00:00:00 IGIHE NETWORK KN KINYARWANDA EN ENGLISH FR FRANCAIS

Uko u Rwanda rwo hambere rwiyubakiye inganda z’ibikoresho by’intambara zarufashaga guhangamura abanzi

Yanditswe na Nsanzabera Jean de Dieu
Kuya 28 August 2022 saa 08:15
Yasuwe :

Mu mateka, Abanyarwanda bamye ari indwanyi n’abakogoto b’umuheto mu buryo budasubirwaho ku buryo muri aka karere nta ngabo z’ibindi bihugu zapfaga kubisukira. Bari bafite ubuhanga bwo kwiremera imyitozo njyarugamba bakayitoza nta wundi bakeneye uyibatoza.

Iyo myitozo n’ubundi yagendanaga nuko babona imbogamizi zavuka mu rugamba bagiye kurwana, bitewe n’akarere bazarwaniramo.

Bitozaga imyitozo yo gusimbuka imikoki, kwiruka, kurasa kure, guhamya intego n’ibindi. Ibyo byose nta wabibatekerereje ngo abibagenere, ahubwo bari buje intekerezo zabafashaga guhangana n’urugamba rukomeye no kurema imyitozo ifatiye ku miterere y’aho bazarasanira.

Ubwo buhanga bwo kurwana, bwagendana no kugira ubuhanga bwo kurema ibikoresho by’intambara by’ingeri zitandukanye no kubicura, birimo amacumu, imyambi, imiheto, ingabo, inkota n’ibindi. Byose bikagira ingeri zitandukanye bitewe n’uko bashaka kuzitwara ku rugamba.

Hari nk’amacumu bateraga umwanzi ryamwinjiramo rikamutera ubumara buhita bumuhitana, hakaba n’amacumu bacuraga uwo bariteye kuryikuramo ntibishoboke kuko n’ubundi rihita rishishimura inyama zo mu nda.

U Rwanda rwagize amacuriro menshi yacurirwagamo amacumu yo kwagura u Rwanda, ayamenyekanye cyane ni atatu. Hari Uruganda rw’i Gacuriro rwari ruherereye mu Bwanacyambwe, ari nayo nkomoko y’iryo zina.

Kugeza ubu ni mu Kagali ka Gacuriro mu Murenge wa Kinyinya wo mu Karere ka Gasabo. Ni rumwe mu nganda za kera na kare, kuko rwahanzwe na Kigeli Mukobanya ahasaga mu wa 1378, ubwo yari amaze kwigarurira u Bwanacyanbwe bwa Nkuba ya Nyabakonjo.

Nubwo mbere ye habagaho ubucuzi bw’ibintu bitandukanye birimo n’intwaro zo ku rugamba, ariko byakorerwaga mu kajagari kuko buri wese mu bari bagize Abanyabyuma b’ibwami bari bakuriwe n’umwiru-mucuzi, babikoraga buri umwe ukwe bakazahuza ibyo bacuze nyuma babikuye mu baturage bari inzobere muri uwo mwuga.

Urundi ruganda ni urw’i Shang. Cyilima Rujugira yarushinze ahasaga mu wa 1694, aho rwari rwubatswe, kuri ubu niho habarizwa mu mudugudu wa Kabeza mu Kagali ka Shango mu Murenge wa Nduba mu Karere ka Gasabo hafi y’amashuri abanza ya Shango.

Urwo ruganda rwaje rwunganira urwa Mukobanya mu rwego rwo kugwiza ibikoresho byinshi by’intambara, kuko yabonaga ko u Rwanda rukomeje kugarizwa n’ibitero mvamahanga byinshi. Akaba yararushinze amaze kwagiriza igihugu bine byari byishyize hamwe ngo birimbure u Rwanda, ariko anashaka ko ruzamufasha kwegerezwa ibikoresho by’intambara yari agiye gushoza ku bihugu by’Iburasirazuba bw’u Rwanda, dore ko ari naho hari hasigaye ibihugu byinhi byari bitarigarurirwa.

Urundi ruganda ni urwo ku Ruganda rwubatswe ku ngoma ya Rwabugili ahasaga mu wa 1867, ubwo yari atangiye guhangana n’ibitero yagabaga mu bihugu by’Iburengerazuba bw’u Rwanda.Uru ruganda rwari ruri mu Kagali ka Ruganda mu Murenge wa Kamembe kuri ubu, ari naho gakura iryo zina, kuko hari uruganda rucurirwamo amacumu yo kwagura u Rwanda.

Muri icyo gihe, Rwabugili yimuye abacuzi bose baba bari mu ruganda rw’i Shango n’i Gacuriro, ngo bajye gucurira i Ruganda, kugira ngo we n’ingabo ze begerezwe ibikoresho by’intambara kuko icyerekezo cye cyari icyo guhangana n’ibihugu byaho byashakaga kwiyomora ku Rwanda ngo byigenge.

Mu ntwaro zamenyekanye zacurirwaga i Rwanda mu gukungahara ku bikoresho by’intambara, harimo imyambi, amacumu, ingabo n’imiheto. Ni ho kandi hakomeje kwamamazwa imiheto yitirirwaga ubukomere bwayo n’ibiti yaramvuwemo nk’imiheto y’ibihekane yari ikabije kurekera umwambi ukagera kure cyane kandi ikaramba, Imiheto y’Imikore bitaga Impangare, imiheto y’Imironko, imiheto y’Inkwaya, imiheto y’Urukurazo n’iyindi.

Imiheto yabangwaga mu biti bitandukanye, ariko bizwiho kunoga no kuramba, kenshi ikantirirwa ibiti yaramvuwemo.
Imiheto yagiraga umumaro iyo yabaga iri kumwe n’imyambi. Imyambi ni igikoresho cy’intambara bambikaga mu muheto, bagafora ubundi bakarasa umwanzi.

Bumwe mu bwoko bw’imyambi bifashishaga kurasa burimo iy’Ibishyoshyo, Imigano, Imigera, Impiru, Ingobe, Amabano, Urukurazo, Intanage, Ingorore, n’iyindi. Imyambi yabaga icuzwe mu byuma igakwikirwa mu biti.

Mu bwoko bw’amacumu yakorerwaga mu Rwanda harimo Injunga, Imitsakura, Amashongore, Iminembwe, Imitari, Amakuza, Iminega, Indekwe n’ayandi. Amacumu yabaga acuzwe mu cyuma kuva hasi kugera hejuru.

Habaga hakenewe n’ingabo zo gukinga amacumu n’imyambi by’umwanzi yabaga yohereje. Mu ngabo zitwazwaga mu gukinga imyambi y’umubisha, harimo ingabo y’Isuri, Urubega, Impenzi, Inkuku n’izindi.

Umunyarwanda wajyaga ku rugamba, yagombaga kuba yikwije ibi bikoresho byose, kugira ngo abashe guhangana n’umwanzi. Ikindi bagiraga nk’igikoresho cy’intambara, ni inkota yabafashaga guhorahoza umwanzi babaga bamaze kwica ariko atararekana.

Imiheto, imyambi n'amacumu biri mu bikoresho by'urugamba abanyarwanda bikoreraga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .