“I Nyanza Twataramye” ni igitaramo ngarukamwaka kiba mu ijoro ribanziriza Umunsi mukuru w’Umuganura, kikabera mu Rukari mu Karere ka Nyanza.

Icy’uyu mwaka cyabaye ku nshuro ya gatandatu cyatangijwe n’umutambagiro w’abahanzi batandukanye n’abanyabufindo wahereye ahazwi nko ku Bigega ugana mu Rukari.

Iki gitaramo cyari cyitabiriwe n’abayobozi batandukanye ku rwego rw’Intara y’Amajyepfo na Minisitiri wa Siporo n’Umuco, Nyirasafari Espérance.

Mu byaranze “I Nyanza Twataramye” harimo imbyino, indirimbo gakondo n’indi mikino yitsa ku muco Nyarwanda by’umwihariko ibihe byarangaga Umuganura.

Abagize Urugaga rw’Ikinamico berekanye umukino witwa “Ibyiza by’u Rwanda” ukubiyemo ubutumwa butoza Abanyarwanda gukunda umuco wabo birinda gufata ibituruka mu mico mvamahanga bidahwitse nk’imyambarire, imvugo zidahwitse n’ibindi.

Itorero Urugangazi ryo mu Rukari ni ryo ryasusurukije abari aho mu mbyino ziryoheye ijisho. Ababeramuco barangajwe imbere na Mushabizi Jean Marie Vianney na bo bakoze mu mirya y’inanga bavuza icyembe n’ibindi bicurangisho gakondo.

Mu bandi bitabiriye iyi nkera barimo Ihuriro ry’abakora indirimbo gakondo, “Ishakwe” rihuriyemo Mavenge Soudi, Intore Tuyisenge, Jaba Star, Sofia Nzayisenga baririmbye indirimbo bakoreye umunsi w’umuganura.

Hari kandi Danny Vumbi ukunzwe mu ndirimbo ye yise “Abana babi” aho yasusurukije abari aho mu ndirimbo ze zo mu njyana Nyafurika zirimo “Ni Danger” yatumye benshi babyina, bongerwa kwizihirwa.

Usibye abahanzi b’indirimbo hanatumiwe abanyarwenya bari bahagarariwe na Japhet na 5K Etienne bo mu Itsinda rya Daymakers Entertainment. Aba basore bamamaye kubera imvugo yabaye ikimenyabose yiswe ‘Bigomba Guhinduka’ inganzo yabo yo gusetsa yanyuze benshi.

Mu butumwa bwabo bikije cyane ku gutanga ubutumwa bukangurira urubyiruko gusigasira umuco gakondo w’abakurambere.

“I Nyanza Twataramye” ni igitaramo ngarukamwaka kibera mu Rwanda, kimaze kuba ubukombe kandi gifite umwihariko wo kugaragaza no gusigasira umuco Nyarwanda.

Umusizi Maniraguha Carine yagaragaje impano yo kuvuga imivugo mu gitaramo I Nyanza Twataramye. Izina rye ryazamuwe n'igihembo yegukanye muri ArtRwanda-Ubuhanzi

Umukirigitananga Mushabizi n'itorero rye ntibatanzwe

Igitaramo I Nyanza Twaramye cyagaragarijwemo imbyino gakondo zitandukanye

Itorero Urugangazi ryerekanye ibirango by'umuco birimo n'inkangara

Minisitiri wa Siporo n'Umuco, Nyirasafari Espérance, yitabiriye igitaramo I Nyanza Twataramye

Abakaraza basukiranyije imirishyo y'urwunge

Abakiri bato berekanye impano zabo zitanga icyizere cy'umuco Nyarwanda mu bihe biri imbere

Umuhanzi Danny Vumbi yaririmbye indirimbo ze zikunzwe, benshi bagira akanyamuneza

Abanyarwenya Japhet na 5K Etienne ba Daymakers batanze ubutumwa binyuze muri Bigomba guhinduka

Abakirigitananga barimo Sofia Nzayisenga bakoze mu mirya baracuranga

Abana b'abahungu bafashije Danny Vumbi kubyina

Abanyamahanga bishimiye kwitabira igitaramo kigaragaza umuco Nyarwanda

Abagize itorero bari bateze amaboko bishushanya ubwiza bw'inka z'inyambo

Amatorero anyuranye yari yambariye gususurutsa ibirori

Amatorero abyina Kinyarwanda yiyerekanye muri iki gitaramo

Perezida w'Itorero ry'Igihugu, Bamporiki Edouard, yari ahari

Gusya amasaka byari mu mirimo yakorwaga n'abakobwa mu Rwanda rwo hambere

Umuyobozi w'Akarere ka Nyanza, Ntazinda Erasme, yavuze ko igitaramo kizakomeza gutegurwa

Umunyamabanga Nshingwabikorwa w'Inteko Nyarwanda y'Ururimi n'Umuco, Dr Vuningoma James, mu bitabiriye iki gitaramo

I Nyanza bataramye agati karaturika