Ku munsi wa nyuma mu Urukiko rw’Ikirenga: Prof Rugege ku rugendo rwe mu bucamanza, ikiruhuko n’ibindi (Video)

Yanditswe na Rabbi Malo Umucunguzi
Kuya 7 Ukuboza 2019 saa 12:31
Yasuwe :
0 0

Ku mugoroba wo kuri uyu wa Gatanu wari umunsi ukomeye kuri Prof Sam Rugege wari usoje manda ye y’imyaka umunani idashobora kongerwa. Hari nyuma yo kwitabira irahira rya Dr. Nteziryayo Faustin wamusimbuye nka Perezida w’Urukiko rw’Ikirenga, ariko ahitira mu biro ngo asoze imirimo ye, azi neza ko ku wa Mbere atazazindukana igishura cy’umukara cyangwa cy’umutuku bitewe na gahunda y’umunsi.

Ku wa 7 Ukuboza 2011 nibwo Perezida Paul Kagame yagize Prof Rugege Perezida w’Urukiko rw’Ikirenga, asimbuye Cyanzayire Aloysie wari usoje manda. Hari nyuma y’imyaka irindwi ari Visi Perezida w’Urukiko rw’Ikirenga.

Prof Rugege wamaze kugeza imyaka y’ikiruhuko cy’izabukuru, ubu ni umugabo wishimiye akazi yakoze mu myaka ishize, ushimangira ko agiye gufata umwanya wo kuruhuka, akaba hamwe n’umuryango we adategereje izindi nshingano.

Mu kiganiro cyihariye yagiranye na IGIHE, Prof Rugege yagarutse ku ngingo zitandukanye cyane cyane akazi yari amazemo imyaka hafi 16, akaba agasezeyemo mu cyubahiro.

IGIHE: Hashize imyaka igera kuri 16 muri mu nshingano nka Visi Perezida na Perezida w’Urukiko rw’Ikirenga. Uru rugendo rwari rumeze rute?

Prof Rugege: Ni urugendo rutari rworoshye, ngira ngo muzi ko nari nsanzwe ndi umwalimu muri kaminuza mu myaka myinshi, hanyuma nza kugirwa umucamanza w’uru rukiko. Nagombaga kubanza kumenyera ibyo guca imanza, nkabifatanya no gufatanya n’abandi kuyobora urukiko.

Ntabwo byari byoroshye ariko ngira ngo nabyigiyemo byinshi, nagiye menyera, ndumva ahanini nakwishimira ibyo twagezeho.

IGIHE :Ni ikihe gihe cyari kigoye kurusha ibindi nk’umukuru w’urwego rw’ubucamanza?

Prof Rugege: Tugitangira ngira ngo ubucamanza nibwo bwari bugitangira kwiyubaka nyuma y’amavugurura, uzi ko nyuma ya jenoside hari abacamanza bakeya kandi abenshi badafite impamyabumenyi mu mategeko, ariko aho itegeko nshinga rihindukiye mu 2003, habayeho ihame ry’uko abacamanza bose bagomba kuba abanyamwuga, kuba barize amategeko.

Nibwo twatangiye kuzanamo abacamanza benshi bato, bakiva muri kaminuza, ariko bagenda biga, bamenyera iby’ubucamanza. Rero twese twatangiriye kure, tugenda tuzamuka mu kumeyera umwuga w’ubucamanza.

Icyo twakwishimira ni uko nyuma y’imyaka hafi 16 urwego rw’ubucamanza rumaze rwiyubaka, rufite abacamanza bose bafite impamyabumenyi mu by’amategeko, abandi bafite izirenze imwe, bigaragara ko ari abanyamwuga koko.

Kandi ntabwo ari ibyo gusa ahubwo twakomeje guhugura no kwihugura ku bibazo bitandukanye by’amategeko bijyanye n’ibibazo biri mu muryango nyarwanda, bigatuma abacamanza bacu biyongera ubumenyi n’ubunararibonye mu guca imanza ku bibazo bitandukanye.

IGIHE : Hari imiryango n’abantu ku giti cyabo bakunze kunenga ubutabera bw’u Rwanda, bamwe bandikira Perezida ngo afungure abantu runaka kuko bafunzwe bitemewe n’amategeko. Mwagiye mubyakira mute?

Prof Rugege: Ibivugwa n’abari mu mahanga ntabwo byadukanze, ahubwo twashyize imbaraga mu kugaragaza ko ubutabera bw’u Rwanda bwigenga kandi bugendera ku mategeko, turi igihugu kigendera ku mategeko.

Tuzi ko hanze aho mu mahanga hari abantu batifuriza ibyiza u Rwanda, hari abahunze u Rwanda bamwe bakoze amarorerwa muri iki gihugu bakagenda bakwirakwiza ingengabitekerezo ya Jenoside, bafite n’inshuti zabo zibashyigikiye, bigatuma badashaka kubona ikintu cyiza ku Rwanda harimo n’ubutabera.

Ariko twe twifitiye icyizere ko ubutabera bw’u Rwanda buri ku musingi uhamye, ari ubucamanza bwigenga, butavugirwamo kandi biragaragarira mu byemezo bitandukanye tugenda tufata. Ibyo hanze ntabwo bidukanga, ahubwo ngirango nk’uko imyaka igenda yiyongera, hari ibihugu byinshi bitemeraga ubutabera bw’u Rwanda ariko bikagenda bibwemera, ari uko bibonye uko duca imanza.

Abenshi nk’abanyaburayi baza mu Rwanda kabareba uko dukora, bakabishima, bakagenda bakabivuga, ibihugu bimwe byangaga kohereza abakekwaho ibyaha bya Jenoside bitangira kubohereza. Ni ukuvuga ko no mu mahanga badufitiye icyizere, ko ubutabera bw’u Rwanda bumeze neza. Ibyo ariko ntibyabuza bamwe na bamwe gukomeza guharabika ibikorwa mu Rwanda, harimo n’ubucamanza.

IGIHE: Musoje inshingano z’imyaka umunani mukuriye urwego rw’ubucamanza. Ni ayahe marangamuttima mufite ubu?

Prof Rugege: Turishimira ko twashoboye gutanga umusanzu mu iterambere ry’igihugu, mu iterambere ry’urwego rw’ubutabera. Ntabwo twakwishima ko twageze kuri byinshi, ariko ibyo twakoze ibyo aribyo byose, byashoboye kujya muri iyo nzira y’iterambere ry’igihugu n’iterambere ry’ubutabera.

Nakwishimira ibyo nahigiye n’ibyo twakoze mu guteza imbere imitangire y’ubutabera, kwihutisha imanza, kurushaho kunoza uko ubutabera butangwa, ngira ngo ni ibyo kwishimira kandi twizeye ko bizakomeza. Twatanze umusanzu wacu ariko tuzi ko n’abandi bazakomerezaho.

IGIHE: Hari abantu bakomeje kurega leta ku mategeko amwe n’amwe bavuga ko anyuranyije n’itegeko nshinga. Biterwa n’iki?

Prof Rugege: Ni ikintu gikorwa mu bihugu byose, kureba ko amategeko ahuje n’ibiteganywa n’itegeko nshinga, ko ibikorwa bya guverinoma bikurikije amategeko, ko bitabangamiye uburenganzira bw’abaturage.

Umuturage rero yumva hari ikimubangamiye, afite uburenganzira bwo kuza mu rukiko akavuta ati “iri tegeko rinyuranyije n’uburenganzira bwanjye buteganywa n’Itegeko Nshinga.”

Amategeko aha Urukiko rw’Ikirenga ububasha bwo gusuzuma bene ibyo bibazo. Ndumva ari ibintu bitari bimenyerewe, ariko uko abantu bagenda bakangurirwa uburenganzira bwabo, bakamenya ko hari amategeko abaha uburenganzira bwo kuza mu rukiko gusobanuza ibisa n’aho bibabangamiye, batangiye kubukoresha.

IGIHE: Mwakunze kugaruka ku buryo bwo kugabanya igihe imanza zimara zitaracibwa. Waba ari umwe mu mikoro musigiye ubasimbuye?

Prof Rugege: Ndumva wenda [aseka] kuvugira abantu cyangwa kubabwira ibyo bagomba gukora... bagomba kuba nabo bafite icyerekezo cy’uko bakomeza guteza imbere ubutabera bwacu, ariko ngira ngo ntabwo ari bo gusa, ahubwo n’abanyarwanda muri rusange bakwifuza ko igihe ibibazo byabo bimara mu nkiko bitarakemurwa, cyagenda kigabanuka.

Ndumva ari ikintu buri wese yakwifuza, kandi ndahamya ko n’abadusimbuye nabo bazashyiramo imbaraga mu gukomeza gushaka uburyo imanza zimara kigabanuka. Uretse ko kwihutisha imanza ubwabyo ntabwo bihagije, ntiwagira intego yo kwihutisha imanza utarebye n’indi ntego yo kunoza imicire y’imanza.

IGIHE: Nyuma yo gusoza izi nshingano mwamaze gutekereza ikindi muzakora?

Prof Rugege: Iki ni igihe cyanjye cyo kuruhuka. Maze imyaka myinshi nkora, ubu ngeze mu myaka yo kuba naruhuka, ngatwaza gahoro. Ntabwo ntegereje ko bampa akandi kazi cyangwa nkaba nteganya kugira akandi kazi ka buri munsi nkora, ahubwo ndashaka kwitonda, nduhuke, hanyuma njye nkora utuntu buhoro buhoro, wenda nko gutanga ibiganiro, kwigisha, ibintu nk’ibyo bitagoye cyane.

IGIHE: Ntabwo uzakumbura aka kazi umazemo imyaka myinshi?

Prof Rugege : [Aseka] Nzajya ngakumbura, ndibwira ko nzakumbura guca imanza, urumva iyo uciye urubanza ukabona unyuzwe no kuba watanze ubutabera, biragushimisha nawe. Ntabwo bishimisha gusa uwatsinze urubanza, ahubwo wumva ko hari icyo wakoze cyiza ku baturage.

Rero icyo ngira ngo umuntu yavuga ko azagikumbura, kugira ngo umenye ngo watanze ubutabera. Ikindi navuga, ibiganiro na bagenzi banjye ku bibazo by’amategeko, nabyo ni ibintu byiza [nzakumbura], kubona muri gukemura ibibazo biri muri sosiyete, murimo gutanga umurongo bagenderaho, ibyo nabyo ni ibintu byiza umuntu yaba yaragizemo uruhare, nabyo nzabikumbura.

IGIHE: Imwe mu myanzuro yanyu ya nyuma mwafashe harimo kwirukana abacamanza bamwe ndetse bafungwa kubera ruswa. Ikibazo cya ruswa mu bucamanza musize kimeze gite?

Prof Rugege: Nk’uko mubizi igihugu cyose gifite intego yo kutihanganira ruswa, twese turashaka guca ruswa iyo ariyo yose mu muryango nyarwanda. Ariko ibyo ntiturabigeraho. Igihe tutarabigeraho rero tugomba gukomeza urugamba.

Kurwanya ruswa ni ikintu twakurikiraniraga hafi buri munsi, tukagira ibiganiro tugakangurira abaturage kuri za radio n’ahandi tubashishikariza kutugaragariza ababasaba ruswa, kandi nabo tubashishikariza ko batagomba kuyitanga kuko uburenganzira bahabwa n’amategeko ntibagomba kubutangira ikiguzi.

Ariko ntituragera aho dushaka. Dukora ibishoboka byose kugira ngo turwanye ruswa, ariko haracyari abantu badusubiza inyuma mu nzego zose. Ntabwo ari mu bucamanza gusa, hari mu gipolisi, hari mu bushinjacyaha, muri za minisiteri za leta, ruswa irahari nubwo idakabije, kandi u Rwanda ruzwi ku Isi hose ko rurwanya ruswa cyane kurusha henshi. Ariko urwo rugamba rugomba gukomeza.

IGIHE: Mu manza mwagiye muca wakunze kwifashisha ingero z’imanza z’ahandi n’abanyamategeko bakomeye bavuze kuri izo ngingo. Byabafataga igihe kingana iki gutegura umwanzuro w’urubanza?

Prof Rugege: Bidutwara igihe, ubundi tuba dufite ukwezi kugira ngo twige urubanza turuce, nibyo itegeko ridusaba kandi akenshi turabyubahiriza. Iby’ubushakashasti ku manza zaciwe mu bihugu bitandukanye turabikora, ahubwo ikibazo ni amikoro yo kuba twabona abadufasha.

Ubundi mu nkiko nkuru nk’izingizi, buri mucamanza yakabaye afite umwunganizi umukorera ubushakashatsi, ahandi bagira abarenze umwe. Ariko kubera amikoro make, u Rwanda ruracyiyubaka, ntituragira abadufasha bahagije mu bucamanza, cyane cyane ab’Urukiko rw’Ubujurire n’Urukiko rw’Ikirenga.

Naho ubundi ubushakashatsi ku buryo imanza zicibwa mu bindi bihugu burafasha cyane, [abantu] bumva ko ikibazo atari icy’umunyarwanda gusa, ari ikibazo bahura nacyo no mu bindi bihugu kandi bakaba barafashe umwanzuro uganisha uruhande rumwe cyangwa urundi.

Iyo tubikoze tureba aho biganisha, aho twahitamo hanogeye abanyarwanda. Ntabwo twafata imanza zo hanze ngo tuvuge ko tugomba kuzikurikiza, ahubwo tuzisoma ngo turebe ko hari igisubizo zaduha tutari twatekereje cyangwa kitari mu mategeko yacu, tukaba twabyifashisha.

IGIHE: Wabasha kugereranya nk’ingano y’imanza waciye?

Prof Rugege: Ntabwo nabyibuka

IGIHE: Urwego rw’Ubucamanza usize ruhagaze gute?

Prof Rugege: Muri rusange ndabona urwego rw’ubucamanza ruhagaze neza, ndumva mfite ishema ry’ukuntu urwego rw’ubucamanza ruhagaze mu Rwanda, mfite ishema ku gihugu cyacu, kiratera imbere buri gihe, abantu baragishima kandi muri ibyo bashima harimo n’ubucamanza. Ibyo rero bikaba binshimisha.

Prof Sam Rugege aganira na IGIHE kuri uyu wa Gatanu
Pros Sam Rugege kuri uyu wa Gatanu yasoje inshingano nka Perezida w'urukiko rw'Ikirenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .