Uko Umunsi w’Umuganura wizihijwe mu bice bitandukanye by’igihugu (Amafoto)

Yanditswe na Hakizimana Jean Paul, Mukwaya Olivier, N.Kubwimana Janvière
Kuya 2 Kanama 2019 saa 10:33
Yasuwe :
0 0

Kuva kera mu muco no mu mateka y’u Rwanda, Umuganura wari umunsi mukuru kandi wubahwaga, ugahabwa agaciro gakomeye i bwami no mu muryango Nyarwanda muri rusange.

Wari umunsi usobetse imihango n’imigenzo ikubiyemo byinshi bifite icyo bivuze gikomeye mu buzima bw’igihugu n’abagituye.

Umuganura watangiye kwizihizwa mu Rwanda ku Ngoma ya Gihanga Ngomijana mu kinyejana cya 11, uza kongera guhabwa imbaraga na Ruganzu II Ndoli (1510-1543) ubwo yabohoraga u Rwanda nyuma y’imyaka irenga 11 ruri mu maboko y’abanyamahanga (Abanyoro, Abanyabyinshi n’Abanyabungo).

Uyu munsi wizihizwa buri mwaka kuri uyu wa 2 Kanama 2019 wizihirijwe mu Karere ka Nyanza ku rwego rw’igihugu.

Mu butumwa bwa Minisitiri w’Intebe, Dr Ngirente Edouard, wari umushyitsi mukuru muri uwo muhango, yagaragaje ko Umuganura ari umwanya wo kwishima, gusubiza amaso inyuma no kwisuzuma, hagafatwa ingamba zo kunoza ibitaragenze neza kugira ngo tuzarusheho gutera imbere ejo hazaza.

Yagize ati “Mu kwizihiza Umuganura, turasabana, tugasangira ibyo twejeje ariko kandi tukanafata ingamba zo gukomeza gukora neza, kugira ngo tugere ku majyambere arambye duharanira kwishakamo ibisubizo no kwigira.”

Umunsi w’Umuganura kandi wizihijwe n’Abanyarwanda b’ingeri zose mu mfuruka enye z’igihugu n’Umujyi wa Kigali.

Abanyamakuru ba IGIHE bakorera mu ntara zitandukanye z’igihugu bakusanyije iby’ingenzi byaranze uyu munsi ufite amateka akomeye mu mibereho y’Abanyarwanda.

Ni umunsi waranzw no gusangira amafunguro n’ibyo kunywa bitandukanye byavuye mu byo abaturage bejeje.

-  I Rubavu bizihije Umuganura bibutswa gukomeza kwirinda Ebola

Mu Karere ka Rubavu mu Ntara y’Iburengerazuba, Umuganura wizihirijwe mu Kagari ka Buringo mu Murenge wa Bugeshi.

Umuyobozi w’Akarere ka Rubavu, Habyarimana Gilbert, yasabye abaturage kwirinda Ebola kuko ibyo bagezeho ihageze byaba impfabusa.

Yagize ati “Ndabasaba kujya musuhuzanya mudakoranyeho mu kwirinda Ebola kuko ni ibintu by’ibanze. Nubwo twizihiza umuganura twishimira ko ibirayi cyangwa ibigori byeze; turimo kwishimira ko umusaruro wagenze neza. Ebola iramutse igeze hano ibintu byose byaba impfabusa imihigo duhiga n’icyerecyezo dufite byose ntibyakunda n’iyo mpamvu buri muturage gukumira agomba kubifata nk’ibye.’’

-  Abaturage ba Burera baguze ibitanda bizagoboka abarwayi kwa muganga

Abaturage basaga 1500 bo mu Karere ka Burera n’abaturutse mu bindi bice by’Intara y’Amajyaruguru, Umunsi mukuru w’Umuganura bawizihije mu Murenge wa Kinyababa.

Mu kwishimira uyu munsi, abaturage bishatsemo ibisubizo bagura ibitanda 10 na matelas 10 bizifashishwa ku Kigo Nderabuzima cya Kinyababa.

Mu rwego rwo kwigira bishatsemo ibisubizo bakusanya miliyoni imwe n’ibihumbi 800 Frw yakoreshejwe mu kugoboka abarwariraga muri icyo kigo nderabuzima bakaryama hasi kuri matela zishaje.

Umuyobozi w’Akarere ka Burera, Uwambajemariya Florence, yasabye abaturage kwimakaza umuco wo guhigurira ku gihe.

Yagize ati “Umusi nk’uyu w’umuganura udufasha kuzirikana ibigwi mva rugamba ku byo twagezeho ariko ukaba n’umwanya w’imihigo njyarugamba. Muharanire ko umuco wo guhiga mugahigura uba muri mwe ariko mwibuke ko iterambere ryihuta ari uko dukoreye hamwe. Natwe tuzababa hafi aho muzadukenera.’’

-  Iburasirazuba basabwe gusigasira umuco nyarwanda

Umunsi w’Umuganura ku rwego rw’Intara y’Iburasirazuba wizihirijwe mu Karere ka Nyagatare mu Murenge wa Matimba. Witabiriwe na Guverineri Mufulukye Fred; Umuyobozi w’Akarere ka Nyagatare, Mushabe David Claudien n’Umuyobozi w’Ingabo mu turere twa Nyagatare, Gatsibo, Kayonza na Rwamagana, Col Rugambwa Albert.

Guverineri Mufulukye yashimiye abaturage bitabiriye uyu munsi abasaba gukomeza kugira umuco wo kwishimira ibyiza bagezeho kandi bakanakomera ku muco nyarwanda.

Yagize ati “Iyo turi aha ngaha tuba twasubiye ku isoko y’umuco wacu, byerekana ko tugihagaze ku muco w’igihugu ndetse tukigikunda, ikindi bitwereka ubumwe bwacu nk’Abanyarwanda.’’

Yavuze ko uyu munsi ukwiye gusigira Abanyarwanda gukunda iby’iwabo bakareka kwizirika ku gukunda umuco w’ahandi.

Mufulukye yanakomoje ku baturage bamwe batejeje imyaka ariko avuga ko hari bagenzi babo bagiye babagoboka bakabaha ibiribwa.

Ati “Hari nk’uturere tumwe, imirenge n’utugari byagiye bigira ibibazo by’izuba ariko tukagira imirenge imwe n’imwe yagiye ifasha ba baturage batejeje neza bakabaha ibyo kurya, turasaba abaturage gukomeza kugira uwo muco wo gusangira n’abandi batagize umusaruro mwiza kuko aribyo biranga umunyarwanda.”

Muhaya Simon utuye mu Kagari ka Matimba yavuze ko kuganura byari bikwiye bitewe nuko muri iki gihembwe babonye imvura imyaka yabo igakura neza.

Ati “Uyu mwaka imvura yagwiriye ku gihe itinda no guhita bituma ibishyimbo byacu byera neza, ikindi ntabwo izuba ryavuye cyane ku buryo umusaruro w’amata ugabanuka cyane, tumeze neza nubwo tutavuga ngo ni 100% ariko ntabwo dushonje.”

Mu mujyi wa Kigali, Umunsi w’Umuganura wabereye mu turere twose tuwugize aho abaturage bahuriye aho batuye basangira, baranasabana.

Ku rwego rw’Akarere ka Nyarugenge wabereye mu Murenge wa Mageragere, mu gikorwa cyitabiriwe n’Umuyobozi w’agateganyo w’Umujyi wa Kigali, Busabizwa Parfait.

Abitabiriye ibi birori muri uyu murenge kandi batashye ibiro by’Akagari ka Runzenze abaturage biyubakiye.

Umuganura wa 2019 wizihijwe mu nsanganyamatsiko ivuga ngo “Umuganura, isôoko y’ubumwe n’ishingiro ryo kwigira”. Biteganyijwe ko uzanizihirizwa mu mashuri yose yo mu Rwanda mu rwego rwo gutoza abana Umuco Nyarwanda bakiri bato.

-  Indi nkuru wasoma: Minisitiri w’Intebe Dr Ngirente yagaragaje ibyo Abanyarwanda bakwiye kwishimira ku munsi w’Umuganura (Amafoto na Video)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza