"Rurasugiye" ni igitaramo cyabaye kuri uyu wa Gatandatu tariki 14 Mutaramo 2023 mu nyubako ya Kigali Convention Centre, yari yuzuye abarenga ibihumbi bine.

Ucyinjira ku marembo y’ahabereye igitaramo, wasanganirwaga n’imyenda ndetse n’inigi byahanzwe na Yvan Buravan.

Mbere gato y’uko igitaramo kigera ku musozo, ababyeyi b’uyu muhanzi bakomewe amashyi ubwo basabwaga kugana ku rubyiniro ngo bahabwe impano bateguriwe.

Impano bahawe ni umwenda uyu muhanzi bibarutse ku wa 27 Mata 1995 yari kuzaserukana muri iki gitaramo, none kibaye amaze amezi atanu yitabye Imana.

Yvan Buravan yitabye Imana amaze igihe yitozanya n’iri torero bategura igitaramo nk’iki, yari kuzahererwamo ikaze nk’umunyamuryango mushya.

Insakazamashusho zari muri Kigali Convention Centre zanyuzwagaho amashusho ya Yvan Buravan, yerekana ibihe bitandukanye uyu muhanzi yanyuzemo yitozanya n’Ibihame by’Imana.

Abagize iri torero bagize bati "Ibi bihe si twe twabihisemo ariko ni ko Imana yabishatse, umwenda Burabyo yamaze igihe kinini yitoreza ubutaruhuka kugira ngo awambare uyu munsi, nk’uko twari twarawumugeneye ndagira ngo tuwuhe ababyeyi bamubyaye kuko nibo batumye tumubona, turamugira nk’abanyarwanda."

Nyuma y’iri jambo, umuhanzi Ruti Joël yazamutse ku rubyiniro afatanya n’Ibihame by’Imana baririmbana indirimbo ya Yvan Buravan yise ‘Gusaakaara’ imaze umwaka isohotse kuri Album yise ‘Twaje’ .

Uko igitaramo cyagenze

Iki gitaramo cyatangijwe n’umutagara w’ingoma zavugijwe n’abasore b’ibigango.

Izi ngoma zakurikiwe n’umukino w’ibice bitatu birimo umuryango, itorero n’urugamba. Uyu mukino wakiniwe ku rubyiniro rwubatswe nk’urugo rwa Kinyarwanda, rufite imbuga ngari abana n’abakuru bidagaduriraho.

Aha niho Ibihame by’Imana byamurikiye umwimerere w’imbyino gakondo, uko ababyeyi bataramaga iyo babaga bafite bashyitsi, uko intore zihamiriza iyo zivuga ibigwi zivuye ku rugamba n’ibindi.

Umuhanzi Ruti Joël umwe mu bagize iri torero, yavuze ibigwi bya Buravan witabye Imana ku wa 17 Kanama 2022, ahishura ko ari umwe mu bagize uruhare rukomeye kuri Album amaze iminsi mike ashize hanze yise ‘Musomandera’.

Ubwo igitaramo cyari kigeze ku musozo, abasore bagize itorero Ibihame by’Imana nyuma y’umukino bakinnye bigaragaza nk’intore zivuye ku rugamba zitahukanye intsinzi, bahamagaye Bahizi Aimable, Igihangange Emery na Burigo Olivier batangije iri torero mu 2013, barabashimira cyane.

Aba bagabo bahawe inkoni y’ubushumba kugira ngo bakomeze bashumbe aba basore batoje umuco.

Iri torero ryasoje igitaramo rishimira abarenga ibihumbi bine bacyitabiriye dore ko imyanya yose yasi yashize, basabirwa umugisha ku Mana.

Umwe mu bagize iri torero yageze aho ava ku rubyiniro yegera n'abari inyuma abereka ibyo yatojwe

Umunyarwenya Rusine Patrick yari yaje gushyigikira itorero Ibihame by'Imana

Umutagara w'ingoma watangije iki gitaramo wanyuze benshi

Umuhanzi Iradukunda Yves wahisemo izina ry'umuziki rya 'Impakanizi'

Umuhanzi Andy Bumuntu na Sandrine Isheja bari mu bitabiriye iki gitaramo

Ruti Joel yaririmbye zimwe mu ndirimbo ziri kuri album ye ya mbere yise Musomandera

Ruti Joel ni umwe mu bagize itorero Ibihame by'Imana

Raissa, mushiki wa Yvan Buravan yari muri iki gitaramo

Producer Pastor P arimu bitabiriye iki gitaramo

Kwibyara gutera ababyeyi ineza! Ababyeyi ba Yvan Buravan bakomeje gushimirwa cyane ibikorwa bitandukanye umwana wabo yasize akoze

Intore Massamba yitegereza neza abana bari gutera ikirenge mu cye

Iki gitaramo cyari benshi mu bakunzi b'injyana gakondo

Iki gitaramo cyarimo abanyarwanda n'abanyamahanga bakunda umuco w'u Rwanda

Iki gitaramo cyanyuze benshi

Ibinezaneza byageze kuri benshi bari muri iki gitaramo

Ibihame by'Imana birimo abasore bato batojwe neza guhamiriza gitore

Ibihame by'Imana byagaragarijwe urukundo bikomeye

Bamurikiye abanyarwanda ibyo batojwe

Buri wese yakoze ibishoboka atahana amashusho y'urwibutso azahora amwibutsa ibi bihe

Amatike yari yashyizwe hanze muri iki gitaramo yose yaraguzwe, KCC irakubita iruzura

Akanyamuneza kari kuri buri wese wageze muri iki gitaramo

Ruti yagaragaje uburyo Buravan akiriho yamubaye hafi kuri album nshya 'Musomandera'

Akanyamuneza kari kose kuri Ruti Joel

Abato ntibakanzwe n'imyaka yabo, bagaragaje ibyo batojwe nta gihunga

Abato n'abakuru bari bitabiriye iki gitaramo

Abato n'abakuru banyuzwe n'ibikorwa beretswe n'Ibihame by'Imana

Abato n'abakuru bagaragaje urukundo bakunda imbyino gakondo

Abato bagaragaje ko iyo batojwe bakiri bato bakurana umuco

Abasore bato umunani bagize iri torero banyuze benshi

Abasore bagize iri torero biyerekanye nk'abavuye ku rugamba kandi batahukanye intsinzi

Abandimwe ba Burabyo Yvan bari muri iki gitaramo

Ababyeyi ba Yvan Buravan bashyikirizwa umwambaro uyu muhanzi yari kuzambara muri iki gitaramo

Aba basore bagaragaje ko batojwe n'abahanga mu mbyino gakondo

Ababyeyi ba Yvan Buravan bari baje gushyigikira iri torero Ibihame by'Imana

Ushaka kureba andi mafoto mensh wanyura hano

Amafoto: Shumbusho Djasiri