00:00:00 IGIHE NETWORK KN KINYARWANDA EN ENGLISH FR FRANCAIS

Bahunganye u Rwanda bararwimana mu nganzo: Ibyihariye muri filime Muyango n’Imitari

Yanditswe na IGIHE
Kuya 21 February 2022 saa 10:47
Yasuwe :

Mu byiciro bitandukanye by’abanyarwanda bavukiye cyangwa bagakurira mu buhunzi guhera mu myaka ya 1979, urubyiruko rw’u Rwanda rwari rumaze imyaka n’imyaka mu mahanga rwakoresheje ubushobozi bwose rwari rufite ngo rutahane ababyeyi mu gihugu birukanywemo n’ubutegetsi bubi.

Urwo rugamba urubyiruko rwarwanye harimo n’intwaro y’inganzo kugira ngo ibibazo Abanyarwanda bari barimo bimenyekane ku Isi.

Umunyamakuru wa IGIHE, Karirima A. Ngarambe aherutse gushyira hanze filime mbarankuru ‘Muyango n’Imitari’, ikubiyemo ubuhamya bw’abakoresheje inganzo n’umuco nyarwanda, mu gushyigikira urugamba rwo kubohora igihugu, bakabikorana ubwitange nta zindi nyungu bategereje uretse kugira urukundo rw’igihugu bakomokamo.

Mu myaka ya 1976 nibwo urubyiruko rw’Abanyarwanda rwari ruri hirya no hino ku Isi mu buhunzi, rwatangiye kwishyira hamwe, rushinga amatorero atandukanye yagize uruhare rukomeye mu guhuriza hamwe Abanyarwanda bari bafite ubushake bwo gutabara urwababyaye, bongera kwiyumvamo igihugu cyabo no kurushaho kugikunda binyuze mu gusigasira umuco wacyo.

Muri filime mbarankuru ‘Muyango n’Imitari’, Karirima Ngarambe Aimable yaganiriye n’umuhanzi Muyango Jean Marie, Julienne Gashugi na Faïna Numukobwa bari bahuriye mu itorero Imitari.

Baganiriye byimbitse ku muco nyarwanda, ku nyigisho n’ubutumwa biri mu bihangano byabo, uko bishatsemo imbaraga zo gushinga amatorero mu mahanga bakuriyemo nk’impunzi, guhanga indirimbo zakoze ku mitima ya benshi bikaba byarabaye impamvu yo kumenywa no gukundwa na batari bacye barimo Intwari Fred Gisa Rwigema.

Ku batazi ‘Imitari’, ni itorero ry’abakobwa b’abanyarwanda bishyize hamwe bagera kuri 12, ryatangiriye mu Bubiligi mu mwaka wa 1979. Bamwe bari batuye mu Bubiligi abandi bagenda bahabasanga baje kuhiga.

Muyango we ni Intore yatojwe na se umubyara Rwigenza na sekuru Butera bazwi cyane mu ngamba Inyanza mu Rukari. Hagati ya 1976-1978, Muyango yabaga mu Burundi nk’impunzi. Aho niho yinjiriye mu itorero ‘ lbihangange n’indashyikirwa’ ryari riyobowe n’Umutoza Sentore.

Muyango yaje gushinga itorero rye mu Burundi mu mwaka wa 1979-1983 aryita “Amariza n’Imanzi” aho yari anaribereye umutoza ariko akomeza no kuba umuririmbyi n’umuhimbyi.

Mu mpera z’umwaka wa 1985 mibwo yageze i Bruxelles mu Bubiligi gufasha Itorero ry’Imitari. Amaze kugera mu Bubiligi naho yahashinze Itorero ‘Ishyaka’ ryari rigizwe n’abarimo Mutsari Jean, Albert Rudatsimburwa Bryon, Ciza Muhirwa n’abandi.

Mu 1989 babonye igihembo cyitwa “Lauréat du Prix Découvertes de la Radio France Internationale” kubera indirimbo “Nzavuga yaje".

Aba bahanzi kuva mu buto bwabo kugeza uyu munsi bitangiye inganzo nyarwanda, kumenyekanisha umuco mu bato ndetse n’inshuti z’u Rwanda.

Mu nshuti z’u Rwanda Muyango yatoje itorero yise ‘Ibirezi’ ryari rigizwe n’abakobwa b’Ababiligi ndetse mu mwaka wa 2002 yabazanye gukorera ibitaramo bitandukanye mu Rwanda muri FESPAD (Festival Panafricain de la Danse).

Muyango n’Imitari bakoze ibitaramo byinshi bitandukanye mu Bihugu by’i Burayi na Afurika. Mu Rwanda ho ntibabashaga kuhataramira muri icyo gihe cy’ubuhunzi kuko Leta yari iriho itabemeraga ahubwo yagerageje kubarwanya yivuye inyuma nkuko babigarukaho muri filime mbarankuru.

Bagaragaza ko aho bajyaga gutaramira, ubutegetsi bwa Juvenal Habyarimana bukabimenya, byatezaga ibibazo kuko bafatwaga nk’abanzi.

Muri filime, Muyango n’Imitari bagaruka ku buryo bigeze gutaramira mu Bubiligi, uwari ambasaderi w’u Rwanda muri icyo gihugu akarakara ndetse agasaba kutazongera gutumira iryo torero.

ba bahanzi bagaruka kandi ku mateka n’inkomoko y’ibihangano byabo, nk’abahanzi bahanga bafite impamvu nkuko ubuhanzi bw’umwimerere bukwiriye kumera.

Muyango agaruka no ku Ntwari Fred Gisa Rwigema, umwe mu banyarwanda bari impunzi baje kumva ibihangano by’indirimbo za Muyango n’Imitari akifuza kuzahura nabo.

Baje guhurira mu Bubiligi, ababwira icyo abatekerezaho anabatumira muri Uganda mu rwego rwo kubashima no kubatera ingabo mu bitugu.

Kuri ubu Muyango ni Umutoza mukuru w’itorero rw’igihugu Urukerereza. Itorero ‘Imitari’ naryo riracyahari nubwo hashize igihe badatarama kubera ibihe by’icyorezo cya Covid-19.

Kurikira ikiganiro kirambuye muri iyi filime Mbarankuru iri mu Kinyarwanda, imara isaha n’iminota 40

Muyango Jean Marie, Mutsari Jean, Ciza Muhirwa na Albert Rudatsimburwa Bryon mu itorero Ishyaka hagati ya 1987- 1989 ubwo bari bari mu Bubiligi
Intwari Fred Gisa Rwigema (hagati) yashimye ibyakorwaga n'Itorero 'Imitari' abatumira muri Uganda
Ubwo intwari Gen Fred Gisa Rwigema aganira na Muyango ubwo yasuraga Imitari mu Bubiligi
Muyango Jean Marie (Hagati), Faïna Numukobwa (Ibumoso) na Julienne Gashugi ni bamwe muri 12 bari bagize Itorero 'Imitari'
Muyango ubu asigaye ari umutoza w'Itorero ry'Igihugu 'Urukerereza'
Iyi filime mbarankuru igaruka ku mateka ya Muyango n'Imitari mu buhanzi, uko igitekerezo cyo kwihuriza hamwe cyaje n'urugendo rw'ubuzima babayemo nyuma yo gushinga Itorero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .