00:00:00 IGIHE NETWORK KN KINYARWANDA EN ENGLISH FR FRANCAIS

Ibiteye amatsiko ku ngeso yo gukunda abagore ivugwa ku Mwami Kigeli Rwabugili

Yanditswe na Nsanzabera Jean de Dieu
Kuya 26 April 2022 saa 01:03
Yasuwe :

Mu myaka 42 yamaze ku butegetsi, Umwami Kigeli Rwabugili yavuzweho byinshi birimo kuba umwami udatinya, ugaba ibitero kandi akabitsinda ariko ibyo bigwi ntibikunze gusigana no gukunda abagore yavuzweho kenshi.

Kubera ko Kigeli Rwabugili yagiraga ingoro nyinshi mu gihugu, byatumye anashakiramo abagore benshi kandi batandukanye bo kugenga izo ngo ngo banakire abazigana cyane cyane abazanye amaturo ibwami.

Umwami Rwabugili, yabaye umugabo uzi kumara amazimwe y’abagore b’abakeba babicaga bigacika muri ibyo bihe, aho yashyize mu byiciro bitandukanye abagore be uko bari20 ngo buri wese amenye icyiciro arimo, bityo mu gihe Rwabugili atakiza gutaramana na bo, batazabigiraho ikibazo kuko yakundaga kwibera mu mahanga agaba ibitero.

Ubundi umugore wese umwami yashakaga, yagombaga kumubona n’ubwo yabaga ari uw’undi mugabo, bakabyitaga gusumbakaza. Kugira ngo amwegukane, umwami yatangaga ibyo nyamugabo ashaka byose, ariko uwo mugore we ibwami bashimye bakamubona binyuze mu nzira zagenwe mu muhango w’ubukwe bwa Kinyarwanda.

Umwami yagiraga abagore be bwite, yashatse, yakoye, bakamwitirirwa. Impamvu nyamukuru yatumaga aba kera bashaka abagore benshi yari iyo kubyara abana benshi igihugu kikagira abazakirasanira bakanakirinda, kuko kugira abana benshi byabaga ari ishingiro ry’ubukungu n’ubuhangange bwa nyirawo.

Byanaterwaga kandi no gushaka abagore bazacunga imitungo umugabo yabaga yarashatse inyanyagiye hirya no hino mu gihugu. Kubera ko Rwabugili yagiraga ingoro nyinshi mu gihugu, byatumye ashaka abagore bo kuzibamo no kuzikenura, bakaba abagenga b’imitungo izirimo.

Igitabo “Intwari z’imbanza, zubatse u Rwanda rugahamya igitinyiro” cy’umusizi Nsanzabera Jean de Dieu, ngo Umwami Kigeli Rwabugili yari yarashatse abagore be ba mbere, ari mu kigero cy’imyaka 20 ahasaga mu wa 1860.

Abagore yashatse bwa mbere ni Nyiraburunga, Nyiramarora na Nyiramparaye, bose bari bene Nzirumbanje bakaba babyara be kuko bari abisengeneza ba nyina Nyirakigeli Murorunkwere.

Amaze kwima ingoma yashatse abandi bose bagera kuri 20. Yari yaragabanyijemo ibyiciro bitatu kandi byari bifite amazina ndangatandukaniro ahanini ashingiye ku cyubahiro bahabwaga ibwami, nuko bose bagabanya ingoro ze uko ari 38.

Abagore bakuru bitwaga Amagaju, bakabamo Nyiraburunga nyina wa Rutalindwa, Karara na Baryinyonza, Nyiramparaye nyina wa Muhigirwa, Nyiramarora nyina wa Kamarashavu na Berabose, Nyirandabaruta ba Sendilima w’umutsobekazi nyina wa Sharangabo, Nyambibi nyina wa Nshozamihigo, Muligo na Rwamahe na Kanjogera nyina wa Musinga na Munana.

Mu bagore bari mu cyiciro cya mbere kandi hari harimo Kagoyire ka Ruhezamihigo w’umumanukakazi nyina wa Karunganwa, Kangeyo ka Kanyabujinja batabyaranye, Nyirandilikirwa ya Sendilima, umutsobe na we batabyaranye, na Nyirabaziga na we batabyaranye.

Icyiciro cya kabiri cyari kirimo abagore ba Rwabugili bitwaga ‘Abaterambabazi’ barimo Nyambibi wa kabiri waje gusendwa, Mukaremera, Muserekande wa Nkanza bitaga Nyiragahumuza, Kumukera nyina wa Nyindo, Nyiranshongore wari muka Rubanguka rwa Kabaka akamumwaka, Murerwa wa Ngwije wari mu i Rango-Rugenge na Gatoyi ka Rubulika nyina wa Cyitatire wari muka Bicundamabano. Yari afite n’uwitwa Nturo, bavuga ko yari umutwakazi ariko ngo ari mwiza cyane.

Rwabugili yagiraga n’abagore b’imihango. Abo ni abo yarongoraga bakaba mu ngo z’imihango, bakabonana na Rwabugili azanywe no guterekera umukurambere wubakiwe urwo rugo, cyangwa aje kugenzura uko abaturage bo muri ako karere bayoboka.

Ikindi kandi, ni uko abo bagore b’imihango, bari bashinzwe no gucunga imitungo y’ibwami iri mu karere urwo rugo ruherereyemo. Birumvikana ko habaga hari abagaragu n’abaja b’ibwami nk’ab’ahandi hose habaga ingoro y’umwami.

Hari n’ubwo Rwabugili yagiraga uwo akumbura akamutumaho, undi akamusanga, atamukumbura akaguma aho kugeza ubwo iwabo bamusabye Rwabugili.

Iyo Rwabugili yemeraga kumubasubiza, bamushyingiraga ahandi, aho yari Rwabugili akaharongorera undi nk’uwo kuko n’ubwo izo ngo atazigeragamo kenshi, ari ko na none nta bwo hagombaga kubura umuntu wo kuhakenura no gucunga imitungo ihari.

Muri abo bagore b’imihango harimo nka Kabarere ka Shumbusho, mushiki wa Mugugu, Mucuma wa Rwampembwe, Nyambibi wa gatatu n’abandi.

Aba bagore basaga Makumyabiri (ababashije kumenyekana) Rwabugili babyaranye nabo abana cumi na barindwi barimo abahungu 13 n’abakobwa 4.

Mu myaka 42 Rwabugili yamaze ku ngoma, yashatse abagore bazwi basaga 20

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .