00:00:00 IGIHE NETWORK KN KINYARWANDA EN ENGLISH FR FRANCAIS

Abayobozi b’Umujyi wa Kigali bumvise ibibazo by’abawutuye

Yanditswe na Ntabareshya Jean de Dieu
Kuya 5 April 2022 saa 11:21
Yasuwe :

Abaturage b’Umujyi wa Kigali bagaragaje ibibangamiye iterambere ryabo birimo imitangire ya serivisi itanoze mu nzego z’ibanze, ikibazo cyo gutinda kubona imodoka ku bagenzi, ubujura n’ibindi.

Ibi bibazo byagarutsweho n’abaturage batuye hirya no hino mu Mujyi wa Kigali mu kiganiro cyabaye kuri uyu wa Gatatu tariki ya 5 Mata 2022 mu turere tuwugize hifashishijwe ikoranabuhanga, ryiswe ‘Smart Inteko’.

Abaturage bari bakurikiye iki kiganiro binyuze kuri Radio esheshatu zirimo Radio1, Isango Star, Radio Salus n’imbuga nkoranyambaga ku buryo babashije gutanga ibitekerezo byabo.

Ni ibiganiro byitabiriwe n’abayobozi b’Umujyi wa Kigali, Minisitiri w’Ubutegetsi bw’Igihugu, Gatabazi Jean Marie Vianney n’izindi nzego.

Yasabye abatuye Umujyi gukomeza kuyitegura no guharanira ikizatuma abazayitabira bisanga muri Kigali binyuze mu gukora ibibafasha mu buzima bwabo bwa buri munsi nko mu bucuruzi, mu ngendo, kugira isuku n’ibindi.

Umuyobozi w’Umujyi wa Kigali wungirije ushinzwe imibereho myiza y’abaturage n’iterambere, Urujeni Martine, yibukije abanyamujyi ko bari mu myiteguro y’ibikorwa byo kwibuka Jenoside yakorewe Abatutsi ku nshuro ya 28 abasaba kuzabyitabira hirindwa ikwirakwira ry’icyorezo cya Covid-19.

Minisitiri Gatabazi, yagaragaje ko gukoresha ikoranabuhanga biri muri gahunda nziza yo kugera ku baturage asaba abayobozi b’Umujyi wa Kigali guharanira gukemura ibibazo byabo nta rundi rwitwazo.

Ati “Icyo dushinzwe ni ugukora ibikorwa byose byafasha umuturage kugira ngo agire ubuzima bwiza tukibuka ko umukoresha wacu ari umuturage. Ibintu byose dukora bigomba kuba bishingiye ku muturage, ndagira ngo nibutse abayobozi ko ibyo biri mu nshingano nyamukuru.”

“Uzasanga umuturage amara icyumweru cyangwa ukwezi ari gushaka uko bamukemurira ibibazo, kudakemura ibyo bibazo biteza abaturage kuguma mu bukene, ishyari n’inzangano. Buri wese akemure ibibazo by’abaturage mu ifasi ye.”
Abaturage bavuze akari ku mutima

Nyuma yo guhabwa umwanya wo kubaza no gusangira ijambo abaturage bari bari mu bice biandukanye byo mu Mujyi wa Kigali bagarutse cyane ku bijyanye n’ibibazo bikunze kugaragara mu itangwa ry’ibyangombwa by’ubutaka bigitinda ndetse n’imirongo miremire ahategerwa imodoka zitwara aabagenzi mu buryo bwa rusange.

Umuyobozi w’Umujyi wa Kigali wungirije ushinzwe imiturire n’Ibikorwaremezo Mpabwanamuguru Merard, yagaragaje ko ibyangombwa byo kubaka bisigaye bitangwa hifashishijwe ikoranabuhanga binyuze ku rubuga rwashyizweho.

Yavuze ko nubwo usaba kubaka aba abisaba Umujyi wa Kigali ariko abiga imishinga baherereye mu turere.

Yakomeje ati “Twari dufite abakozi 29 ariko turateganya kugira abagera kuri 45 bakora mu bijyanye no gutanga impushya zo kubakwa kugira ngo babashe gufasha abaturage. Kuri ubu kubona icyangombwa cyo kubaka biri gukorwa kandi ntibiri kurenza iminsi 22.”

Ku birebana n’impushya zo gusana, kuvugurura no kubaka uruzitiro bitangirwa ku rwego rw’umurenge kandi ko bitarenza iminsi 15.

Ingendo rusange ziracyarimo ingorane

Dr Mpabwanamaguru yasobanuriye abaturage ko guhera mu 2013 sosiyete zitwara abantu ari eshatu nyamara abagenzi bakaba bariyongereye.

Yasobanuye ko covid-19 yasanze hari gahunda yo kuvugurura amasezerano yari asanzwe agenderwaho mu bwikorezi ariko bikomwa mu nkokora. Kuri ubu ibiganiro bigamije ayo mavugurura byaratangiye.

Yavuze ko hari gahunda yo kongera imodoka mu byerekezo bitandukanye bidafite izihagije ndetse no gushyiraho ibyerekezo bishya mu bice bya Birembo, Bweramvura n’ahandi.

Yasobanuye ko mu cyumweru gitaha hateganyijwe ibiganiro bizahuza Umujyi wa Kigali na Minisitiri w’Ibikorwaremezo hagamijwe gutanga umurongo uhamye kuri iki kibazo.

Ubujuru bw’abantu bitwaje intwaro gakondo burahangayikishije

Umuturage wo mu Karere ka Gasabo yabajije ku bijyanye n’ikibazo cy’ubujura bukomeje kugaragara muri ako Karere burimo n’ubukorwa n’abantu bitwaje intwaro gakondo.

Umuyobozi Nshingwabikorwa w’Akarere ka Gasabo, Umwali Pauline, yavuze ko hari abajura bamaze iminsi bateye by’umwihariko muri Gatsata ariko hashyizweho ingamba zirimo gukorana n’inzego z’umutekano hagamijwe gushakira hamwe igisubizo.

Yavuze kandi ko hari indi gahunda yo kuganira n’ubuyobozi bw’Akarere ka Rulindo kugira ngo bafatanye mu guhashya icyo kibazo cy’ubujura kuko ababukora barimo n’abava muri ako karere cyangwa abamaze kubukora bashobora kwihishayo.

Muri iyi nama kandi hagarutswe no ku myiteguro y’Inama izahuza abakuru b’ibihugu bikoresha ururimii rw’Icyongereza (CHOGM) iteganyijwe muri Kamena 2022 aho Dr Mpabwanamaguru yavuze ko imyiteguro igeze kure.

Abaturage bagaragaje bimwe mu bibazo bikibabangamiye
Abaturage bakurikiraniye iki kiganiro hirya no hino mu turere
Urujeni Martine yasabye abanyamujyi kwitabira ibikorwa byo kwibuka Jenoside yakorewe abatutsi ku nshuro ya 28
Dr Mpabwanamaguru yagaragaje ko bimwe mu bibazo bibangamiye abaturage biri gushakirwa igisubizo
Umuyobozi w'Umujyi wa Kigali, Rubingisa Pudence yasabye abaturage gukomeza gutanga ibitekerezo ku byazamura iterambere ryabo
Minisitiri Gatabazi yasabye abayobozi b'Umujyi wa Kigali guharanira gukemura ibibazo by'abaturage
Umwali Pauline yasobanuye ko ikibazo cy'ubujura cyahagurukiwe
Ibibazo by'imirongo idashira yo muri gare byagaragajwe nk'ikibazo ku iterambere ry'abaturage
Mu cyumba cy'Inama mu Mujyi wa Kigali hari hateraniye abayobozi b'inzego z'ibanze
Abayobozi batandukanye bitabiriye ibi biganiro

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .