Inkomoko y’iteka rya Mibambwe Sentabyo ry’uko ‘Ubutumwa buruta intumwa’

Yanditswe na Nsanzabera Jean de Dieu
Kuya 23 Ukuboza 2018 saa 11:12
Yasuwe :
0 0

Hari amateka menshi yagiye acibwa n’abami b’u Rwanda, mu rwego rwo kugira ngo abayobozi n’abayoborwa bagire ibyo baha agaciro banabyimakaze mu mibereho yabo ya buri munsi.

Ayo mateka yagiye afasha Abanyarwanda kugira ibyo bubaha n’ibyo batinya. Muri iyi nkuru tugiye kubatekerereza iteka ryaciwe n’umwami Mibambwe III Sentabyo, watwaye u Rwanda ahasaga mu wa 1741 kugeza mu wa 1846, rikaba kimomo mu Rwanda hose.

Abahondogo bari ubwoko bw’ibikomangoma by’i Bugesera; ni bo bavagamo abami babwo kera butaraba ubw’u Rwanda. Umwami w’i Bugesera uwo ari we wese wimye bamwitaga Nsoro, nk’uko mu Gisaka bamwitaga Kimenyi, mu Nkore bakamwita Gahaya.

Rimwe rero, Nsoro umwami w’i Bugesera yatewe n’uw’i Rwanda witwaga Mibambwe III Sentabyo, aramunesha, u Bugesera buyoboka u Rwanda. Bamwe mu bikomangoma by’Abahondogo banga kuyoboka n’abayobotse bayoboka bagononwa. Abenshi bari abanyage, abandi bakunze kuyoboka basigara mu byabo.

Bukeye Abahondogo bamaze gusumbirizwa n’inzara n’amapfa bibageze habi, bajya inama yo kujya kuyoboka Sentabyo. Batoranya umwe muri bo witwaga Mabwire, bati “Genda uyoboke uduhakirwe, na we ntuyobewe amagambo yo guhakwa”. Mabwire ashyira nzira n’i Rwanda kwa Sentabyo.

Agezeyo ahasanga abandi Bahondogo bayobotse. Mabwire abonana n’abagaragu ba Sentabyo, bamubaza ikimugenza, arababwira ati “Twashize twishwe n’ubutindi n’inzara. None ibyiza ni uko mwanshyikiriza Sentabyo nkamuhakwaho”.

Abagaragu ba Sentabyo bimira Mabwire bamubuza kwinjira ngo abonane n’Umwami, hashira iminsi yikinze mu kiraro cya bene wabo bari bafashwe bugwate n’ingabo z’u Rwanda. Bigeze aho Mabwire asubira ku bagaragu ba Sentabyo arabinginga ngo bamuvunyishirize baranga.

Ntibashakaga ko hari umwe mu bahondogo uhinguka imbere y’umwami, kuko cyaraziraga ko abaturage b’igihugu cyatsinzwe bahinguka imbere y’umwami bataruhagizwa amazi y’ubuhoro ngo bahumanuke.

Bukeye ku gasusuruko Mabwire araza yihaze abwira abarinzi bo kwa Sentabyo ati “Ntimurebe Mabwire wo mu ngabo za Nsoro zatsinzwe, kuko nikoreye ubutumwa bw’Abahondogo bose bagize ingoma y’u Bugesera bifuza kuyoboka. None rero ubutumwa buruta intumwa, nimunshyikirize umwami mushyikirize ubutumwa nahawe n’umuryango mugari w’Abahondogo”.

Abagaragu ba Sentabyo batangazwa n’iryo jambo ababwiye, baragenda barigeza kwa Sentabyo. Nuko ategeka ko bamuzanira Mabwire amushyikiriza ubwo butumwa. Mabwire akoma yombi, ati “ Nyagasani nyir’u Rwanda abagome barapfuye, abandi baracitse, none twebwe abasigaye tuje kugusaba ngo utwunamureho icumu ry’inzara n’ubutindi byaturembeje”.

Sentabyo amaze kubyumva abaza umwiru Mukuru we, ati “Uyu mugabo na bene wabo nabagenza nte ? Umwiru Mukuru, ati “Ubu se wabura uko ubagira ! bari mu gihugu cyabo, bafite ibintu byabo n’amatungo yabo, none ibyabo byose ni wowe ubifite, ubwo se wabura ikibakiza inzara ?” Sentabyo yemera inama umwiru Mukuru amugiriye; aca iteka ngo “Abahondogo iyo bava bakagera bahabwe umuriro”.

Yahise ategeka abatware yagabiye u Bugesera ko umuhondogo wese uri mu Bugesera ahabwa inka z’imbyeyi icumi z’umuriro. Ati “Nzashaka icyo nzabaha nyuma”. Mabwire asubira mu Bugesera ajyanye n’intumwa n’izo nka Sentabyo yategetse ko babaha. Bageze i Bugesera abwira bene wabo ibyo Sentabyo yabategetse. Barishima bashima na Mabwire. Intumwa nayo ikwira mu batware bose bari i Bugesera, igenda ivuga ubutumwa bwa Sentabyo iri kumwe na Mabwire.

Ubwo Abahondogo bose bahabwa inka Sentabyo yategetse, intumwa irikubura irataha, ijya gusohoza ubutumwa bw’uko ibintu byatunganye.

Nyuma yo gusubiza inyuma ibitekerezo k’umwami Mibambwe Sentabyo akibuka ubutumwa Mabwire yamushyikirije bwatumye atabara Abahondogo bari bishwe n’inzara bigatuma banayoboka nta mananiza, amaze no kwibuka ubutumwa yahawe n’intumwa ye yatumye mu Bugesera ngo iherekeze Mabwire, ikazana inkuru nziza y’Abahondogo bayobotse kandi ko bahonotse inzara yari ibajengereje. Yumva intumwa ntacyo yayinganya iyo isohoje ubutumwa. Nuko ku ngoma ye aca iteka rikwira u Rwanda rwose rigira riti “Ubutumwa buruta intumwa”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza