Umunyarwanda yarateruye ati “Utazi iyo ava ntamenya iyo ajya.” Ukigera mu Ngoro y’Umurage w’Amateka y’Imibereho y’Abanyarwanda uhita wakiranwa urugwiro n’abakozi bashinzwe gutembereza abantu banabasobanurira ibikoresho ndangamateka bihari.

Iyi ni ingingo ahari isanzwe kuko serivisi iri mu byashyizwemo imbaraga mu Rwanda. Mu gice kibanza utaratangira gusura ibyo bikoresho nyirizina uhita usogongera ku bikoresho n’imitako ibereye ijisho igaragaza ubwiza bw’u Rwanda.

Iyi ngoro nini mu Ngoro Ndangamurage umunani za Leta, ibitse ibintu bifatika ibihumbi 15, hakabamo n’ibindi bikubiye mu majwi n’amashusho.

Inteko y’Ururimi n’Umuco itangaza ko abantu barenga ibihumbi 30 ari bo basura iyi ngoro ku mwaka, nubwo mbere y’Icyorezo cya Covid-19 yagezaga ku bantu ibihumbi 50.

Abahasura barimo ingeri zinyuranye. Ni urubyiruko rwo mu mashuri rujya kwiga amateka y’u Rwanda, abakuru n’abashakashatsi ku mateka.

Umushakashatsi mu Nteko y’Umuco ushinzwe Amateka Ashingiye ku Bisigaratongo, Ntagwabira André yabwiye IGIHE ko iyi Ngoro yifashishwa na buri wese ushaka kugira icyo yandika ku mateka y’u Rwanda.

Ati “Ntiwakora ubushakashatsi cyane cyane nko ku muco w’u Rwanda udasuye iyi Ngoro ngo uvuge ko wabuvuye imuzi. Kuko aha hagaragaramo ibikoresho byinshi bigaragaza umuco n’amateka by’Abanyarwanda noneho washaka kujya mu mateka ya kure ugasanga harimo n’ibisigaratongo.”

Ibisigaratongo ni ibikoresho byakoreshejwe n’abantu bo hambere cyane udashobora gukura mu bantu, bikaba biboneka mu butaka gusa.

Mu matsiko menshi winjiranye muri iyi Ngoro Ndangamurage, abakozi baho batangira kuyagabanya gake gake bahereye ku kukwereka ikarita y’igihugu n’ibintu bitandukanye biranga buri gice cyacyo.

Muri iki gice, uretse abakiri bato n’abanyamahanga ni bo bahatinda, ubundi bagatangira kubona amateka y’umwuga ukorwa na benshi mu Rwanda.

Ubuhinzi n’ubworozi byakozwe mu buryo bwa gakondo kuva mu myaka ya kera cyane. Ibikoresho byakoreshwaga n’abahinzi birimo amasuka, yatangiye gukoreshwa uko umwuga w’ubucuzi wagiye utera imbere.

Aha uhasanga isuka y’inkonzo n’inshikazi kimwe n’ibindi byose bakoreshaga mu mwuga w’ubuhinzi.

Ubuhinzi bujyana n’ubworozi. Amateka agaragaza ko ibi bikorwa mu Rwanda byakorwaga kuva mu kinyejana cya gatatu nyuma y’ivuka rya Yezu. Amatungo azwi cyane ko yorowe n’Abanyarwanda mbere y’ayandi ni inka, ihene, n’intama.

Amashusho y’inka z’inyambo, inkuku n’ibigarama zorowe mu bihe bya kera agaragaza ko umworozi yabaga afite amahirwe yo kunywa amata, kubona amavuta, kubona uruhu rwo kwambara no kugira abaja n’abagaragu.

Umushumba yabaga yitwaje inkoni, igitangaje kikaba isinde. Uyu wari umwambaro ukoze mu birere wafashaga umushumba kutanyagirwa kandi ukamurinda imbeho.

Mu bintu abashumba batasigaga inyuma ni uruhago batwaragamo impamba yo kubaramira bari mu rwuri. Benshi bitwazaga ibijumba cyangwa imyumbati n’ibishimbo bakabimanuza amata. Ubanza ari ho havuye iby’‘umushumba utungwa n’izo aragiye.’

Ubuvumvu [ubworozi bw’inzuki] na bwo muri iyi ngoro bugaragaramo ariko bukoresheje imizinga/ imitiba ya gakondo.

Urusyo ni igikoresho kizwi na bake

Abenshi bakoresha imvugo yo gukoma urusyo n’ingasire ariko batarabona ibi bikoresho. Ururyo utarubonyeho ingasire n’ibinyampeke nk’amasaka n’uburo ushobora kurwita ibuye risanzwe.

Mu masaka basyaga ku rusyo harimo ayavagamo umutsima n’igikoma ariko hari n’igihe yabaga ari imbetezi.

Mu rugendo rugana ku musozo w’ubuhinzi n’ubworozi mu Ngoro Ndagamurage y’i Huye, hari igice kigaragaza uko bengaga urwagwa. Basobanura intambwe ku yindi kuva ibitoki bitemwa kugeza inzoga bayimininnye.

Iki gice gisorezwa mu bwikorezi, ahari intebo, intonga, inkangara, ingobyi yifashishwaga mu guheka abantu n’ibindi.

Usohotse muri iki gice yinjira ahari ibikoresho byiganjemo ibiseke, imitako iboshye mu bimera bitandukanye, uruhimbi ruriho ibisabo n’ibidi bikoresho gakondo byifashishwaga mu buzima bwa buri munsi.

Ku batagira amahirwe yo kujya i Nyanza mu Rukari [ibwami], hari inzu igaragaza neza uko umwami w’u Rwanda yabagaho.

Uvuye kuri iyi nzu uhita ugera ku gice gikubiyemo imyambaro yambawe n’abakurambere ikoranabuhanga rigezweho ritaragera i Rwanda.

Mu gice kirimo imyambaro gakondo abenshi bibaza ibibazo iyo bageze ku myamabaro yitwa ishabule.

Uyu mwambaro wagaragazaga neza ikimero cy’uwambaye, ugahisha imbere gusa mu gihe inyuma ari agashumi kameze nk’umukandara.

Imyambaro yari ihenze kandi yambarwaga n’abifite yabaga ikoze mu ruhu rw’inka n’inyamaswa z’ishyamba, mu gihe rubanda rusanzwe rwambaraga ihene n’impuzu ikannye mu gishishwa cy’umuvumu.

Hafi y’aha kandi hari ibikoresho byakoreshwaga n’ingabo z’u Rwanda, birimo amacumu, ingabo, imyambi, inkota n’ibindi bajyanaga ku rugamba.

Iyi ngoro irimo ibisigaratongo byinshi kuri ubu utapfa kubona ahandi, birimo amabuye agaragazwa ko yakoreshejwe mu myaka ibihumbi 70 mbere ya Yezu, ibikoresho byakoreshejwe mu gushongesha ubutare mu kinyejana cya mbere nyuma y’ivuka rya Yezu n’ibindi byinshi.

Hanabarizwa ingoma zitandukanye zifashishaga mu mihango y’ibwami no mu mihango y’abiru ariko Kalinga yamamaye nk’ingoma ngabe y’u Rwanda kuva ku ngoma ya Ruganzu II Ndoli wayiramvuye ahasaga mu 1510, kugeza mu wa 1961 ubwo ingoma ya cyami yasezererwaga mu Rwanda rugahinduka Repubulika ntirimo.

Ibindi bitangaje uhasanga ni ibikoresho byasanzwe mu musezero [imva] y’umwami Cyilima II Rujugira byiganjemo ibikoresho by’intambara, imitako, akabindi n’ibindi.

Inteko y’Umuco mu Rwanda itangaza ko hari ibikoresho bitandukanye ndangamurage biri mu nzu ndangamurage ziri mu bihugu by’i Burayi nk’u Bubiligi, u Budage, u Busuwisi, i Roma mu Butaliyani n’ahandi. Ibi byose ngo hari ibiganiro biri gukorwa ngo bizashyirwe mu nzu ndangamurage z’igihugu.

Ucyinjira uhita ubona ahagurishirizwa imitako ikorerwa mu Rwanda

Ububumbyi bwakozwe mu bihe bya kera amasafurita atari yaza mu Rwanda

Mu kubandwa mu idini gakondo hakoreshwaga udukoresho twinshi

Mu guhunika imyaka cyane ibinyampeke hakoraga ikigega, cyabaga kiri hanze

Izi ngoma zirimo izakoreshwaga mu mihango y'abiru

Iyo ni yo bita impinga yakoreshwaga n'abapfumu baragura, batera inzuzi

Iyi ngobyi yamenyekanye cyane mu kujyana abarwayi kwa muganga

Ishoka ifite amazina menshi mu Rwanda ubu ntigifite iyi sura

Iri buye ni rimwe mu yakoreshejwe mu myaka ibihumbi 70 ishize mbere ya Yezu ryasanzwe yasanzwe hirya no hino mu gihugu

Intwaro ziri mu bikoresho bitandukanye byasanzwe mu musezero w'umwami Cyirima II Rujugira

Inkonzo zakoreshejwe mu bice by'Amajyaruguru ahaba amakoro

Inkangara nyinshi bazitwaraga mu myatiro

Inkono y'itabi yakoreshejwe mu bihe bya kera abantu batekeramo ibikamba (amababi y'itabi) bagakurura umwotsi unyuze muri ako gati

Ingoro y’Umurage w’Amateka y’Imibereho y’Abanyarwanda yo mu Karere ka Huye isurwa n'abarenga ibihumbi 30

Injishi yifashishwaga mu gukama inka

Ingoma zisusurutsa ibirori zigaragara mu gice gikubiyemo amateka ya vuba

Ingobyi yifashishwaga mu guheka abantu batanu barimo umutware, umugore utwite, umugeni, umurwayi n'umwami

Ingabo zifashishwaga mu kwirinda ku rugamba

Imyambaro gakondo Abanyarwanda bambaye mu myaka amagana yashize uyisanga muri iki cyumba cy'Ingoro Ndangamurage

Impuzu yari ikoze mu bishishwa by'umuvumu yaziranaga n'izuba ryinshi

Impu z'inyamaswa zifashishwaga mu mihango yo kubandwa

Imivuba yakoreshwaga n'abacuzi bacana umuriro mu gihe babaga batwitse ibyuma

Ibyansi n'ubu bikoreshwa mu gutereka amata

Ibiseke byakoreshwaga kera n'ubu biracyakora

Ibiseke biboshye neza ni bimwe mu bikoresho ndangamurage by'u Rwanda u Bubiligi bubitse

Ibikoresho byo mu rugo birimo isekuru n'ibindi byo mu gikoni

Ibikoresho bitandukanye byasanzwe mu musezero w'Umwami Cyilima II Rujugira

Ibibindi byifashishwaga bateretse amarwa

Ibikoresho bigaragara inyuma ni ibyakoreshwaga mu bwikorezi

Harimo imitako itandukanye ya kinyarwanda

Aya masuka yakoreshejwe kugeza mu 1959

Harimo inzu yerekana imibereho y'ibwami

Hari n'ibikoresho babumbaga ari imitako

Aya matafari akoze mu ibumba yavumbuwe mu karere ka Gisagara ahakorerwaga imirimo yo gutwika ubutare bakabubyaza ibyuma

Amarembo y'iyi Ngoro arangwa n'amahembe ateze neza y'inyambo

Amasuka yakoreshwaga mu Majyepfo y'u Rwanda yasaga n'Inshikazi

Abagore n'abakobwa babohaga ibiseke, gusa uyu mwuga ubu ukorwa n'abantu b'ibitsina byombi

Abantu bambaraga impu z'inyamaswa zitandukanye

Amafoto Munyakuri Prince