.

Ku cyaha cyo gukoresha inyandiko yahinduwe cyangwa irimo ibinyoma nabwo rwemeza ko nta cyaha bakoze kuko ayo masezerano baregwa bayasinye nk’abagize komite nyobozi ya Koperative, ko bayanditse bagahuriza hamwe ideni bari bafitiye Rugondo Mugabe Xavier, kandi akaba yaranashyizweho umukono na noteri, rwemeza ko atari amahimbano.

Ubushinjacyaha bwajuririye icyo cyemezo mu Rukiko Rukuru Urugereko rwa Musanze, ruvuga ko Urukiko Rwisumbuye rwa Rubavu rwirengagije ibimenyetso byose byatanzwe n’ubushinjacyaha rubagira abere ntacyo rushingiyeho, busaba ko abaregwa bahamwa n’ibyaha bakurikiranyweho bakabihanirwa.

Muri uru rubanza, Urukiko rwasanze ibibazo bigomba gusuzumwa ari ukumenya niba hari ibimenyetso byirengagijwe bigaragaza ko abaregwa bakoze ibyaha bakurikiranyweho, hasuzumwe ibyerekeranye n’ibihano ndetse n’indishyi zisabwa muri uru rubanza.

Mbanjimbere Faustin yiregura avuga ko habaye audit ya bamwe mu banyamuryango ba Koperative, bamwe bavuga ko akoresha umutungo wa Koperative nabi ariko yatanze ibisobanuro Urukiko rumugira umwere, ko batangira iyo Koperative we yari asanzwe afite imodoka kandi Koperative nta modoka yari ifite.

Nibwo baje kumvikana ko iyo modoka ye yari afite yajya ikoreshwa mu mirimo ya Koperative bakishyura amavuta ndetse n’ibihano yakwandikirwa. Ibyo byanditswe ku munsi bari bagiye i Musanze mu rubanza rwari rwarezwemo iyo Koperative, basubiye Rubavu Polisi ibandikira contravention, bemeranya ko bagezeyo yishyurwa n’umucungamutungo wa Koperative.

Mbanjimbere yavuze ko andi mafaranga asigaye angana na 450.000 Frw yatanzwe bashyira “container” ku modoka bari baraguze banakoresha na frigo yayo, andi atangwa bayigomboza, kuko bari barayiguze muri Uganda igeze ku mupaka wa Bunagana banga kuyirekura bitewe n’imisoro yari irimo, bayigomboje amafaranga menshi, nyuma baza kuyigurisha umunye-Congo.

Inyandiko zibigaragaza zerekana ko batanze amafaranga agera muri 3.500.000 Frw kandi uwayatangaga yemera ko yayatanze.

-  Imvano y’amakimbirane

Amakimbirane akomoka hagati ya Komite Nyobozi ya mbere yari iyobowe na Mbanjimbere Faustin na komite ya kabiri yari iyobowe na Ndayishimiye Martin. Ashingiye ku rubanza rwaciwe n’Urukiko rukuru, Urugereko rwa Musanze ku wa 20/05/2020 aho Ndayishimiye Martin na Ngabo Rutimirwa bahamwe n’icyaha cy’inyandiko mpimbano Mbanjimbere we agirwa umwere kuko yagaragarije urukiko ukuri ku byabaye.

Ibi byatumye abo bombi bahamwa n’icyaha bityo bakaba ari abatangabuhamya mu rubanza ruregwamo Mbanjimbere Faustin n’ubwo nabo baruregwamo ariko bakaba bahakana amasezerano bashyizeho umukono ubwo KOADU yagiranaga amasezerano y’inyongera na KICOSECA.

Indi mpamvu y’amakimbirane nuko KICOSECA yari imaze gutsinda KOADU mu rukiko rw’ubujurire aho yari yatangiye na cyamunara yo kugurisha ibagiro kugira ngo yishyurwe umwenda KOADU iyibereyemo ungana na 435,536,327 Frw.

Ikindi ni uko KOADU ivuga ko ibyuma byaguzwe mu Bushinwa bidakora ndetse ngo ko amafaranga ari Mbanjimbere na Rwango bafashe icyemezo cyo kugura ibyo byuma kandi nyamara ihererekanya ryakozwe na Banki y’Abaturage ya Rubavu igaragaza ko KOADU yatanze uburenganzira bwo kugura ibyuma by’ibagiro ndetse amadolari 100,000 yohererezwa Sosiyete yo mu Bushinwa yitwa JACAJU LTD ndetse inyemezabwishyu zirabyerekana.

Ku bijyanye n’ikibanza KOADU ivuga ko ari Mbanjimbere Faustin na Rwango Jean Claude bakigurishije Hagumimana Frank nyamara hari amasezerano y’ubugure yakozwe ku wa 22/10/2015 aho Hagumimana yaguze na KOADU ikibanza cyayo ndetse agasinyirwa n’abagize Komite Nyobozi yose.

Icyemezo cy’urukiko ku byaregwaga abari abayobozi n’abo bafatanyije

Hashingiwe kuri ayo makuru yose Urukiko Rwisumbuye rwa Rubavu rwahamije ibyaha abahoze bayobora koperative KOADU-Dukundumurimo y’ababazi b’inyama byo gukoresha inyandiko mpimbano n’ubuhemu bahanishwa igifungo cy’imyaka itandatu.

Abahamijwe ibyaha ni Mbanjimbere Faustin wahoze ayobora Koadu, Rwango Jean Claude, wari umunyamabanga, Hakizimana Hassan na Nzabandora Theogene ba Rwiyemezamirimo bubatse iri bagiro, Ndagijimana Theophile wari ukuriye komite ngenzuzi na Hamuri Bahati, noteri w’Umurenge wa Rubavu.

Mu byaha baregwaga bahamijwe icyaha cyo gukoresha inyandiko mpimbano yemezaga umwenda wa miliyoni 435.536.527 z’amafaranga y’u Rwanda, aho batumije inama ikitabirwa n’abantu 28 ariko bagasinyira abanyamuryango 62 noteri w’umurenge nawe akabyemeza ashyiraho kashe.

Ku cyaha cyo kunyereza umutungo no gukoresha nabi umutungo ufitiye rubanda akamaro urukiko rwabagize abere kuko ubushinjacyaha nta bimenyetso bifatika bwatanze.

Umucamanza nyuma yo kubashinja icyaha cy’inyandiko mpimbano yemeje ko bafungwa imyaka itandatu, Mbanjimbere Faustin na Rwango Jean Claude kwishyura amafaranga ibihumbi 310 y’u Rwanda yasohotse ari insimburamubyizi ku bantu batitabiriye inama, abahamijwe icyaha bakazishyura koperative miliyoni 3 z’amafaranga y’u Rwanda nk’indishyi na miliyoni imwe y’igihembo cya avoka.

Umucamanza umwe yitandukanyije icyemezo cy’abandi muri uru rubanza

Inteko yaburanishije uru rubanza yari igizwe n’abacamanza batatu ari bo Twagirumwami Mupenda Martin, Rukera Jean de Dieu ndetse na Bizimana Innocent.

Nyuma yo kwiherera kw’iyi nteko, babiri muri aba bahurije ku mwanzuro umwe mu gihe umwe muri bo, Bizimana Innocent atemeranyijwe nabo ku myanzuro bafashe kubera impamvu zitandukanye.

Mu nyandiko ifatanye n’umwanzuro w’urukiko, IGIHE ifitiye kopi, ikubiyemo igitekerezo cye gitandukanye n’icya bagenzi be.

Yavuze ku bijyanye no kumenya niba amasezerano y’inyongera yo ku wa 23 Mutarama 2015 ashamikiye ku masezerano y’isoko No 02/F/2014-03-28-N/K.O.D.U/ urukiko rwagaragaje ko atavugisha ukuri, hakwiye kuba hagaragajwe mu buryo budashidikanywaho ko ibiyikubiyemo bitavugisha ukuri.

Yavuze kandi ko n’ubwo ubushinjacyaha buvuga ko inyandiko yo ku wa 23 Mutarama 2015 ari impimbano kubera ko itavugisha ukuri, kuba abari bahagarariye KOADU bemera ko ari bo bayishyizeho imikono, igenzura rigaragaza ko hari imirimo y’inyongera yakozwe nk’uko yavuzweho.

Yavuze ko ibyo bivuze ko iyo nyandiko itagombye gufatwa nk’impimbano kuko ibiyivugwamo ari ukuri, cyane cyane ko ubushinjacyaha butashoboye kugaragaza ko imirimo y’inyongera yagaragajwe n’abo bagenagaciro itabayeho.

Uyu mucamanza kandi yanavuze ku nyandikomvugo y’inama yo ku wa 10 Kamena 2015, avuga ko imvugo z’abavuga ko inama itabaye zitagombye guhabwa agaciro, kuko ngo hari benshi bahuriza ku kuba yarabaye nubwo badahuriza ku mubare w’abayitabiriye, ibyo ngo bikaba byaterwa n’igihe kinini gishize ibaye.

Asanga abakwiye kuryozwa ibyo guhindura urutonde rw’abitabiriye inama, ari Rwango Jean Claude wemera ko ari we wahawe urwo rutonde ndetse na Hamuli Bahati Amri akaryozwa kuba nka noteri w’umurenge yaremeye ko abo banyamuryango basinyiye imbere ye kandi atari byo, kuko byagaragaye ko urwo rutonde ntaho ruhuriye n’inyandikomvugo y’inama.

KOADU ntiyanyuzwe byuzuye n’imikirize y’urubanza

Perezida wa Koperative Koadu, Musabyimana Nyarubisi Bertin, yavuze ko bishimira imyanzuro ariko ko bagiye kureba uko bajuririra ku birebana n’amafaranga kuko urukiko rutahaye agaciro ibimenyetso byatanzwe.

Ibi yabivuze kuko ku rundi ruhande hari amafaranga koperative yari ikomeje kwishyuzwa na sosiyete y’ubwubatsi ya KICOSECA Ltd, bo batemeraga bavuga ko akwiye kwishyuzwa abahoze bayobora koperative.

Sosiyete y’ubwubatsi ya King Constuction and service company limited amasezerano yagiranye na Koperative KOADU, yo kububakira ibagiro rya kijyambere, agizwe n’ibyiciro bibiri, ayo kurangiza imirimo y’ubwubatsi harimo uruzitiro [cloture] n’indi mirimo yo gusoza inyubako [travaux de finissage].

Urubanza rwatangiriye mu rukiko rw’ubucuruzi rwa Musanze, rutegeka ko Koperative KOADU igomba kwishyura 249 499 488 Frw, mu gihe bo bagiye mu rukiko bahakana umwenda bavuga ko ayo bemera ari miliyoni 55 Frw ziva mu masezerano ya mbere n’aya kabiri ukuyemo miliyoni 182 zishyuwe, urukiko rubaca indishyi za 9 730 480 Frw.

Koperative KOADU yahise ijurira Urukiko Rukuru rw’Ubucuruzi, rusuzumye ubujurire bwayo rusanga nta shingiro bufite, ruyitegeka kwishyura hongereyeho miliyoni 3 Frw z’inyungu mbonezamusaruro n’inyungu za banki.

Urukiko rw’ikirenga rwasuzumye ikirego cyihuse cyo kurangiza urubanza by’agateganyo, rwemeza ko ubujurire bwa Koperative KOADU nta shingiro bufite, rwemeza ko nta gihindutse ku mikirize y’urubanza rwaciwe n’Urukiko Rukuru rw’Ubucuruzi ku wa 28 Ugushyingo 2017.

Nyuma haje kurangirisha urubanza, hashakwa umuhesha w’inkiko icyo gihe bagiye kurangiza urubanza haje komite ya koperative isaba imishyikirano, ndetse yohereje abayobozi babo, muri iyo mishyikirano bumvikanye ko hahagarikwa cyamunara n’imanza bari bafitanye na rwiyemezamirimo zose Koperative KOADU yemera ideni ryose rya miliyoni 260.554968 Frw.

Inyandiko IGIHE ifitiye kopi igaragaza ko ubuyobozi bwa KOADU bwumvikanye n’ubwa KICOSECA Ltd, guhagarika Cyamunara, gusa ko abanyamategeko nibatumvikana ayo masezerano azata agaciro.

Muri ayo masezerano kandi KOADU yemeye guhagarika imanza yari ifite mu Rukiko rw’Ikirenga, impande zombi zisaba ko cyamunara yari iteganyiwe ku wa 13 Kamena 2018 itaba mu gihe koperative yakwishyura ku neza.

Byashyize kera ku wa 29 Nyakanga 2019, umuhesha w’inkiko w’umwuga abyukira ku ibagiro kujya guteza cyamunara nk’uko urukiko rwari rwarabyanzuye, ariko akumirwa n’abanyamuryango ba koperative bituma cyamunara itaba.

Ku ruhande wa KOADU, bo bavuga ko bagishyira amakosa yose ku buyobozi bwabanje, umuyobozi wa KOADU.

Kugeza ubu hari abahoze ari abayobozi b’iyi koperative bafunzwe bahamijwe gukoresha inyandiko mpimbano, kimwe na rwiyemezamirimo bakoranye, ndetse n’uwari noteri w’umurenge wa Rubavu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .