00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda bazigishwa Ikinyarwanda gishya mu myaka ibiri

Yanditswe na

Deus Ntakirutimana

Kuya 31 Ukwakira 2014 saa 11:22
Yasuwe :

Inteko Nyarwanda y’ururimi n’umuco iratangaza ko imyandikire mishya y’Ikinyarwanda igamije kurwanya amagorane yajyaga agaragara muri uru rurimi, ubu hazajya handikwa ikivuzwe, mu myaka ibiri Abanyarwanda bakazaba bamaze kukigishwa.
Mu Igazeti ya Leta yasohotse tariki ya 8 Ukwakira 2014, Minisiteri y’Umuco na Siporo igaragaza imyandikire ihwitse y’Ikinyarwanda, ndetse bakagaragazwa zimwe mu mpinduka zakozwe ku myandikire y’uru rurimi ; izi mpinduka zigaragara mu ngingo ya 12, 13 n’ingingo ya 15. (...)

Inteko Nyarwanda y’ururimi n’umuco iratangaza ko imyandikire mishya y’Ikinyarwanda igamije kurwanya amagorane yajyaga agaragara muri uru rurimi, ubu hazajya handikwa ikivuzwe, mu myaka ibiri Abanyarwanda bakazaba bamaze kukigishwa.

Mu Igazeti ya Leta yasohotse tariki ya 8 Ukwakira 2014, Minisiteri y’Umuco na Siporo igaragaza imyandikire ihwitse y’Ikinyarwanda, ndetse bakagaragazwa zimwe mu mpinduka zakozwe ku myandikire y’uru rurimi ; izi mpinduka zigaragara mu ngingo ya 12, 13 n’ingingo ya 15.

Nyuma y’uko ibitangazamakuru bitandukanye mu Rwanda biyivumbuye byifashishije interineti, ubuyobozi bwagize uruhare muri iki gikorwa bwasobanuye impamvu n’ikigamijwe.

Mu kiganiro IGIHE yagiranye na Dr James Vuningoma, Umunyamabanga Nshingwabikorwa w’Inteko y’Ururimi n’Umuco (RALC), yasobanuye ko izi mpinduka zatewe n’ibyifuzo by’Abanyarwanda batanze kuva ubwo Minisiteri y’Uburezi mu Rwanda yayoborwaga na Nsekarije Aloys, gukomeza kuri Bagaragaza Thaddee na Mujawamariya Jeanne d’Arc.

Dr James Vuningoma uyobora Inteko y'Ururimi n'Umuco (RALC)

Dr Vuningoma yagize ati "Ni ibitekerezo byagiye bitangwa byaje kuvamo ibi bishya […]"

Zimwe mu ngorane zagiye zibaho muri uru rurimi ngo ni aho ukurikije uburyo bwa kera hari zimwe mu mvugo zagoranaga, ugasanga imivugire n’imyandikire bihabanye.

"Hari hamenyerewe uru rurimi mu buryo bwa kera, aho ururimi rwavugwaga bikagorana mu myandikire ariko noneho ubu byageze aho uko uvuga ijambo ari nako uzajya ubyandika bikakorohera kuruta sisiteme ya mbere. Hari bimwe n’ubwo abantu bari babimenyereye ariko bikagaragara ko biteza ikibazo mu rurimi, mu myandikire byatumye Ikinyarwanda kiva muri ‘sisiteme morphologique’ kijya muri ‘phonologique’, uko ubyumva akaba ari ko ubyandika."

Iyi nteko ngo yatangiye kuvugurura ihereye ku myandikire, ariko ngo igiye gutangaza izi mpinduka mu mugaragaro. Kugeza ubu hatangiye gukorwa udutabo tw’ imfashanyigisho kuri izi mpinduka abantu baziyambaza, ariko hakazabaho ibisobanuro bizatangwa n’abahanga mu ndimi (linguists), bazanasobanura impamvu zatumye habaho izi mpinduka.

Abanyarwanda bafite imyaka ibiri yo kugira ngo bitoze iyo myandikire, aho bazava bagana mu myandikire ariko hanarebwa imivugire.

Hazabaho kandi ibiganiro n’amahugurwa, kugira ngo abantu bose bajye muri gahunda imwe y’ururimi. Ikindi ni uko hazaba hari n’inyandiko irambuye ibivuga isesengura uko ibi byagezweho n’impamvu byabaye ngombwa.

Abanyarwanda bakomeje kwibaza byinshi…

Mu nkuru ya mbere yakozwe na IGIHE, byagaragaye ko Abanyarwanda benshi batishimiye izi mpinduka bamwe bavuga ko Ikinyarwanda kigana ku misusire nk’iy’Ikinyamurenge.

Abazi isesengura bagaragaza impungenge zikomeye; urugero ni ijambo ‘intsinzi’ ryahindutse ‘insinzi’. Mu isesengura iri jambo rikomoka ku nshinga ‘gutsinda’. Ibi ni nabyo byatumaga mu ijambo intsinzi hagarukamo igihekane ‘ts’. Nyamara ubu cyavanywemo.

Usesenguye iri jambo ni i-n-tsind-yi, itegeko rikaba ko ‘d’ guteranyaho ‘y’ bibyara ‘z’ (d+y=z).

Ese ubu igihugu nticyahahombera?

Ibitabo bikomeye nka Bibiliya, inkoranyamagambo y’ururimi rw’Ikinyarwanda, Itegeko Nshinga n’ibindi bitabo byifashishwa mu nzego z’ubuyobozi nabyo bikurikije ubu buryo bigomba kuzahindurwa nk’uko byagiye bigenda mbere ubwo nk’igihekane cya ‘bw’ cyari ‘bg’.

Mu gushyira mu bikorwa iyi gahunda nshya hakwiriye kwitabazwa impuguke zitandukanye mu ndimi gakondo ariko kandi hakarebwa n’icyo izi mpinduka zishobora kwangiza; ibi bizakuraho amarangamutima ku mpande zose zirebwa n’iki kibazo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .