Iradukunda yashyize hanze igitabo gikubiyemo ubumenyi bwo kwibeshasho butaboneka mu mashuri

Yanditswe na Ferdinand Maniraguha
Kuya 25 Kanama 2020 saa 01:37
Yasuwe :
0 0

Umunyarwanda Iradukunda Richard yashyize hanze igitabo “What they don’t teach you in Schools’ gikubiyemo inama n’uburyo bwo kwiteza imbere mu buzima bitigishwa mu mashuri.

Iradukunda yavuze ko yanditse icyo gitabo agamije gufasha urubyiruko bagenzi be gutangira kureba kure bakiri bato, bakamenya icyo bakeneye mu buzima, ibyo bakora byose bakabikora muri uwo murongo.

Inganzo yo kwandka iki gitabo yazamutse ubwo yari mu Bushinwa aho yigaga icyiciro cya kabiri cya Kaminuza. Muri icyo gihugu nk’umunyeshuri wari wagiye kwiga, ntabwo yari yemerewe kujya gushaka akazi kuko atari cyo cyari cyamujyanye nyamara yari akeneye kubaho no gukemura utubazo yahuraga natwo mu buzima.

Byatumye afunguka amaso, atangira gutekereza ikindi yakora akajya abona amafaranga amubeshaho. Nibwo yatangiye gutekereza kubyo kujya afasha abanyarwanda bashaka kujya kurangura muri icyo gihugu, akaboherereza ibyo bakeneye batavuye aho bari.

Iradukunda yabwiye IGIHE ko byabanje kumugora kuko atari ibintu yari amenyereye gusa biza kugenda bihinduka gahoro gahoro arabimenyera. Ashingiye kuri ubwo buzima n’ibindi yagiye abona cyangwa abwirwa n’inshuti ze, byabaye isoko yo kwandika igitabo ngo gifashe urubyiruko.

Yagize ati “Niba umuntu arangije kwiga ariko ntabone ako kazi bimworoheye cyangwa nta kindi yakwikorera ku ruhande, hari ubundi bumenyi aba adafite kandi akeneye ashobora gukoresha mu buzima busanzwe. Iki gitabo kijya mu mizi kikaguha uburyo ushobora gukoresha wihangira imirimo bitewe n’ibihe urimo. Ntabwo kikugira inama gusa ahubwo kiguha n’aho wahera ugatera imbere.”

Iradukunda mu gitabo cye agaragaza ko igihe umuntu ahuye n’ibibazo, ari umwanya mwiza wo kubibyaza amahirwe.

Ati “Ibintu byinshi byagiye bikorwa kuri iyi isi, hari umuntu wagiye abikora ashaka gukemura ikibazo. Uwakoze imodoka ati nshaka ikintu cyantwara kure ntagiye n’amaguru ngo nanirwe. Ibibazo bizana n’amahirwe iyo uri umuntu uzi gutekereza.”

Ukurikije uko igitabo cyitwa, wakeka ko Iradukunda ari gushishikariza abantu kuva mu mashuri, icyakora siko we abibona ahubwo avuga ko abari mu ishuri bakwiriye gutekereza hakiri kare.

Ati “Abantu bagume mu mashuri ahubwo niba uri mu ishuri ugire intego, ntibibe kwiga gusa cyangwa kugira amanota meza ahubwo bibe kuvuga uti nshaka kwiga ibi, sinzategereze ko hari undi umbwira ngo ngwino nguhe akazi. Reka mbyige mbimemye hanyuma mbyikorere.”

Igitabo ‘What they don’t teach you in Schools’ Iradukunda yavuze ko vuba kiraba kiboneka mu nzu zigurishirizwamo ibitabo mu Rwanda, no ku maguriro y’ibitabo kuri Internet.

Iradukunda yavuze ko yanditse icyo gitabo agamije gufasha urubyiruko bagenzi be gutangira kureba kure bakiri bato
Iradukunda mu gitabo cye agaragaza ko igihe umuntu ahuye n’ibibazo, ari umwanya mwiza wo kubibyaza amahirwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .