00:00:00 IGIHE NETWORK KN KINYARWANDA EN ENGLISH FR FRANCAIS

Uko gushyenga byakijije Binumbiri wari ugiye kumanikwa azira kwigomeka ibwami

Yanditswe na Nsanzabera Jean de Dieu
Kuya 26 Ukwakira 2022 saa 09:44
Yasuwe :

Mu bamikazi bakomeye kandi bari bafite ijambo rikomeye u Rwanda rwagize, Nyiramavugo Nyiramongi aza mu ba mbere.

Nubwo yatinywaga cyane, yigeze kwibasirwa n’umugabo Binumbiri bya Mukeke akoresheje amagambo y’ubusizi ubwo Nyiramavugo Nyiramongi nyina wa Rwogera rwa Gahindiro akaba n’umugore wa Gahindiro washakaga guhanaguraho ishusho byagaragaraga mu batoni ba Gahindiro wari umaze gutanga.

Binumbiri w’Umuzigaba yari umugaragu w’inkoramutima wa Rugaju rwa Mutimbo, yamamara mu mateka y’u Rwanda nkuko byanditswe na Kagiraneza Zifilini mu gitabo yise ‘Ibitaramo ku mateka y’u Rwanda’.

Igihe kimwe Umugabekazi Nyiramavugo Nyiramongi nyina w’umwami Mutara II Rwogera, yihaye umugambi w’igihe kirekire wo guhorera umugabo we Yuhi Gahindiro watanze bitunguranye, bigakekwa ko yarozwe n’abagaragu be b’inkoramutima barimo Rugaju rwa Mutimbo.

Benshi bagiye babohwa, baricwa abandi bacibwa mu gihugu. Rugaju rwa Mutimbo, ni we wabimburiye abandi guhorerwa Gahindiro, kuko bavugaga ko ari we wamuroze, agatanga amarabira.

Umuzigaba Binumbiri byaramubabaje yiyemeza guhangana n’ibwami arwanirira Rugaju rwa Mutimbo wari sebuja. Muri uko kurwanirira Rugaju rwa Mutimbo wari wafashwe ngo atangwe nyuma nawe baje kumuta muri yombi.

Icyo gihe Nyiramavugo Nyiramongi wari umugabekazi ku ngoma ya Rwogera, yabajije Binumbiri bya Mukeke ati “ Nyakunyagwa, icyatumye urwaninirira umugome nka Rugaju rwa Mutimbo ibwami batanze ni iki?".

Binumbiri bya Mukeke, ni ko gusubiza umugabekazi ati “Nyagasani Rugaju rwa Mutimbo yarampatse, arangabira, nari umutindi arankiza, ubwo rero nta kindi nari kumwitura usibye kumurasanaho. Niba ugira ngo ndakubeshya, na we nkiza, dore ko abami ari mwe mwikiriza, nyiramurira na we n’uterwa urebe ko ntazakurwanirira, nintakurasanira uzamenye ko data yabyaye imbwa.”

Umugabekazi ati “Ayo ni amatakirangoyi, cyo nibazane indera!". Binumbiri bya Mukeke yahise abona bazanye imigozi yo kumuboha, ahita agira ati “Yewe ubanza Rugaju rwa Mutimbo yarabarushaga guhaka koko, Ese ko yatumizaga indera bakazana inzoga z’i Murera, none mwe muzanye imigozi yo kumboha ( Indera ni injishi zaturukaga i Murera)”.

Nyiramavugo Nyiramongi yahise amubwira guceceka no gutera imbabazi, undi aho guceceka akomeza ati “Kurya na we wabuze umwanya wo kuboha Nyabitabo nk’abandi bakobwa bose, none ugiye kubingiyigiraho, agahinda urakimara”.

Nyabitabo iyo Binumbiri yavugaga ni agaseke umugeni yabohaga bwa mbere nyuma yo kurongorwa ubwo yabaga yaramye. Aha yacyuriraga umugabekazi Nyiramongi ko atagira umutima, we wabuze kuboha nyabitabo akirongorwa, none akaba agiye kubyiga ari umugore w’ijigija, na bwo akabyigira ku kuboha abantu.

Nyiramavugo yahise arakara, n’umujinya mwinshi ati “Asyi! Nibagaterure bakageze hejuru ubundi bakarekure kikubite hasi kameneke!”.

Binumbiri bya Mukeke akibyumva yabonye ko ibye birangiye, asubiza ati “Mwami wo mu ijuru, uranyiyakirire, uwo hasi yampararutswe”. Abari aho bose barimo n’umwami Rwogera kwihangana byarabananiye ibitwenge babivaho, maze si uguseka karahava.

Umwami Rwogera amaze kumva uko bimeze, yabwiye Binumbiri ko amukijije asaba ko bamureka, gusa amuca mu gihugu.

Binumbiri amaze gicibwa mu gihugu, yahise ajya kubaka mu giti hafi y’ibwami.

Ubwo abagaragu b’ibwami bamubonaga mu giti baratunguwe, bati “Dore cya kigabo umwami yirukanye mu gihugu, none ni cyo kiri muri kiriya giti.”

Babimenyesheje umwami, na we araza yihera amaso maze abaza Binumbiri icyamuteye gusuzugura iteka ry’umwami kandi yamuciye mu gihugu.

Mu kwiregura yagize ati “Nyagasani, ko wancie mu Rwanda rwawe, wanciye no mu gihugu cy’inyoni? Ahubwo waba unyibwirira amakuru y’abo mu gihugu cyo hasi, mbese muracyakomaho ni amahoro masa?".

Umwami Rwogera byaramusekeje, maze amuha imbabazi amubwira kumanuka mu giti agakomeza ubuzima busanzwe.

Rwogera yahise asubiza Binumbiri ubutware aramugororera, kugeza ubwo bamwitirira umwe mu misozi irugize aho yitiriwe umusozi wo mu Mudugudu wa Nyamise wo mu Kagali ka Kabaliza ko mu Murenge wa Rutunga, wo mu Karere ka Gasabo.

Gushyenga biri mu buvanganzo abanyarwanda bari barakenetse bwashoboraga kubakiza mu gihe cy'amakuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .