Amavu n’amavuko y’izina ry’umurwa mukuru w’u Rwanda ‘Kigali’

Yanditswe na Dufitumukiza Salathiel
Kuya 13 Nzeri 2020 saa 08:52
Yasuwe :
0 0

Aho Abanyarwanda bava bakagera byagorana kubona muri bo utarumva izina ‘Kigali’ kuko ryamaze no kwambuka rirenga imbibi z’u Rwanda aho n’abanyamahanga basigaye birahira uyu murwa mukuru w’u Rwanda kubera impamvu zitandukanye zirimo umutekano,isuku, kugendera ku mategeko no korohereza ishoramari.

Gusa nubwo inshuro abantu bavuga izina ‘Kigali’ bakanaryandika zitabarika, abenshi ntibazi inkomoko y’iri zina n’uburyo ryaje guhabwa umurwa mukuru w’u Rwanda.

Mu miterere y’ururimi, izina bwite ry’ahantu cyangwa ibidukikije riba rifite imvo n’imvano, n’ibisobanuro byaryo mu rurimi ririmo. Abantu nibo bafite ububasha bwo guhanga izina ry’ahantu cyangwa ikintu bitewe nuko ari bo n’ubundi bakoresha ururimi.

Izina “Kigali” wumva, uvuga, cyangwa ugasoma mu nyandiko kenshi, na ryo ntiryahozeho. Muri make ntiryaremwe n’Imana ahubwo ni Umunyarwanda mwene Gihanga warihanze.

Umusizi akaba n’umuhanga mu mateka ya u Rwanda, Nsanzabera Jean de Dieu avuga ko “ izina Kigali ryahanzwe mu 1378 n’umwami witwaga Kigeli Mukobanya”; ubwo yari amaze gufata u Bwanacyambwe.

Uyu mwami ngo yahagaze ku musozi uzwi nka Mont Kigali yitegereza igihugu, ati”Igihugu ntikikiri udusozi duto, ahubwo cyabaye “Kigali.”

Kuva ubwo, uwo musozi yabivugiyeho witwa Kigali; izina ryaje kwaguka rikitirirwa agace kose uyu musozi uherereyemo.

Mu gisobanuro cyaryo,izina ‘Kigali’ ribumbatiye ingingo yo kwaguka. Bivuze ikintu cyagutse. Umwami Mukobanya yarivuze asobanura ko igihugu cyagutse.

Ibijyanye n’uturemajambo tw’izina ‘Kigali’

Urubuga newwordencylopedia.org rugaragaza ko rigizwe n’ibice bibiri.Hari agace kabanza(prefix),“Ki” gakomoka ku rurimi rw’abitwa “Bantu”; n’agace ka kabiri “Gali” kava mu rurimi rw’Ikinyarwanda bivuga “cyagutse”.

Bantu ni ihuriro ry’amoko asaga 400 yo muri Afurika abarizwa muri Cameroon, Afurika y’Epfo, Afurika yo Hagati na Afurika y’Iburasirazuba; ahuriye ku miterere y’indimi bavuga zijya kumera kimwe (Bantu languages), n’imigenzo bakora mu mico yabo.

Bivugwa ko aba ‘Bantu’ babaga muri Afurika y’Iburengerazuba mu myaka ibihumbi bine ishize n’ubwo hatemezwa neza impamvu yatumye bakwirakwira muri Afurika yose.

Kigali yari ubuturo bw’abami ahagana mu myaka ya 1700, yaje guhinduka Umujyi ahagana mu 1907; ubwo Umudage wayoboye u Rwanda bwa mbere mu gihe cy’ubukoloni, Richard Kandt yahashyiraga icumbi rye. Bivugwa ko yashingiye ku buryo hagaragaraga, kuba ari hagati mu gihugu no kuba hari umutekano.

Kugeza mu 1962 u Rwanda rubona Ubwigenge, Kigali yari ituwe n’abasaga ibihumbi bitandatu(6,000) biganjemo abacuruzi,ari nabwo hemejwe nk’umurwa mukuru w’u Rwanda.

Uyu mujyi wagiye waguka ubu ukaba ufite ubuso bungana 730 Km2 aho utuwe n’abaturage barenga miliyoni 1.6

Uretse kwaguka mu buso n’iterambere ry’uyu Mujyi ryarazamutse ubu ukaba uri mu yirahirwa ku mugabane wa Afurika.

Kigali yatangiye ari ahantu hato higanje ibikorwa by'ubucuruzi
Uko imyaka yagiye iza indi igataha Kigali yagiye itera imbere ubu akaba ari Umujyi uzwi mu ruhando mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .