Kwamamaza

​​Amajyepfo: Uko Perezida Kagame yesheje imihigo (Igice cya Mbere)

Yanditswe kuya 28-09-2016 saa 15:34' na Cyprien Niyomwungeri


Ni kenshi Perezida Kagame asura abaturage hirya no hino mu gihugu akabagezaho impanuro nyuma akabaha n’umwanya wo kubaza ibibazo, gutanga ibitekerezo, gushima ibyagezweho no gutanga ibyifuzo byabo kugira ngo iterambere rikomeze kubasakaraho.

Ibikorwa binini birimo imihanda, ingomero z’amashanyarazi, inganda, inyubako n’ibindi ni bimwe mu byo Umukuru w’Igihugu akunda kwemerera abaturage aho aba yabasuye.

Uyu mugisha ntiwasize Intara y’Amajyepfo igizwe n’uturere umunani: Kamonyi, Muhanga, Nyanza, Ruhango, Huye, Gisagara, Nyamagabe na Nyaruguru, imirenge 101, utugari 532 n’imidugudu 3502 ituwe n’abaturage 2,589,975 ku buso bungana na kilometero kare 5701.

Mu bihe bitandukanye Umukuru w’Igihugu yasuye Intara y’Amajyepfo ndetse yemerera abaturage kubagezaho iby’ibanze mu iterambere nk’ibikorwa remezo by’amazi, amashanyarazi, amashuri, ibitaro n’ibindi baba bamugejejeho nk’ibyifuzo by’ibanze mu buzima bwabo bwa buri munsi.

Nkuko Guverineri w’Intara y’Amajyepfo, Alphonse Munyantwari yabibwiye IGIHE, abaturage b’iyi ntara barishimira ko Imvugo ya Perezida Kagame ariyo ngiro kuko mu masezerano 28 yabahaye agera kuri 24 yabashije gushyirwa mu bikorwa andi agera kuri ane akaba agitegerejwe kandi nayo ngo hari icyizere.

Yagize ati “Ibikorwa yatwemereye ibirenga 95% byarakozwe kandi abaturage batangiye kubibyaza umusaruro. Ibitarakorwa nabyo dufite icyizere ko vuba bizaba byarangiye.”

Perezida Kagame ubwo yasuraga Akarere ka Huye muri Mata 2015

Ibikorwa Perezida Kagame yemereye Amajyepfo

Huye

Perezida Kagame yemereye Akarere ka Huye kububakira Sitade, yaruzuye ndetse yanabereyeho imikino ya nyuma y’igikombe cya Afurika gihuza abakinnyi bakina imbere mu bihugu byabo ‘CHAN’ cyabaye muri Gashyantare uyu mwaka.

Yabemereye kandi imihanda mu Mujyi wa Huye, iya Kaburimbo ireshya na Kilometero 9.3 n’iy’amabuye ireshya na kilometero 10. Guverineri Munyantwari yemeza ko yose yuzuye ndetse no kongera ikawa ya Maraba ikagera kuri hegitari 2000 byakozwe hagahingwa izigera ku 1700.

Stade ya Huye yaruzuye ndetse inakira imikino ya CHAN

Nyamagabe

Perezida Kagame yemereye abaturage ishwagara yo guhingisha kubera ubusharire bw’ubutaka bw’aka karere, iyi yaratanzwe kuva umwaka ushize kandi ni gahunda izakomeza.

Yemeye amashanyarazi muri Cyanika yatanzwe ku buryo byatumye Nyamagabe isigarana imirenge ibiri gusa itarabona amashanyarazi. Imirenge yo mu Burasirazuba bwa Nyamagabe yemerewe gukorerwa amaterasi, guhabwa ifumbire, imbuto n’inka mu bufasha budasanzwe.

Guverineri Munyantwari akomeza avuga ko hari ishuri ryo muri Tare ababyeyi bifuzaga ko ricumbikira abana, Perezida Kagame akabibemerera none inyubako zaryo zikaba zaruzuye ku buryo umwaka utaha zizatangira gukoreshwa.

Gisagara

Mu karere ka Gisagara Perezida Kagame yemereye abaturage gutunganyirizwa ibishanga ngo bongere umusaruro w’umuceri. Igishanga cya Mirayi hatunganyijwe hegitari 150, Musha na Gikonko hatunganywa hegitari 104 naho Cyiri hatunganywa hegitari 200.

Imirenge ya Gikonko na Mpamba yemerewe amashanyarazi none ubu aramurikirwa.

Muhanga

Perezida Kagame yemereye abaturage b’Akarere ka Muhanga kububakira umuhanda wa kaburimbo uva mu Mujyi-Stade. Uyu uri gukorwa uzarangira muri uyu mwaka w’ingengo y’imari.

Umuhanda wa Mbuga-Mpimbi –Burerabana ungana na kilometero 34 ugeze kuri 70% ukorwa naho ishuri ry’imyuga TVET rya Kiyumba muri Ndiza ugiye gutangira kubakwa mu Ukwakira uyu mwaka.

Ruhango

Mu Karere ka Ruhango, Perezida Kagame yabemereye uruganda rwa Kinazi rusya imyumbati, ibitaro bya Kinazi biri ku rwego rw’intara ( Provincial Hospital) none byose ubu byaruzuye.

Umuhanda uva Ruhango-Kinazi- Butaro ungana na Kilometero 52 ugeze kuri 75% wubakwa, amashanyarazi muri Mwendo, Mbuye na Kinihira n’amazi muri Mbuye nabyo byaratanzwe.

Nyanza

Guverineri Munyantwari avuga ko umuhanda ureshya na kilometero 40 uva Nyanza ujya Nyamagabe ugeze kuri 60% wubakwa, kongerera ubushobozi ikaragiro rya Nyanza imashini zaratumijwe zizagera mu Rwanda mu Ugushyingo uyu mwaka.

Hari kandi no kuvugurura ibitaro hakajyamo inzu yo kubyariramo n’izindi nyubako za ngombwa bigeze ku kigero cya 85%.

Mu Karere ka Nyanza ariko hari ibitarakorwa nk’umuhanda Ngoma –Nyanza, Stade ya Nyanza bishobora gutangira umwaka utaha kuko Minisiteri y’ibikorwa remezo n’ikigo cy’Igihugu gishinzwe ubwikorezi byatangaje ko amafaranga yabonetse.

Hafi ya hose mu Karere ka Nyanza hashyizwe amatara yo ku mihanda nk'umwe mu mihigo wari wiyemejwe

Nyaruguru

Mu Karere ka Nyaruguru, Perezida Kagame yemereye abaturage kubaha ishwagara, inka, n’amaterasi mu nkunga yihariye. Guverineri Munyantwari avuga ko guhera umwaka ushize byakozwe kandi bizakomeza.

Ku rundi ruhande ariko avuga ko umuhanda Huye- Kibeho-Munini ufitwe mu nshingano n’Ikigo cy’Igihugu cy’ubwikorezi (RTDA), utaratangira kubakwa kandi Umukuru w’Igihugu yarawemeye muri 2013.

RTDA ivuga ko muri Kamena 2017 uzatangira kubakwa, bityo ukazaba watangiye gukoreshwa mu mpera za 2019.

Kamonyi

Perezida Kagame yemereye Akarere ka Kamonyi kugeza umuyoboro wa Fibre Optique ku rukiko rw’ibanze kandi byarakozwe.

Mu mpera z’umwaka ushize Komisiyo y’iterambere ry’ubukungu n’imari mu Nteko Ishinga Amategeko umutwe wa Sena, yatangaje ko ibikorwa byose Perezida Kagame yemereye abaturage bimaze gukorwa ku kigero cya 80%, ariko n’ibisigaye manda ye izarangira mu 2017, izasiga byaratangiye kubakwa.

Gusa hari impungenge ko ibikorwa remezo birimo Ikibuga cy’Indege cya Bugesera, ikibuga cy’indege kigomba kubakwa mu Karere ka Musanze, umuhanda uhuza Uturere twa Ngoma, Bugesera na Nyanza, na Sitade ya Gahanga byaba bitararangira kuko ntibiratangira kubakwa.

Perezida Kagame yitegereza inyubako zitandukanye zirimo gare nshya ya Huye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved