00:00:00 IGIHE NETWORK KN KINYARWANDA EN ENGLISH FR FRANCAIS

Umunyarwenya Michaël Sengazi yashyize hanze igitabo cye cya mbere

Yanditswe na Mahoro Vainqueur
Kuya 2 Ukwakira 2022 saa 02:32
Yasuwe :

Michaël Sengazi watangije iserukiramuco ry’urwenya “Caravane du rire” yamuritse igitabo cya mbere yanditse yise ‘Color my world’ kigamije gufasha abana kuguma ku muco wo gusoma ibitabo.

Uyu munyarwenya uri mu bakomeye muri Afurika cyane cyane mu bihugu bikoresha ururimi rw’Igifaransa, yavuze ko mu gihe cya Covid-19 ubwo ibitaramo byari bihagaze yabonye umwanya uhagije wo gusoza igitabo cye yari amaranye igihe kinini.

Mu kiganiro cyihariye yagiranye na IGIHE, uyu munyarwenya ufite igihembo cya “Prix RFI Talents du rire” yegukanye mu 2019, yavuze ko iki gitabo cyamutwaye imyaka itanu acyandika.

Ati“Kugira ngo kibashe gusohoka byantwaye imyaka itanu , nyuma yo kwandika igitekerezo nari mfite nashatse ikipe imfasha gushushanya inkuru nanditse. Mu 2021 ubwo twari mu bihe bya Covid-19 tudakora ibitaramo, nibwo nahisemo gusoza iki gitabo, mvugana na Imagine We bamfasha kugitunganya tugisoza mu 2022.”

Iki gitabo kigurishwa 10.000 Frw , kirimo inkuru ishushanyije yafasha abana kuguma ku muco wo gusoma bakareka kurarurwa na televiziyo n’amatatelefone byatwaye imitima ya benshi.

Ati “Ndashaka ko abana basubira ku muco wo gusoma aho kwirirwa kuri za televiziyo na za telefone n’ibindi, ababyeyi rero bagakwiye kukigura bakorohereza abana babo kwiyungura ubumenyi no kuguma ku muco wo gusoma ibitabo.”

Iki gitabo ‘Color my world’ kigaruka ku nkuru y’umwana w’ingagi ubara inkuru y’ubuzima abayemo mu rwego rwo kwigisha abana bakiri bato ibyerekeye inyamaswa.

Sengazi ati “Ibi bitabo ndi kwandika bizaba biri mu buryo bw’uruhererekane , iki cya mbere kivuga inkuru ushushanyije y’umwana w’ingagi avuga uko abayeho, uko iwabo bafata amafunguro , aho atuye , inshingano zo mu muryango iwabo, mu rwego rwo gutanga inyigisho ku byerekeye inyamaswa ku bana bato .”

Michaël Sengazi avuga ko kwandika igitabo atari ibintu bishya kuri we kuko nubwo ari umunyarwenya, asanzwe yandika imivugo.

Uyu munyarwenya yagiranye amasezerano na Imagine We Rwanda yo gucuruza iki gitabo.

Uyu munyarwenya uri mu bakomeye muri Afurika cyane cyane mu bihugu bikoresha ururimi rw’Igifaransa igitabo cye kigamije gufasha abana kuguma ku muco wo gusoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .