00:00:00 IGIHE NETWORK KN KINYARWANDA EN ENGLISH FR FRANCAIS

Ibigwi n’amateka by’indirimbo ’Kanjogera w’Injonge’ imaze kwambukiranya ibinyejana bitatu

Yanditswe na Nsanzabera Jean de Dieu
Kuya 16 April 2022 saa 08:26
Yasuwe :

Mu buhanga butiganwa bwaranze abakurambere mpangarwanda, harimo no guhanga indirimbo zirimo ubuhanga buhanitse bwuje inyurabwenge n’inyuramatwi utabasha kubona mu buvanganzo bw’ahandi hose ku Isi.

Hari igihe ugira utya ukagwa ku gihangano cy’indirimbo cyangwa se umuvugo wakumva injyana yacyo uburyo yengetse, wakurikirana imvugo ihanitse isobetsemo, ukaba wakwibaza uwahanze icyo gihangano uko yasaga. Ni muri uwo mujyo IGIHE yahisemo kujya ibataturira amateka ya zimwe mu ndirimbo cyangwa se ibisigo n’ibindi bihangano byuje ubuhanga bwambukiranyije ibinyejana na n’ubu bikaba bikivugwa ibigwi by’umwimerere wabyo.

Igihangano tubimburiyeho ni indirimbo imaze kugwiza ibigwi mu rwa Gihanga yiswe ”Kanjogera w’Injonge”, ifite intango ku ngoma ya Kigeli Rwabugili ahasaga mu wa 1883, ikaba imaze gusubirwamo n’abahanzi bagera kuri batatu mu
gihe cy’imyaka isaga 139 (1883-2022).

Abayisubiyemo bazwi mu mateka y’u Rwanda muri bo twavuga: ”Mahwehwe, Rujindiri Berinarudo na Intore Masamba Alphonse. Akaba ari gake cyane kuba wabona igihangano nk’iki gishobora kwambukiranya ibinyejana bitatu kigikunzwe.

Ubusanzwe umwimerere wayo kuva yahangwa yitwa: ”Imitoma” yahanzwe na Kalira ka Rwogera wari mushiki wa Rwabugili umwami w’u Rwanda ahasaga mu wa 1883, mu rwego rwo guhakirwa Kanjogera wari muramukazi we ngo asubirane n’umugabo we Rwabugili, nyuma yo guteranywa na Nzigiye za Rwishyura wari umutware w’u Buganza bw’Iburasirazuba ku ngoma ya Kigeli Rwabugili, waje kumusenda ku bintu bidasobanutse.

Aha akaba ariho hatugaragariza uruhare runini rw’abacukumbuzi b’amateka babashije kutugerera iyo kure cyane tutarabona iryo mu museso, badutarurira ibiri mu ruhererekanemvugo rw’inkomoko y’indirimbo yiswe:” Imitoma”, Ese kugira ngo iyo ndirimbo ihangwe byaba byarakomotse he?

Kanjogera za Rwakagara wahangiwe na Kalira indirimbo "Imitoma" ayitura Umwami Rwabugili

Ihangwa ry’iyi ndirimbo rikomoka ku gitaramo cy’imihigo cyahuje abatware ba Rwabugili na Rwabugili we ubwe. Batangira kurushanwa bagaragaza ko bafite ingo nziza n’abagore beza. Izo mpaka zakabuwe na Nzigiye za Rwishyura watwariraga umwami Rwabugili u Buganza bw’Iburasirazuba.

Mu gitaramo abahungu bateraniyemo Nzigiye aterura ijambo rye agira ati ”Mfite urugo rwanjye rw’i Mukarage, rukabamo umugore mwiza Nyirakayogera, agira inzoga nziza z’imbiribiri n’imibavu ihumura neza. Ni rwo rugo ngeramo ngasusuruka, n’abansuye ni rwo rugo mboherezamo kuko rufata abashyitsi neza. Nshobora kuba ndusha abari aha bose umugore mwiza n’urugo rwiza”.

Uwo Nyirakayogera wari umugore wa Nzigiye abatware bose bari bamuzi harimo na Rwabugili. Ku buryo bari baramugenuriyeho umugani ugira uti ”Uzashaka guteta azasange Nyirakayogera i Mukarange”, aho yari atuye kugeza ubu, ni mu Mudugudu wa Kayonza wo mu Kagali ka Kayonza, Umurenge wa Mukarange wo mu Karere ka Kayonza.

Umwami Rwabugili nawe aterura ijambo rye, ahiga mu bandi bagabo aterura agira ati:”Reka nkubwire rero Nzigiye, nubwo twaguhaye rugari ugahiga mbere, ugatuma abandi batware bahigama, ariko ukwiye kumenya ko mfite umugore mwiza Kanjogera w’Injonge uba mu rugo rwanjye rw’i Giseke na Nyagisenyi. Aho handutira izindi ngo zanjye z’ibwami, iyo mpageze ndiruhutsa, umutima wanjye ukanyurwa, bitewe na Kanjogera unyeza umutima ugahora ukeye. Numva nta mugore ubaho wamuruta!”

Impaka ziba ndende, biyemeza kurema umunsi w’imihigo, uzagaragaza urusha abandi urugo rwiza n’umugore mwiza. Nuko babyumvikanaho ko bagiye gutumiza abagore babo bakabanyuza imbere y’abatware bashagirira, bakareba umugore urusha abandi ubwiza.

Nuko bemeranya igihe n’umunsi n’aho bazahurira, ariko umugambi wari uwo kwemeza ko Nyirakayogera na Kanjogera ari bo bagore beza bahiga abandi mu bwiza, ubushokongore n’ubukaka mu gihugu cyose. Kandi byari binazwi neza ko usibye no kuba bari abagore b’abakomeye mu gihugu, bari na beza kuruta benshi mu gihugu no mu bandi bagore b’abatware.

Nuko umunsi bemeranyije uza kugera, igitaramo kirinikizwa, nuko bashyiramo injyana y’umurya w’inanga bagenderaho bambaye neza ari byo byitwa gushagirira inanga, ku buryo bashyagirira batambuka imbere y’abatware aho buri wese aba
abitegeye akabona ubwiza bwa buri wese.

Nuko uw’imbimbuzi mu beza, nyamwibonekeza rihangaje Nyirakayogera ka Kabuto ka Ntama, agenda atambuka ashagirira umurya w’inanga. Aratambuka nyirikibero kibereye abatanzi, Abaganza bayamuhanze, Abatware ba Rwabugili nta n’uwikoma isazi, ngo hatagira uhusha. Aratambuka, aratambuka ashagirira inanga ari nako yihindukiza yitegera Abatware b’umwami Rwabuguli. Nuko Nyirakayogera yusa ikivi cye cy’umushagiriro bamuha amashyi aragenda ajya mu cyicaro yateguriwe.

Nuko aba araserutse ikirenga mu bagore, ikirisi kiresaresa abasore, nyagususurutsa usumbya iry’agasusuruko Kanjogera za Rwakagara ka Gaga, atambuka acyamura intambwe yambaye umutambya, nyiribirori bidateka inkera zikebeye ibuhangwabugili, aba aratambutse by’ihabya, dore ko yari n’umuhanga byahebuje mu gushagirira inanga. Nuko Kanjogera yusa ikivi cye cy’umushagiriro bamuha amashyi aragenda ajya mu cyicaro yateguriwe.

Umutware Nzigiye ahita abona ko Kanjogera akuyemo umugore we Nyirakayogera. Abari aho bose amashyi aba urufaya kuko Kanjogera aserutse neza. N’ubwo ak’ubufana katabuze ko gufana umugore w’umwami, ariko Kanjogera yahaserutse neza cyane arusha amajwi menshi Nyirakayogera.

Nzigiye za Rwishyura ipfunwe riramutaha kuko Kanjogera yahaserutse neza cyane akarusha umugore we Nyirakayogera , ariko kuko yari intyoza mu kuvuga yanga kuripfana, aterura ijambo rye agira ati: ”Ahaaa! Yego Kanjogera arashagiriye, ariko ntashagiriye neza nk’uko ashagirira ari Giseke na Nyagisenyi ari kumwe na mubyara we Kinigamazi ya Kabatende”.

Umwami Rwabugili, kuko yizeraga Nzigiye cyane, arategereza ati: ”Buriya Nzigiye ashatse kumbwira ko Kanjogera ashagirira ari kumwe na mubyara we Kinigamazi ya Kabatende, bagera aho bagakora n’ibindi”! Ati:”Ibi ntabwo ari byo!Aho aba atangiye kurakara da!.

Berinarudo Rujindiri rwa Mahwehwe, wasubiyemo Indirimbo "Imitoma" yaririmbwe bwa mbere na Kanjogera

Rwabugili yari umwami urakara vuba, aba afashe ubushungu! Ahita ategeka ko Kanjogera bamukubita, kuko amaze kumubonaho icyaha. Ategeka ko bamukubita amasaro yari yambaye mu nda amwinjiramo. Batangira kumukubita da! Kanjogera arakubitwa, ndetse Rwabugili aranamusenda aragenda yibera iyo ng’iyo wenyine nk’umugore watawe, aragenda aribagiranaaaa! Ageze aho yigira inama zo gusanga Nzigiye ngo amusabe kumuhakirwa kwa Rwabugili ye gukomeza kumurekera gutyo gusa.

Nuko Kanjogera ageze kwa Nzigiye yakira icyifuzo cye, ariko aramubwira ati: ”Yego, ibyo umbwira ndabyemera, ariko urabanza unyereke uko mu nda hawe hasa”. N’ubwo Nzigiye yabinyujije mu kinyiranyindo, ariko yashakaga kusaba ko baryamana ngo abone uko amuhakirwa kwa Rwabugili.

Nuko Kanjogera yibuka ibyo Nzigiye yamukoreye amateranya n’umugabo we Rwabugili, uburakari buramutaha, ibyo Nzigiye amusabye arabimwima. Ku mutima aribwira ati ”Ikigabu cy’umugabo ntikigaburirwa undi”. Nubwo nabaye intabwa ariko sinageza aho kwendwa n’umutware w’umuhemu kandi ndi umugore w’ibwami! Uburakari bwa Kanjogera bwamwunguye ubwenge, bituma yunguka igitegerezo gishya atariyakagize na mbere hose.

Nuko Kanjogera aragenda asanga muramukazi we Kalira ka Rwogera wari mushiki wa Rwabugili nyine, amutekerereza amakuba yahuye nayo n’aho bimugejeje ku kuba asigaye asuzugurwa n’abatware ba Rwabugili. Kalira, aramuhumuriza, ati ”Reka nkwereke uko ikibazo nkigukemurira”.

Kalira ka Rwogera waribuwe mu nganzo y’indirimbo ziherekejwe n’inanga, aragenda amuhimbira indirimbo azatura Rwabugili, ariyo yiswe ”Imitoma” mu mateka y’u Rwanda. Amagambo agize iyi ndirimbo ni Kalira wayahimbye ayiha Kanjogera ngo ayiture Rwabugili, irimo amagambo meza yuje urukundo.

Yayihimbye mu buryo amagambo ayigize ari nka Rwabugili uyabwira Kanjogera. Ariko akaba ahanganywe ihangabuhanga rihanitse ryibutsa Rwabugili ibihe byiza yagiranye na Kanjogera kuva bashakana Kanjogera ari umwangavu Rwabugili ari umugabo w’igikwerere. Rudakemwa rwa Sakufi wari inzobere mu gukirigita inanga, ni we wacuranze imirya y’inanga ayihuza n’amagambo y’iyo ndirimbo ”Imitoma”.

Nuko Kanjogera afata inzira ajya kwa Rwabugili ati nashaka anyice ariko ngiye kumureba tu! Nuko aravunyisha, babwira Rwabugili yemera kumuha ikaze. Mu kwinjira aho Rwabugili atetse, Rudakemwa rwa Sakufi yinjirana umurya w’inanga naho Kanjogera akora mu muhogo aririmbira Rwabugili.

N’ubwo iyi ndirimbo ari iya kera, ishobora kuba yarongerewemo amagambo amwe n’amwe atekerereza Rwabugili ayo yakabwiye Kanjogera hakurikijwe umubano mwiza bagiranye uzwi mu mateka y’u Rwanda. Kuko n’ubundi yamwibutsaga urukundo n’umubano mwiza bagiranye.

Nuko Rwabugili anyurwa n’amagambo agize iyo ndirimbo n’umurya w’inanga wa Rudakemwa wari uyaherekeje, bimukora ku mutima ibi by’ihabya!. Rwabugili atumaho Nzigiye aza shishi itabona! Bamutegeka gusenya umuba w’inkwi, akizigeza ibwami Rwabugili ati: ”Zicane” Nzigiye arazicana ivu ryuzura mu mbuga. Rwabugili amutegeka kuriyora ajya kurimena, Nzigiye arayora ajya kumena.

Nuko Rwabugili abwira Nzigiye ati ”Guhera ubu ubaye umugaragu wa Kanjogera azajya agutuma gutashya ndetse n’ivu uzajya ujya kuriyora”.

Rudakemwa rwa Sakufi, agororerwa kuba mu bataramyi b’ibwami bazajya bafatanya gutegura ibitaramo byizihiye umwami. Mu mateka y’u Rwanda hakaba haragiye hagaragara zimwe mu ndirimbo yagiye akorana n’abagore ba Rwabugili batandukanye nyuma ya Kanjogera.

Uko imyaka yashiraga indi igataha niko iyi ndirimbo yakomeje kwamamara ku bw’amagambo meza ayigize. Nyuma ya Kanjogera iyi ndirimbo yaje gusubirwamo na Mahwehwe se wa Rujindiri mu ntango yo mu wa 1900, aza kuyiraga umuhungu we Rujindiri Berinarudo mu wa 1974, ari na bwo yayishyikirije Radiyo Rwanda. Nyuma y’aho mu wa 2014 ni bwo Intore Masamba Alphonse yongeye kuyisubiramo ayita:”Kanjogera Injonge”.

Intore Masamba Alphonse wasubiyemo indirimbo "Imitoma" ayita "Kanjogera w'Injonge"

Uko yaririmbwe na Rujindiri

Uko yaririmbwe na Massamba Intore


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .