Igitero cy’imigogo, isomo rikomeye u Rwanda rwasigiye Uganda

Yanditswe na Mupenzi George
Kuya 17 Nyakanga 2019 saa 09:40
Yasuwe :
0 0

Hashize iminsi mu itangazamakuru havugwa umwuka mubi hagati y’u Rwanda na Uganda.Ubuyobozi bukuru bw’ibihugu byombi bwagiye bugira icyo bubivugaho mu bihe binyuranye ndetse hakibutswa ko hambere ingabo zabyo zarwanye kumugaragaro i Kisangani iza Uganda zikahatakariza abasirikare benshi n’ibikoresho bitagira ingano.

Iyo ntambara igenda itutumba buri gihe abantu bagenda bayibazaho ,umuntu akaba yagira amatsiko yo kumenya uko u Rwanda na Uganda byari bibanye mu bihe binyuranye na mbere y’Abakoroni.

Muri iyi nyandiko turibanda ku gitero cyiswe igitero cy’imigogo aricyo cya nyuma Rwabugiri yagabye muri Ankole kigasiga kiyogoje Uganda.
Mu kinyankole ‘’imigogo’’ byavugaga imitwe y’ingabo (igiye ku rugamba).Mu Kinyarwanda igitero cy’imigogo byari nko kuvuga igitero cy’ibitero:igitero cyari kigamije kwihorera kubera ibitero bya Ntare V Rugingiza rwa Migereka wanyaze inyambo za Rwabugili.

Mu Kinyankole cyiswe Ehururu ya Rwanda.Cyari kibasiye Ntare V Rugingiza rwa Migereka Umwami wa Ankole wari wahengereye Rwabugili ari i Bunyabungo aza kunyaga inyambo z’u Rwanda atwika ingoro y’i Rutaraka hafi ya Nyagatare.

Imvano y’igitero

Umugaba w’iki gitero yari Nyamuhenda wa Kajeje wo mu mutwe w’ingabo witwaga Ibisumizi. Cyagabwe muri Gashyantare 1894.

Iki gitero cyari kigamije cyane cyane kwihorera no kugaruza inyambo zari zanyazwe ku ngufu na Ntare V Rugingiza rwa Migereka wa Ankole. Uyu mwami muri Ankole yitwaga Rugingiza akajya yinginga Abatware bo ku mipaka y’u Rwanda ngo bazamuhakirwe kuri Rwabugili amuhe Inyambo dore ko zabaga mu Rwanda gusa.

Rwabugili amaze kumubera ibamba ,aza guhengera yaratabaye mu Bunyabungo ,inyambo ziranyagwa n’urugo rw’Umwami ruratwikwa inkuru mbi itaha i Bunyabungo. lngabo zose zigaruka i Rwanda.

Rwabugili abimenye, yatoranyije imitwe y’ingabo y’ibihangange irimo umutwe w’Irityaye, Inyaruguru, Ndushabandi, Abamaragishyika, Ijuru n’indi, anoza umugambi wo gutera Ntare V Rugingiza rwa Migereka.

Ubwo Ntare V Rugingiza rwa Migereka yanyagaga inyambo akanatwika urugo rw’umwami, umutware warwo Kinyamakara cya Ndenzi ntiyari ahari. Amaze kumenya iyo nkuru, yasanze azabizira ahita ahungira muri Ankole ajya kuburira Abanyankole ati “ nimwumva ko Rwabugili yaje kwihorera muzazinge utwanyu muhunge kuko mutashobora guhangana na we”.

Ntare V Rugingiza rwa Migereka ntiyahise abyemera, nuko yohereza intasi ye Munanika iza mu Rwanda ivuga ko ihunze yakiranwa icyubahiro. Ingabo zigeze mu Mutara,Munanika areba uburyo zicucitse agira amatsiko yo kureba uko zivangura zigakora imitwe y’urugamba.

Ajya ahitaruye abwira umugaragu we ngo nakome akamu avuga ko igitero cy’Abahima kinyaze inka. Za ngabo uko zakabaye zihita zijya mu mitwe yazo (umurari ku wundi) Munanika akubitwa n’inkuba atorokera Mbarara abwira Ntare ati “Nimuhunge vuba na bwangu kuko mutashobora guhangana n’ingabo za Rwabugili.”

Mu 1894, Abongereza bari barageze muri Uganda. Bari barubatse amazu ya kizungu(ari naho haturutse imvugo y’uko Rwabugili yifungiranye mu rutare ari rwo imwe muri izo nzu) n’ingabo zabo zirwanisha imbunda z’icyo gihe zitwaga za makoba. Abanyarwada ntazo bari bafite ariko bari bazi uko zikora.

Ingabo z’u Rwanda zavogereye Ankole yose, zigeze Mbarara, Rwabugiri ihema rye arishinga i Kanyamisisa. Abanyankole baratera. Barasira rimwe ,Abanyarwanda bakaryama hasi, bakababyukana batarabona igihe cyo gushyiramo andi masasu bakabahata imyambi n’amacumu.

Nuko barabirukankana babica umugenda,haba icyorezo mu ngabo z’Abanyankole.

Ingoro ya Ntare Rugingiza rwa Migereka barayigabiza hasahurwamo imbunda,inigi zitagira uko zisa. Ingabo z’ u Rwanda zigarukana ishema ritabaho nubwo zitabashije gutabarukana za nyambo. Imyiyereko ibera i Gatsibo bakomeza imihango y’umuganura .Bageze i Rugobagoba, bamenyako Ntare V Rugingiza rwa Migereka yapfuye azize umusonga.Umuhima waje kumubika yiyahurira i Rugobagoba asanze atazagera amahoro Ankole.

Rwabugili ageze mu rugo rwe rw’i Gihogwe amenya inkuru mbi y’uko Abashi bayobowe na Rutaganda banyaze inka z’Umwami yari yarasizeyo.Agaba yo igitero cya nyuma ari nacyo yaguyemo. Abatekereza bavugako ageze mu Bunyabungo mu kirwa cya Ibinja, yamerewe nabi cyane ahinda umuriro udasanzwe bamutahukana igitaraganya ahita atanga ;bikaba binavugwa ko Abashi bashobora kuba baramuhaye uburozi.

Amasomo twakura muri iki gitero

Ibikorwa by’ubushotoranyi bishobora kubyara intambara ,umenya uko itangira ariko ntumenye uko irangira.

Indonke ukura mu ntambara zishobora kukugiraho ingaruka mbi zikagutera kwicuza kandi akarenze umunwa karushya ihamagara.

Amateka asa nayisubiramo. Intambara Uganda yagiye ishoza ku Rwanda (igitero cya mbere n’icya kabiri cy’Abanyoro,igitero cy’imigogo,intambara ya Kisangani,….) zarangiye ziyiteye igihombo n’ipfunwe bihora ari nk’inkomanga.

Amakimbirane hagati y’ibihugu by’ibituranyi kandi bifitanye amateka y’ubucuti bukomeye ntakwiye guhora ahemberwa n’umuyobozi runaka ugamije inyungu ze cyangwa ufite inzigo yo kwihorera.

Mupenzi George, inzobere mu mateka y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza