Nyabihu: Umugeni watwawe n’umugezi yabaye inkomoko y’izina ry’ahitwa Nangumurimbo

Yanditswe na N.Kubwimana Janvière
Kuya 21 Kanama 2020 saa 11:08
Yasuwe :
0 0

Mu Karere ka Nyabihu mu Murenge wa Mukamira, Akagari ka Rubaya, Umudugudu wa Gashonero, hari agace kitwa Nangumurimbo kitiriwe umugezi w’aho, mu mateka bivugwa ko wigeze gutwara umugeni wari warimbiye ubukwe, maze agahita yitaba Imana.

Nk’uko bivugwa n’abazi amateka yaho, bemeza ko aka gace kahawe izina rya Nangumurimbo ahagana mu 1930, biturutse ku kuba aka gace kararangwagamo umwanda ukabije, wavaga ku cyondo cyahahoraga kubera ko uwo mugezi wuzuraga hakangirika, ku buryo abaturage baho ntawatinyukaga kwambara inkweto.

Kwambara umwenda w’umweru cyari ikizira, ndetse ngo bamwe ntibirirwaga bamesa kubera uwo mwanda basaga n’aho bawumenyereye.

Iby’uyu mwanda bihamywa na Habyarimana Timothée w’imyaka 67 utuye muri aka gace.

Ati "Uyu mugezi kera wagize amateka akomeye y’umwanda, iyo wuzuraga amazi yadusangaga mu ngo, hagahora icyondo, nta muturage w’aha wambaraga inkweto, no kumesa babikoraga gake gashoboka, ntawambaraga umwenda ufite isura.”

Umusaza w’imyaka 72 na we utuye muri aka gace witwa Gasenda Simeon, yabwiye IGIHE ko aka gace kaje gufata iri zina bidakuka ubwo uyu mugezi watwaraga umugeni yakereye ubukwe, maze abahatuye bahita bahamya ko uzira abarimbye.

Yagize ati “Kera nk’uko abakurambere bacu babigenzaga, bakundaga gushyingira abageni nijoro, izina mwumva Nangumurimbo rero ryaturutse ku mateka y’uyu mugezi wigeze gutwara, umugeni wari ugiye gushyingirwa ari nijoro, ahagera yanduye cyane ageze ku kiraro aranyerera umugezi uramutwara ahita apfa, bahita bavuga bati "uyu mugezi wanze umurimbo kuva kera, ugeze n’aho utwara umugeni!" Izina rifata uyu mugezi gutyo, n’agace k’aha gahabwa iryo zina, n’ubu niko hitwa"

Gusa nubwo amateka avuga ibi, iyo ugeze muri aka gace usanga harahindutse ugereranyije n’uko abaturage baguha amateka yaharangaga muri iyo myaka yo mu 1930.

Ubu hamaze kugezwa umuriro w’amashanyarazi, inzu nziza, umuhanda wari mubi ubu warakozwe imashini zirawutsindagira, amashuri n’ibindi.

Kuba aya mateka yarahindutse, nibyo abatuye aka gace baheraho bavuga ko baterwa ipfunwe cyane no kuba iri zina rigaragaza ko ari agace gatuwe n’abanyamwanda gusa, nyamara bo babona ko ari izina ry’amateka ya kera atajyanye n’igihe barimo, kuko ubu barangwa n’isuku.

Bagasaba ko iri zina ryahindurwa hakwitwa Nkundumurimbo, bijyanye n’uko bahagaze ubu.

Inkomoko y'izina Nangumurimbo ryaturutse ku mugezi watwaye umugeni agahita apfa
Muri Nangumurimbo hari amashuri mashya arimo kuhubakwa, asanga ibindi byumba bisanzwe kuri GS Nanga 1
Nubwo Nangumurimbo iherereye mu gace k'imisozi miremire, batangiye kuhubaka inzu zo guturamo hanagezwa umuriro w amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .