Ku wa Kabiri tariki 26 Ukuboza 2023, ni bwo Ruti Joël yakoze igitaramo cyitabiriwe n’abarenga ibihumbi bibiri muri Intare Arena i Rusororo.

Yabaye umuhanzi wa mbere utaririmba indirimbo zihimbaza Imana wujuje iyi nzu iherereye mu Murenge wa Rusororo mu Akarere ka Gasabo.

Ni igitaramo yise “Rumata wa Musomandera” cyo kwereka abakunzi be ubushobozi bwe binyuze mu bihangano yakoze harimo na album ‘Musomandera’

Bimwe mu byaranze igitaramo cya Ruti Joël

Isaha yari isaha muri iki gitaramo kuko umurishyo wa mbere wakomwe saa kumi n’ebyiri zirengaho iminota mike, Umukondo Gatore atangira gutanga ibyishimo.

Umukondo Gatore usanzwe ari umubyinnyi mu Itorero Ibihame by’Imana, yasusurukije abantu bazaga urusorongo.

Mike Kayihura ni we wakoreye mu ngata Umukondo Gatore, asusurutsa abitabiriye iki gitaramo mu ndirimbo zirimo ‘Anytime’; ‘Iminsi’; ‘Tuza’; n’izindi zakunzwe.

Mu minota isaga mirongo itatu, abari bari bitabiriye iki gitaramo bamufashije kuririmba zimwe muri izo ndirimbo ijambo ku rindi.

Saa Mbili zuzuye ni bwo Ruti Joël yuriye urubyiniro, yakirwa n’akamo k’abari baje kumureba atangirira ku ndirimbo ‘Rumata’ yashyize hanze mu 2021.

Ruti Joël wari wuzuye ibyishimo, yari yitwaje ababyinnyi barimo Jordan Kallas bafatanyije kuryohereza umugoroba abitabiriye igitaramo cye.

Ruti wakoze iki gitaramo mu byiciro bisaga bitanu, yakomereje ku ndirimbo ‘La Vie’; ageze kuri ‘Oulala’ kwifata biranga bamwe bamufasha kuyiririmba kugeza irangiye.

Mu byiciro bitandukanye uyu muhanzi yagendaga avanga indirimbo zigize album nshya ‘Musomandera’ ndetse n’izo yakoze mu myaka mike ishize.

Mu zindi ndirimbo yaririmbye zikazamura ibyiyumviro by’abari bitabiriye harimo ‘Nyambo’; ‘Rumuri w’Itabaza’; ‘Rwagasabo’; ‘Rasana’ yakoranye na Mike Kayihura.

Hari kandi ‘Ibihame’; ‘Gaju’; ‘Akadege’; ‘Amaliza’. Ubwo yari asoje iyi ndirimbo yahagurukije Intore Masamba asanzwe afata nka Se mu muziki.

Yahise atangira kuririmba ‘Musomandera’ yahimbiye Nyina umubyara, ikora ku marangamutima ya benshi mu bari bicaye muri Intare Arena.

Ruti yahagurukije umubyeyi we bafatanya kuririmba iyi ndirimbo yamwitiriwe. Banyujijemo barambura amaboko batangira guhamiriza.

Nyuma y’akaruhuko k’iminota mike, Ruti yagarutse ku rubyiniro yibuka inshuti ye Yvan Buravan binyuze mu ndirimbo yasize akoze zirimo ‘Twaje’

Ageze ku ndirimbo ‘VIP’ Buravan yasize akoranye na Ish Kevin, yatunguranye avuga ko amashusho yayo ari bwo agiye gushyirwa ahagaragara.

Yaririmbye kandi indirimbo zirimo Ye Aye ya Nyakwigendera Buravan, anyuzaho agace gato k’indirimbo ‘None Twaza’ ya Cecile Kayirebwa ndetse na ‘Igikobwa’ yahagurukije benshi.

Ruti Joël yapfundikiye igitaramo aririmba indirimbo ‘Cyane’ yakozwe na Producer X, ishyira akadomo ku masaha atatu n’Iminota 14 uyu muhanzi yamaze atarama.

Ubwo yari ku rubyinro, Ruti Joel yanyuzagamo akabyina zimwe mu mbyino zigezweho

Ruti Joel yataramiye abarenga ibihumbi bibiri bari baje mu gitaramo cye muri Intare Arena

Rumata wamamaye nka Ruti Joel yamaze amasaha atatu ku rubyiniro

'Nyambo' ni imwe mu ndirimbo zakiranywe ubwuzu bwinshi n'abitabiriye iki gitaramo

Mike Kayihura yinjiriye ku ndirimbo 'Anytime' imaze imyaka ibiri isohotse

Mike Kayihura yaririmbye indirimbo enye ze zakunzwe cyane

Mike Kayihura ni we muhanzi wa kabiri wageze ku rubyiniro

Saa Moya z'umugoroba abantu bari bamaze kuba benshi muri Intare Arena

Kesho Band niyo yafashije uyu musore kumara amasaha arenga atatu atarama

Indirimbo zigize album 'Musomandera' zishimiwe cyane muri iki gitaramo

Indirimbo 'Oulala' iri mu zishimiwe cyane muri iki gitaramo

Clement ubarizwa muri Kesho Band, yari iruhande rwa Ruti kuva atangiye kugeza asoje

Ubwo Ruti yari ageze ku ndirimbo Rumuri w'Itabaza yashyize hanze mu myaka itatu ishize, yeretswe urukundo rudasanzwe

Abari bari muri Intare Arena, bafashije Mike Kayihura gutarama muri iki gitaramo

Urubyiruko rwari mu biganje mu bitabiriye igitaramo cya Ruti

Ababyinnyi barimo Jordan Kallas bafashije Ruti Joel gutarama

Aha Ruti bamucaniraga amatara ya Telefone bamwereka urukundo bamufitiye

Umuhanzi Andy Bumuntu ni umwe mu baryohewe n'igitaramo cya Ruti

Ruti yakoze agashya ko kumara amasaha atatu n'iminota 14 atarama

Sandrine Isheja na Jules Sentore bari mu byamamare byaje gushyigikira Ruti Joël

Ruti Joël yahagurukije Masamba Intore bafatanya gusurutsa abitabiriye iki gitaramo

Amafoto: Kwizera Remy Moise