Gusura Ingoro y’urugamba rwo kubohora igihugu ku Mulindi byahagaritswe by’agateganyo

Yanditswe na Evariste Nsengimana
Kuya 9 Mutarama 2020 saa 02:14
Yasuwe :
0 0

Ikigo cy’Ingoro z’Umurage w’u Rwanda (INMR) cyatangaje ko gusura Ingoro ndangamateka y’urugamba rwo kubohora igihugu iherereye ku Mulindi byahagaritswe by’agateganyo kubera imirimo yo kuyivugurura irimo kuhakorerwa.

Ingoro ndangamateka yo kubohora igihugu iri ku Mulindi w’Intwari mu Ntara y’Amajyaruguru, Akarere ka Gicumbi, Umurenge wa Kaniga, Akagari ka Mukindi, Umudugudu wa Nyakabungo.

Itangazo INMR yanyujije kuri Twitter kuri uyu wa 9 Mutarama 2020 rivuga ko gusura iyi ngoro byahagaritswe by’agateganyo guhera ku wa 7 Mutarama 2020 kugeza undi munsi uzatangazwa.

Rigira riti “Ikigo cy’Ingoro z’Umurage w’u Rwanda kiramenyesha abantu bose ko kubera imirimo yo kubaka no gutunganya ingoro y’amateka y’urugamba rwo kubohora igihugu iherereye mu Karere ka Gicumbu ku Mulindi w’Intwari, iyi Ngoro idasurwa guhera ku wa 7 Mutarama 2020. Tuzabamenyesha igihe izafungurirwa.”

Iyi ngoro iherereye ahahoze ibiro bya FPR Inkotanyi, irimo n’indaki Perezida Paul Kagame yakoreshaga mu gutanga amabwiriza igihe yari ayoboye urugamba rwo kubohora igihugu hagati ya 1990-1994 .

Umuyobozi wa INMR, Masozera Robert aheruka gutangaza ko imirimo yo gusana ingoro ya Mulindi yari ikenewe kuko nta bice bifasha mu kumurika intambara y’urugamba rwo kubohora igihugu yari ifite.

Yagize ati “Yari ikeneye kongererwa ubushobozi kuko yari ikennye ibikorwa bifasha kumurika amateka kandi mu kuyubaka, tugomba kwizera ko dusigasira amateka y’urugamba rwo kubohora igihugu”

“Imirimo yo kubaka ibikorwa bifasha kumurika nirangiraa muri Kamena uyu mwaka izaba ari igicumbi cy’amateka yose y’urugamba rwo kubohora igihugu guhera mu mizi kugera irangiye kandi mu buryo bwimbitse.”

Masozera yasobanuye ko mu kwagura iyi ngoro hazongerwamo ibyumba byihariye byo kumurika ayo mateka bizaba bifite uburyo buyasobanura nka filimi mbarankuru ikoze mu majwi no mu mashusho.

Bizaba binarimo amakarita agaragaza inzira n’uburyo byifashishwaga mu kuyobora urugamba rwo kubohora igihugu, ibikoresho byifashishwaga mu rugamba n’ibindi bikoresho bisobanura ayo meteka byakozwe n’abahanga mu by’ubugeni.

Biteganyijwe ko nyuma yo kwagura iyi ngoro izaba ifite ubushobozi bwo kwakira abantu bari hagati y’ibihumbi 120-50 buri mwaka, ikinjiza arenga miliyoni 150Frw.

U Rwanda rufite ingoro umunani z’umurage w’u Rwanda ziherereye mu bice bitandukanye by’igihugu. Umwaka ushize Ikigo cy’Ingoro z’umurage w’u Rwanda cyagaragazaga ko ingoro ndangamurage zisurwa n’abantu 272 636, barimo Abanyarwanda 78%, zikinjiza miliyoni 310 643 966 Frw.

Indaki Perezida Kagame yabagamo mu gihe cy'urugamba rwo kubohora igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza