Kwamamaza

Uburengerazuba: Uko Perezida Kagame yesheje imihigo (Igice cya Kabiri)

Yanditswe kuya 10-11-2016 saa 08:45' na Cyprien Niyomwungeri


Intara y’Uburengerazuba ntiyasigaye inyuma mu zo Perezida Kagame yasuye akagenera abayituye impanuro ndetse akanabizeza ibikorwa birimo imihanda, ingomero z’amashanyarazi, inganda, inyubako n’ibindi kugira ngo iterambere ryabo rirusheho gusugira.

Iyi ntara yayoborwaga na Caritas Mukandasira uherutse gusimbuzwa Munyantwari Alphonse wayoboraga Amajyepfo, igizwe n’uturere turindwi aritwo Karongi, Ngororero, Nyabihu, Nyamasheke, Rubavu, Rusizi na Rutsiro.

Ifite ubuso burenga Kilometero kare 5.882, abaturage barenga miliyoni 2,476,942 batuye mu Mirenge 96 utugari 538 n’imidugudu 3612.

Hagati ya 2010-2016, Perezida Kagame yasuye ibice bitandukanye by’iyi ntara ndetse yemerera abaturage kubagezaho iby’ibanze mu iterambere nk’ibikorwa remezo by’amazi, amashanyarazi, amashuri, ibitaro n’ibindi baba bamugejejeho nk’ibyifuzo by’ibanze mu buzima bwabo bwa buri munsi.

Muri Werurwe ubwo Perezida Kagame yasuraga Akarere ka Rubavu

Karongi

Mu karere ka Karongi, Umukuru w’Igihugu yabemereye umuhanda Rubengera-Gisiza muri 2010 ukaba urimo gukorwa ubu. Uyu wiyongera kuwa Karongi-Birambo-Nyanza yemeye umwaka ushize uri hafi gukorwa na Minisiteri y’Ibikorwa remezo (Mininfra) binyuze mu kigo gishinzwe ubwikorezi (RTDA).

Abanyamabanga Nshingwabikorwa b’utugari bemerewe telefoni ngendanwa zigezweho na mudasobwa, mu 2015 barazihabwa.

Mu rwego rwo guteza imbere ubukerarugendo muri Karongi, Perezida Kagame umwaka ushize yabemereye gushaka abashoramari ba Hoteli y’inyenyeri eshanu, kugeza ubu baracyashakishwa n’Ikigo cy’Igihugu gishinzwe iterambere (RDB).

Mu rwego rwo guteza imbere ikoranabuhanga no koroshya itangwa ry’ibirego mu nkiko, yasabye ko inkiko zose zigezwaho umuyoboro mugari wa internet (Fiber Optic) muri 2013 ariko ntibirakorwa na Minisiteri y’Urubyiruko n’Ikoranabuhanga (MYICT).

Nyamasheke

Abaturage ba Nyamasheke na Karongi bishimira umuhanda mwiza wa kilometero 66 bahawe n’Umukuru w’Igihugu ubu ukaba ari nyabagendwa. Bishimira kandi ko mu mirenge yose hagejejwemo amashanyarazi hakaba hasigaye kuyakwirakwiza bikozwe n’Ikigo cy’Igihugu gishinzwe ingufu (REG).

Abaturage bajya kwivuriza ku bitaro bya Bushenga baravuga imyato icyo gikorwa cy’indashyikirwa bahawe na Perezida Kagame utibagiwe umuhanda wa kilometero eshatu ubafasha kugerayo neza bakivuza bagahorana ubuzima buzira umuze bityo bakiteza imbere.

Muri Nyamasheke hanatunganyijwe umuhanda ugana kuri Top View Hill Hotel Gisakura, hubakwa uruganda rutunganya ikawa yumye, hubakwa ishuri ry’ubumenyi ngiro, hongererwa ingufu umuyoboro wa internet ku bitaro bya Bushenge, hatangwa ibikoresho mu bitaro binyuranye, hanongererwa ingufu iminara ya RBA.

Ku rundi ruhande ariko hari ibikorwa bitaraboneka ahanini byemewe umwaka ushize, aha twavuga amacumbi y’abaganga agomba kubakwa n’akarere n’abikorera, umuhanda wa kaburimbo ugera kuri Kaminuza no ku bitaro bya Kibogora ufitwe mu nshingano na RTDA, gusa byose biri mu nzira zo kubakwa.

Rubavu

Mu mwaka wa 2010 Perezida Kagame yemereye abaturage b’Akarere ka Rubavu kububakira umuhanda Gisiza-Pfunda- Kivu Belt ureshya n’ibirometero 48, anabemerera imihanda mu mujyi wa Rubavu, ibi byose kugeza ubu birimo gukorwa na RTDA.

Umujyi wa Rubavu umaze gutera imbere mu buryo bugaragara
Abatuye Rubavu bishimira ibyiza Perezida Kagame amaze kubagezaho

Ngororero

Muri 2012, Perezida Kagame yemereye Akarere ka Ngororero inkunga yihariye itangwa muri gahunda ya Girinka, amaterasi, gukwirakwiza amashanyarazi n’imihanda, muri uwo mwaka kandi yemereye abaturage b’imirenge yose kubagezaho amashanyarazi, bikaba byarakozwe hasigaye kuyakwirakwiza.

Mu bijyanye n’imihanda Perezida Kagame yasabye ko hagurwa umuhanda Kabaya-Ramba-Kazabe muri 2012 ariko rwiyemezamirimo Usengimana Richard ananirwa kuwurangiza. Icyo gihe yanemeye imodoka itwara abagenzi muri uwo muhanda ntiyatangwa n’icyahoze ari Onatracom nubwo n’umuhanda yanyuzwamo utaruzura.

Kimwe no mu Karere ka Karongi, kugeza Umuyoboro wa Fiber Optic ku nkiko zo muri Ngororero bimaze imyaka itatu byemewe ariko ntibirakorwa na Minisiteri y’Urubyiruko n’Ikoranabuhanga yabihawe mu nshingano.

Nyabihu

Hashize imyaka ibiri Perezida Kagame yemereye abaturage bo mu Kagari ka Rurembo mu Murenge wa Rugera amazi meza ariko ntibirakorwa n’Ikigo gishinzwe amazi isuku n’isukura (WASAC). Ibi byiyongeraho Ishuri ry’Imyuga ryemewe muri 2014 ariko ritarubakwa na Minisiteri y’Uburezi binyuze mu kigo cy’Igihugu gishinzwe ubumenyingiro (WDA).

Muri 2014 kandi abaturage ba Nyabihu bemerewe n’Umukuru w’Igihugu kuzuza ikaragiro rya Mukamira birakorwa uretse ko hagishakwa rwiyemezamirimo wo kurikoreramo. Hari kandi no gukora imihanda y’ibitaka muri Gishwati bikorwa gahoro na Minisiteri y’Ubuhinzi n’Ubworozi (Minagri).

Rusizi

Ibikorwa byinshi Perezida Kagame yabyemereye aka karere muri 2013, gusa ibyinshi biri mu nzira zo kugana ku mosozo. Aha twavuga nk’uruganda rubyaza amashanyarazi Nyiramugengeri mu Murenge wa Nzahaha rwagombaga kubakwa na REG, kwagura igishanga cya Bugarama no kwimura abagituyemo byahawe Minagri, Minaloc n’akarere, kugeza amashanyarazi mu kirwa cya Ishywa byagombaga gukorwa na REG, gutunganya imihanda y’ibitaka ireshya na kilometero 25 mu kibaya cyaBugarama byagombaga gukorwa na Minagri n’akarere.

Hari kandi imihanda ya kaburimbo ireshya na kilometero 15 n’ishashemo amabuye ireshya na kilometero 15 biri mu nzira zo gukorwa na RTDA, kubonera Kaminuza y’u Rwanda ishami rya Rusizi aho gukorera bifitwe mu nshingano na MINEDUC, UR, n’Akarere. Hari ukugeza no gukwirakwiza amashanyarazi mu Murenge wa Bweyeye bifitwe na MININFRA, REG n’akarere, kubaka ibyambu n’aho bakorera amato mu kiyaga cya Kivu byahawe RTDA n’akarere no kubaka umupaka wa Bweyeye n’u Burundi byagombaga gukorwa n’ibiro bishinzwe abinjira n’abasohoka.

Icyakora umuhanda Bugarama-Cimerwa wo warubatswe uruzura, hagurwa ikibuga cy’indege cya Kamembe, hagabanyijwe ibiciro byo kugendera mu ndege yerekeza cyangwa iva Rusizi ndetse n’abasheshakanguhe bo mu Murenge wa Gikundamvura bahabwa imodoka bemerewe.

Mu bindi bitarakorwa harimo ubwato bunini bw’abaturage ba Nkombo bwo kunganira ubwo bahawe bwagombaga gutangwa na RTDA ariko butaraboneka, kwimura gereza ya Rusizi no kongera amahoteli.

Rutsiro

Mu Karere ka Rutsiro umwaka ushize Perezida Kagame yemereye abaturage umuhanda wa kaburimbo uva Gisiza kugera ku bitaro bya Murunda no gukwirakwiza amashanyarazi mu murenge wa Nyabirasi nabyo bikiri mu nzira zo gukorwa.

Mu Ntara y’Iburengerazuba ibikorwa Perezida Kagame yemereye abaturage byakozwe n’inzego zirebwa mu buryo bushimishije, icyakora iyo ugeze mu Karere ka Rusizi usanga hari ibitarashyirwa mu bikorwa n’abo byahawe mu nshingano.

Inkuru bifitanye isano: ​​

- Amajyepfo: Uko Perezida Kagame yesheje imihigo (Igice cya Mbere)

- Umujyi wa Rubavu mu mafoto

Abaturage ba Rubavu bishimiye iterambere bamaze kugeraho
Mu kiyaga cya Kivu, ubwato bwifashishwa mu bikorwa binyuranye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved