Byinshi ku rurimi rw’Ikirashi n’uko ruvugwa mu Karere ka Kirehe

Yanditswe na Hakizimana Jean Paul
Kuya 22 Gashyantare 2020 saa 10:05
Yasuwe :
0 0

Ikirashi ni ururimi shami rw’Ikinyarwanda ruvugwa n’abaturage bitwa ‘Abarashi’ batuye mu Karere ka Kirehe, mu mirenge ya Mpanga na Nasho, ahahoze ari mu Gisaka.

Ni ururimi rujya gusa neza n’Ikinyankole, Igihaya n’Ikinyambo nka zimwe mu ndimi zikoreshwa muri Uganda na Tanzania.

Abarukoresha bafite agahinda baterwa n’uko abato batagishaka kurumenya ngo kuko ku ishuri batarukoresha bakibaza uburyo nibasaza ruzakendera bikabababaza.

IGIHE yaganiriye na bamwe mu barukoresha batubwira amagambo amwe n’amwe n’ibisobanuro byayo mu Kinyarwanda.

Gusuhuzanya mu Kirashi iyo ari mugitondo bakoresha ‘Murayire ge, haba hacyeye bagakoresha ‘ Aganda’ cyangwa ‘Musibire ge’ kubwira umuntu uti “ Amakuru ki uvuga Agandi shi, Mwiriwe mute bavuga Mwasiba kurungi.

Iyo ushaka kubwira umuntu uti ‘uvuye he’ bakoresha Waruga hi, muryoherwe ni Munuriwe.

Ibice by’umubiri nk’izuru ryitwa Enyindo, ukutwi ni ugutwi, irisho ni ijisho, urutoki rw’insina ni Engemu, amasaka yitwa umugusha, amashaza akitwa ubushaza, ibishyimbo byitwa ibiharage, ibitoki ni ibitiki, ihene ni Embuzi, inka ni Ente.

Mfashingabo Mathiew w’imyaka 54 usanzwe ari umukozi w’Akarere ka Kirehe ushinzwe ibihingwa Ngengabukungu ni umwe mu bavuka mu Kagari ka Kankobwa aho yakuze asanga ababyeyi be bakoresha Ikirashi cyane kuruta uko bakoresha ikinyarwanda.

Avuga ko ubwo yajyaga gutangira amashuri abanza byamutonze cyane bitewe n’uko atari azi ikinyarwanda bikajya bisaba abarimu kumufasha kumenya amwe mu magambo y’ikinyarwanda.

Asobanura ko uko imyaka yagiye yigira hejuru Ikirashi cyagiye gicika intege bitewe n’uko urubyiruko rwari kukimenyekanisha wasangaga rutinya kukivuga ngo bataruseka bagahitamo gukoresha ikinyarwanda.

Yasobanuye ko kandi uru rurimi rufite izindi ndimi gakondo zimeze nka rwo zikoreshwa no mu bindi bihugu nka Uganda na Tanzania.

Ati “Ubu ikirashi kivugwa cyane mu tugari twa Kankobwa na Nyakabungo duherereye mu Murenge wa Mpanga kikanavugwa muri Ntaruka na Gashiru mu Murenge wa Nasho. Ni uduce duto kuko abakivugaga benshi barashaje”.

Mfashingabo avuga ko abavuga ikirashi bagabanutse cyane bitewe n’uko abakivugaga benshi bashaje abandi bakivanga n’abandi banyarwanda bigatuma bareka kukivuga, agasaba leta gushaka uko bahuza abantu bakikivuga kigasigasirwa ku buryo kitazakendera.

Ishisha Venuste w’imyaka 60 uvuka mu Kagari ka Nyakabungo we avuga ko kuva akimenya ubwenge yasanze ababyeyi be bavuga ikirashi, avuga ko umuco w’abarashi ufite byinshi uhuriyeho n’abanyarwanda gusa bigatandukanywa n’utuntu duto.

Ati “Nk’iwacu kera iyo umwana yavukaga habagaho gusangira guhambaye bakakuzanira ibicuma by’inzoga mbere yuko umubyeyi yonsa umwana bwa mbere yabanzaga gucurura kuri ya nzoga. N’ubu abo duturanye mu ngo eshanu, esheshatu turabikora ndetse tugasangira nk’abarashi.”

Yakomeje agira ati “Twifuza ko hakwandikwa igitabo tukanoza ruriya rurimi rwacu kugira ngo ntiruzacike kuko abana bato ntabwo bakikivuga benshi bavuga ikinyarwanda gisanzwe. Abakobwa bacu benshi twabashyingiye abanyarwanda bituma bareka kugikoresha kigenda gikendera ariko hari abana bake bakivuga nubwo atari kinshi.”

Umunyamabanga wa leta muri Minisiteri y’urubyiruko n’umuco Bamporiki Edouard avuga ko abakoresha indimi shami bakwiye kwitabwaho ngo kuko indimi shami zibitse ubumwe bwa bene zo.

Avuga ko kuba indimi shami zo mu Rwanda abazikoresha banakoresha ikinyarwanda bikwiriye gufatwa nk’ubukungu.

Ati “Abakoresha ururimi shami rw’ikirashi twabashishikariza ko uyu muco bawukomeraho kuko ni umuco ubahuza wubaka ubumwe bwabo n’ubuvandimwe bwabo ntabwo ukwiye gucika tukanaboneraho kubaka uw’abanyarwanda bose ariko duhereye kuri wa muco wacu uduhuza.”

Kugeza ubu mu Rwanda habarirwa indimi shami zitandukanye nk’igikiga, ikigoyi, ikirera, amashi, ikirashi n’izindi nyinshi zitandukanye.

Ishisha Venuste w'imyaka 60 y'amavuko avuga ko ururimi rw'Ikirashi rukwiye gusigasirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .