00:00:00 IGIHE NETWORK KN KINYARWANDA EN ENGLISH FR FRANCAIS

Amashirakinyoma ku butinganyi buvugwa ku rugerero rwo hambere

Yanditswe na Nsanzabera Jean de Dieu
Kuya 13 July 2022 saa 04:58
Yasuwe :

Uburenganzira bw’abaryamana bahuje ibitsina ni ingingo igezweho hirya no hino ku Isi ndetse ibihugu bimwe na bimwe bikize n’imiryango nterankunga, isigaye ibishyira mu bisabwa ngo byemere gufasha ibikennye.

Ni ingingo imaze igihe ivugwaho mu Rwanda nubwo akenshi igaragazwa nk’imvamahanga aho kuba ikibazo kireba igihugu kuko mu muco warwo ibyo bitabamo.

Nubwo uyu munsi aribwo iyi ngingo iri kuvugwaho cyane, si ubwa mbere igaragajwe mu Rwanda kuko mu myaka igera ku ijana ishize, ibirego byo kuryamana n’abo bahuje ibitsina byashinjwe umwami Yuhi V Musinga, ubwo Kiliziya Gatolika n’Ababiligi bakolonizaga u Rwanda, bari bari gushaka ikintu cyose cyatuma isura ye yangirika muri rubanda.

Binavugwa ko bishoboka ko ibyo bikorwa byabaga ahantu habaga hari abasore benshi bazahamara nk’igihe, nko ku Rugerero n’ahandi gusa nta bihamya na mba bigaragara.

Umwami Cyilima Rujugira ni we washyizeho agashya ko kurema ingerero ku nkiko z’u Rwanda n’ibindi bihugu mu rwego rwo gukumira ibitero babaga bakeka iyo byaturuka, urugerero rw’ingabo ziteguye kurasanira igihugu rwahanzwe ahasaga mu 1691.

Urugerero rwari politiki yo gukumira ibitero mvamahanga no kubimenya hakiri kare bitarasakara mu gihugu. Rwafashaga kurinda abaturage ngo badapfa cyane mu gihe hateye igitero gitunguranye, ndetse n’imitungo yabo ntiyangirike, bityo bakarwanira ku nkiko z’ibyo bihugu ari nako babakumira bababaganisha ku butaka bwa byo akaba ariho habera isibaniro.

Urugerero rwatumaga ingabo zifata iya mbere mu kumenya ko umwanzi yateye, mu gihe mbere abaturage aribo babwiraga ibwami ko umwanzi yinjiye ku butaka bw’igihugu.

Ukurikije uko amateka y’urugerero abitugaragariza, bigaragaraga ko urugerero rutahanganywe n’u Rwanda, ahubwo rwahanzwe u Rwanda rumaze imyaka isaga 600 (1109-1691) rubayeho. Ni yo mpamvu hari byinshi bidakwiye kwitirirwa urugerero byakozwe mbere n’abandi bami b’u Rwanda, kuko urugerero ari umwihariko w’umwami Cyilima Rujugira n’abami bamukurikiye.

Ingerero zabagaho zari ukubiri, urugerero rudahoraho rugizwe n’ingabo nyinshi, rwabagaho ari uko hari ibitero bagiye guhanganamo n’umwanzi ku nkiko ze n’u Rwanda.

Urwo rugerero nta gihe kigenwe rwamaraga, kereka iyo batsindaga umwanzi bakajya mu gitaramo mvarugamba. Abari kuri ubu bwoko bw’urugerero ni bo bashyirwaga ingishywa (ingemu zagemurirwaga abari ku rugerero) kuko babaga batazi igihe bazatabarukira. Hari igihe bamaraga igihe kirekire ku nkiko batarasakirana n’umwanzi, ngo banzike urugamba.

Habagaho n’urugerero ruhoraho ariko rugizwe n’ingabo nke zirirwaga ku nkiko z’ibihugu by’ibituranyi n’u Rwanda zizenguruka zireba ko hari uwavogera inkiko zarwo.

Nubwo urwo rugerero rwamaraga igihe kirekire, ariko kuko nta kazi gakomeye babaga bafite, ababaga baruriho barumaragaho igihe gito bagasimburwa. Igihe kirekire abari kuri uru rugerero barumaragaho ni iminsi umunani, ubundi bagasimburwa bagataha.

Dukurikije amateka y’urugerero, hari impamvu yatuma duhamya ko ubutinganyi butigeze bugera ku rugerero rw’ingabo z’u Rwanda.

Mu muco w’Abanyarwanda ubwawo, icyo kizira cy’ubutinganyi ntikigeze kihakandagira. Uretse abahora babivugisha umunwa gusa, ariko nta gihamya babifitiye.

Imiterere y’urugerero na yo iri mu bigaragaza ko iyo mico y’ubutinganyi itari gushoboka, kuko nta wajya gutingana imyambi n’amacumu amuvuzaho ubuhuha!

Kubera ko hari urugerero rwamaraga igihe kirekire ariko abaruriho bagasimburana mu gihe gito kitarenze iminsi umunani kandi na bwo birirwa bazenguruka bakenguza ngo barebe ko ari uwahirahira ngo avogere inkiko z’u Rwanda. Ntibigeraga babona umwanya wo kuba bajya muri izo ngeso.

Ingabo z’u Rwanda zari za kataryama, ntizagohekaga mu kurinda igihugu cyangwa ngo zikebakebe iyo zabaga zisumbirijwe n’umwanzi. Imitekerereze y’ihangabuhanga yaranze ingabo z’u Rwanda z’ubutarushwa n’ubutaneshwa ku rugamba, umutima wambariye gutsinda no kurinda ubusugire bw’igihugu, ntiyazihaga uburenganzira bwo kwijandika mu mico mibi nk’iyo y’ubutinganyi, yawe, haba no kugira akayihahiho kabyo, mu gihe zabaga ziri ku rugerero!

Ubutinganyi ntabwo bwashobokaga ku rugerero kuko uretse mu gihe cy'intambara, ababaga baruriho ntibarumaragaho igihe

Ibikubiye muri iyi nkuru ni isesengura n’ibitekerezo by’umwanditsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .