00:00:00 IGIHE NETWORK KN KINYARWANDA EN ENGLISH FR FRANCAIS

Ibyo Abanyarwanda bitonderaga mu mushinga wo gushyingira hambere

Yanditswe na Nsanzabera Jean de Dieu
Kuya 10 May 2022 saa 08:29
Yasuwe :

Mu mishinga ihanitse imiryango migari y’abanyarwanda yagiraga, harimo n’umushinga wo gushinga urugo bigamije kwagura umuryango uhamije ibigwi n’ibirindiro.

Ubukwe bwari umushinga witonderwa cyane, kandi ukagira byinshi ushingiraho kugira ngo ubeho. Bityo bikaba byari ngombwa ko umuryango mugari uyu n’uyu, witondera ibyo gushyingirana, bijyanye no guhitamo umuryango mugari uyu n’uyu bagomba gushakamo umugeni, cyangwa se umukwe.

Umushinga w’urushako rw’Abanyarwanda ntabwo ari igikorwa cyahubukirwaga cyangwa ngo kijenjekerwe nk’uko benshi babikekaga, wiganwaga ubuhanga, ubwenge n’ubushishozi kuruta ibindi bihe.

Amahitamo yabo yashingiraga ku ntego y’umuryango urambye bifuza kuzagira mu bisekuruza bya kure ba nyir’ugushyingiranwa batakiriho.

Abanyarwanda barebaga ahazaza h’umuryango wabo mugari babarizwamo n’igihugu cya bo, kuruta kureba hafi mu bihe bya bo, ari na yo mpamvu bagiraga amahitamo y’aho bagomba gushyingira, n’aho batashyingira.

Indangagaciro yabahaga inararibonye yo kurambagiza mu muryango uyu n’uyu, bazikuraga ku kuba uwo muryango bagiye gushakamo cyangwa se gushyingirana, uzira icyaha n’icyasha, umuryango ufite ibigwi n’ibirindiro.

Imico mbonera y’ubumuntu n’ubumana, yo yari ibanze mu kurambagiza ubushyingirane mu miryango migari y’Abanyarwanda. Ibyo kureba igihagararo, indeshyo, isura, akarere n’ubutunzi, ntibyitabwagaho mu kurambagiza.

Umuryango ufite umusore ukwiye gushaka, ni wo warambagizaga umuryango ugomba gushakamo. Ntiharambagizwaga umukobwa, ahubwo harambagizwaga umuryango ufite umukobwa ugeze igihe cy’urushako.

Igitabo “Iyororoka ry’Abanyarwanda, inkomoko y’imiryango migari” cya Nsanzabera Jean de Dieu, kigaragaza ko umushinga wo gushyingirana, ari wo wafatirwagaho mu gutanga ubwenegihugu ku banyamahanga bifuza kuba Abanyarwanda cyangwa se abo u Rwanda rwanyaze mu bitero.

Uwabushakaga yarasabwaga gushyingiranwa n’umunyarwandakazi, bagahuza amaraso kugeza ku gisekuruza cya kane, bakabona kuguha ubwenegihugu, kuko amaraso yawe yamaze gutora igenantekerezo z’ihangabuhanga nyarwanda (Philosophie).

Iteka ryo gushyingiranwa kugira ngo uzahabwe ubwenegihugu, ryaciwe n’umwami Mutara Nsoro Semugeshi aho yategetse ko umunyamahanga ushaka ubwenegihugu bw’u Rwanda agomba kubuhabwa nyuma y’imyaka 400. Ni ukuvuga ko bwahabwaga Ikivivagiza cye.

Gushyingirana byari bifite intego yo gushaka icyororo cyiza (Variété ), mu muryango uyu n’uyu ufite ibigwi, ibirindiro n’izindi ndangagaciro zigizwe n’uburebakure n’imico mbonera y’ubumuntu n’ubumana. Buri muryango wahitagamo undi bazashyigirana, bitewe n’indangagaciro z’icyororo bifuza gukura muri uko guhuza umusore n’inkumi baturuka mu miryango itandukanye.

Mu gushaka icyororoharebwaga umuryango uvamo abakobwa bororoka, babyara abana benshi, badacura vuba, babyara ibitsina byombi kandi batazahazwa n’indwara z’abagore nk’umugongo n’izindi.

Gushyingirana, byari bifite intego yo gushaka amaboko n’imbuto mu muryango uyu n’uyu. Umuryango ufite ubuhangange, umuryango ubyara abana beza kandi bafite ubwenge, umuryango wifashije.

Guhyingirana, byari bifite intego yo kwinjiza amaraso mashya mu muryango mu rwego rwo gusazura ayo bari basanganywe, ayo bamaranye igihe cyangwa se ay’imiryango yabo ngo yongere isubirane ubushya, ari na ho bahitagamo umuryango mugari bajya gushakamo usazura uwo bari basanganywe.

Bashobora gusanga bamaze imyaka myinshi bashaka mu Basinga, bagahitamo gushaka mu yindi miryango nk’Abazigaba, Abagesera, Abega, Abatsobe n’iyindi.

Gushyingirana byari bifite intego yo kurushaho gutsura umubano, ubumwe n’ubushyikirane hagati y’imiryango migari. Byari bifite ikandi intego yo kuvanga amaraso hagati y’ababanje gutura uru Rwanda, n’ababakurikiye.

Hari aho gushyingirana kwafatiraga ku nyungu za Politiki, iz’ububanyi n’amahanga n’iz’umutekano. Habagaho imiryango migari ishobora gushaka mu miryango yose y’Abanyarwanda, mu rwego rwo guhamya ubutware mu miryango yose. Abayoborwa bakabona ko nta vangura riri hagati y’umuyobozi n’abo ayobora. Hakaba n’indi miryango yashakaga mu miryango migari mike kandi y’intoranywa kubera impamvu z’umutekano w’igihugu n’amabanga agenga ubutasi bw’u Rwanda.

Hari aho u Rwanda rwashyingiraga amahanga abakobwa barwo, kubera gushaka kunoza umubano no kubaka igihango kizatuma badahemukirana. Hakaba n’aho babashyingiraga umukobwa nk’umutasi bohereje yo uzabafasha guhirika icyo gihugu no kukigarurira.

Mu ntango y’ihangwa ry’u Rwanda, wasangaga Ibimanuka byibandaga mu gushaka mu Basangwabutaka, mu rwego rwo kuvanga maraso asangiye isano ya bugufi, kugira ngo umushinga wa Gihanga wo guhuza ibihugu 29 bikaba igihugu kimwe uzagerweho.

Ni nayo mpamvu abagore ba mbere b’imiryango y’Abanyarwanda, wasangaga bakomoka mu bami n’ubundi b’Abasangwabutaka, ugasanga kenshi na kenshi Abami bashaka abageni mu bami b’ibindi b’ibihugu, Abatware na bo bakabigenza uko.

Umuhango w'ubukwe bw'Abanyarwanda, wari umushinga uraza ishinga abakuru n'abato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .