00:00:00 IGIHE NETWORK KN KINYARWANDA EN ENGLISH FR FRANCAIS

Amateka y’Abakonde, Abagererwa n’Abahinza

Yanditswe na Nsanzabera Jean de Dieu
Kuya 6 April 2022 saa 07:42
Yasuwe :

Hari byinshi biboneka mu ruhererekane rw’amateka y’u Rwanda bigira ibyo byereka abatarayabemo nk’ikimenyetso cy’umurongo abakurambere bagararagaje mu kurwanira ishyaka ibihugu byabo ngo bibashe gushinga imizi mu ruhando rw’ibindi.

Muri iyi nkuru tugiye kubagezaho ibijyanye n’imiryango y’Abakonde, Abagererwa n’Abahinza, inkomoko z’amazina y’abo n’ibyarangaga imibereho yabo nk’uko tubikesha abanyamateka.

Abakonde

Abakonde bari abantu b’abavantara bagiye batura kuri ubu butaka bw’u Rwanda babanje gutema amashyamba bagashyiraho imbibi maze igiteme bakakizitiza ibiti by’imiko n’imivumu cyangwa urusasa. Aho hantu bazitiye bakahita ubukonde ari na ho hakomoka izina ryabo.

Abasinga n’Abazigaba batuye mu Rwanda bwa mbere hakiri mu mashyamba ni bo biganjemo Abakonde, bigabanyijemo imiryango, umwe ukagira icyanya cyawo undi icyawo, ukaba ari na ho uhigira.

Izina Abakonde ryari rishatse kuvuga ba nyirubutaka (Ababufashe bwa mbere). Abakonde bagiraga ituro ry’umutware w’umusangwabutaka wabo nk’umukuru w’umuryango ryitwaga ‘Urwugururo’ kugira ngo babone uburenganzira bwo gukonda ishyamba cyangwa kwagikamo imizinga.

Mu gihe ituro ryabaga ritatanzwe imizinga yaraseswaga cyangwa imyaka ikononwa.

Iyo Abakonde bamaraga gutura no kugwiza amaboko, abakuru b’imiryango babaga abami bakagira n’ingabo zabo. Abazigaba bakagira umwami wabo, Abagesera bakagira uwabo bityo, bityo.

Igihugu cyabaga kinini ari uko Ingoma y’Umukonde runaka irusha abandi ishyamba. Umwami wese yakondeshaga ishyamba rye, ryarangira agahinira aho, akahatera urubibi rw’amateke cyangwa rw’ibikangaga.

Mu miryango y’Abakonde, ni ho dusangamo ibyiciro by’Abakonde b’Abahennyi ari bo bavumaga ibyonnyi, Abakonde b’Abahaditsi ari bo bavuraga amatungo bagatanga n’amasubyo y’ibyorezo by’indwara. Abakonde b’Abavubyi n’Ab’impinga bari bihariye cyane umwuga w’ubupfumu no guhanurira bene wabo.

Abakonde bari biganje mu turere duteganye n’ibirunga, mu Burengerazuba bw’u Rwanda, mu Majyepfo yarwo, mu Rwanda rwo hagati aho bagarukiraga kuri Nyabarongo bagabana n’ingoma y’i Gasabo y’Abanyiginya.

Bageze n’ubwo bambuka Nyabarongo basatira u Burasirazuba bw’u Rwanda, batangira kuhahanga ibihugu nk’u Buliza n’u Bwanacyambwe.

Abagererwa

Abagererwa bari rubanda rw’abadeshyi bisungaga Abakonde ari bo ba nyirubutaka kugira ngo babone uko bahinga. Bitwaga Abagererwa, bivuye ku murimo bakorerwaga wo kugenerwa aho bahinga, babakatira ibyate byabo kuri buri muntu ariko bakagirana amasezerano y’insokeshwa.

Insokeshwa cyabaga ari icyatamurima cyatangwaga ku mwaka ku musaruro. Insokeshwa yabaga ari isuka, ihene cyangwa se imyaka.

Imiryango y’Abagererwa yari yiganje cyane mu Basinga b’Abanukamishyo kuko ari bo baje gutura mu Rwanda nyuma, bagasanga Abasinga b’Abasangwabutaka barigaruriye ubutaka.

Abakonde n’Abagererwa baturaga hamwe, bakiremamo ibisagara ku butumburuke bw’imisozi, imibande igahingwa, ibyanya bikaragirwamo amatungo, urusasa rugacinyira ingo. Imiryango yamaraga kugwiza amaboko ikitoramo umwami, n’Ingoma ngabe yabaga ari nk’isoko y’umutekano w’abaturage n’inganzo y’uburumbuke bw’igihugu ikna ikirango cy’igihugu kiganje. Umwami akaba umuhuza w’ingoma na rubanda. Iryo ni ryo hererekanya ry’imibereho y’abakurambere mu miryango y’imbanza yitwaga Abagererwa.

Abahinza

Izina Abahinza ryakomotse ku ngoma zo mu Majyaruguru y’Uburengerazuba bw’u Rwanda Rugari rwa Gasabo, Amajyepfo no mu Rwanda rwo hagati.

Abami b’ibyo bihugu bibandaga cyane ku buhinzi, ari na yo nkomoko y’izina ryabo, imihango gakondo y’umuco ikomoka ku mbuto no ku buhinzi. Biswe Abahinza ku mwaduko w’ingoma Nyiginya bivuze abo rubanda rukesha ibikomoka ku mbuto n’ubuhinzi cyangwa abafite ubukungu bushingiye ku musaruro w’ubuhinzi gusa.

Bwari n’uburyo bwo kwerekana isumbwe ingoma Nyiginya irusha ingoma Mpinza ndetse bikanagaragaza itandukaniro ry’imirimo bitagaho cyane. Ingoma Nyiginya yitaga ku bworozi cyane cyane inka.

Mu bihe by’ibitero byo kwagura u Rwanda mu ntango y’ingoma ya Ruganzu Bwimba ahasaga mu wa 1312, izina ry’Abahinza ryahinduriwe igisobanuro bitewe n’ibihe igihugu cyari kirimo nuko bitwa “Ibyigomeke’’ biturutse ku kugomera umugambi Gihanga yasize ahanze wo guhuza ibihugu 29 bikaba igihugu kimwe gisangiwe na bose.

Abasesekaye mu Rwanda bwa mbere bagatema amashyamba bakayahangaho ibihugu, ni bo biswe Abakonde mu mateka y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .