Amaraso y’ubutwari bw’Abanyarwanda, umuzi nkomoko w’impeta z’ubutwari (Igice cya kabiri)

Yanditswe na Nsanzabera Jean de Dieu
Kuya 31 Mutarama 2019 saa 10:41
Yasuwe :
0 0

Nk’uko twabibasezeranyije mu gice cya mbere k’iyi nkuru, tugiye gusubukurira aho twagereje tubatekerereza amateka y’impeta z’ubutwari n’izindi ngororano zahabwa intwari mu Rwanda rwo hambere.

Nk’uko tubikesha igitabo “Intwari z’imbanza zubatse u Rwanda rugahamya igitinyiro’’ cyanditswe n’Umusizi Nsanzabera Jean de Dieu, umwanditsi w’Amateka n’inzobere ku muco n’ubuvanganzo, tugiye kubataturira amateka y’uruhererekane rw’impeta z’ubutwari mu Rwanda rwo ha mbere zahaye imbaduko Abanyarwanda bo muri ibyo bihe, barushaho kwatanya bajya imbere, besa imihigo yuje ubutwari n’ubudahangarwa.

Nyuma yo gushyiraho impeta z’ishimwe ku ntwari zagaragaje ubudasa mu bitero byo kwagura igihugu, Ruganzu Ndoli yashyizeho n’izindi ngororano zahabwaga Ingabo iyo ariyo yose yatsinze urugamba, kabone n’ubwo yaba itari mu rwego rw’abahabwa Imidende, Impotore cyangwa se Abacanye Uruti.

Ingororano zagabirwaga Ingabo zatsinze urugamba ndetse n’ibigwari byaruhunze ni izi zikurikira:

Inka y’Umuheto: Yagororerwaga ingabo yose yagabye urugamba ikarutsinda n’ubwo yabaga nta mubisha yatsinze mu itsimbiro.

Inka y’umuheto kandi yagabirwaga ibitsimbanyi byose byagize uruhare mu gutunga ingabo ku rugamba no gushorera iminyago. Hakaba n’ibindi byatangwaga ku babaye ibigwari mu rwego rwo kubashakamo akayihayiho ku butwari mu majya yabo.

Ababaga babaye ibigwari bahabwa inka y’Imirindi. Mu rugamba rwose habamo intwari hakabamo n’ibigwari, habamo abarwitabira hakaba n’abaruhunga. Inka y’Imirindi yagabirwaga ibigwari byose byahunze urugamba, mu buryo bwo kugira ubwoba bagatoroka, cyangwa se mu buryo bwo kutarwitabira, ntibanitabire uwo muhamagaro.

Nubwo ibigwari byahabwaga inka imeze kimwe n’iy’intwari, bwari uburyo bwo kunenga mu kinyabupfura kw’Abanyarwanda. Icyatandukanyaga izo nka ni izina gusa, kuba warahawe Inka y’ubutwari undi agahabwa Inka y’ubugwari, ntabwo mwakwishima kimwe. Guhorana iryo pfunwe ryonyine byatumaga bikosora nabo bagahamya ubutwari.

Akeso k’isoni: Mu Rwanda rwo ha mbere, bagiraga ibikoresho bifashishaga mu gupima ibisukika ndetse bakabyifashisha mu gusangiriraho ibinyobwa. Muri ibyo bikoresho habagamo Intango, Ikibindi, Urweso n’Akeso, uko byatandukanaga mu mazina, ni nako byabaga bitangana no mu bunini.

Intwari zasangiriraga ku ntango cyangwa se ibirori byahuje abantu benshi. Intango yari mu bwoko bw’ibibumbano, ingana n’ikibindi kinini cyane (Kijyamo Ijerekani hejuru y’eshatu). Ikibindi cyo cyasangirirwagaho n’abantu bake bahuriye mu birori biciriritse cyangwa se imiryango itifite cyane (Kijyamo Ijerikani), hakaza n’urweso byashyiragamo amazi ariko abatindi bakanarusangiriraho ibinyobwa.

Ikigwari ntabwo cyasangiriraga hamwe n’abandi ku ntango, nticyasangiriraga na rubanda ruciriritse ku kibindi, yemwe no ku rweso rw’abatindi, nticyabashaga kurusomaho.

Ahubwo mu rwego rwo kugaya ubugwari bwa bamwe, mu gihe intwari zabaga zisangirira ku ntango y’abahizi, ibigwari babishakiraga akeso akaba ariko basangiriraho, kuko babaga babuze ubutwari, bakabura no kuba rubanda rwa giseseka kuko bananiwe kumaranira igihugu cyabo.

Ibigwari byanyweraga ku keso ka byonyine ariko kiswe ‘akeso k’isoni’ mu rwego rwo kubereka ko babaye ibigwari badakwiriye gusangirira n’abandi ku ntango, nabo bakagasomaho n’isoni nyinshi zivanze n’ikimwaro cy’uko ntacyo bamariye igihugu.

Kubera izo ngororano zose, zaba izahawe Impotore, uwahawe Umudende, Uwacanye uruti, uwahawe Inka y’Umuheto n’uwahawe Inka y’Imirindi zatumaga uwagize ubutwari abiratira abandi mu kivugo cyabimburiraga kandi kikanasoza ikintu cyose avuze. Ibyo byatumaga umunyarwanda wese aharanira kuba Intwari bityo agashira ubwoba ku rugamba.

Gutanga impeta z'ishimwe byatumye u Rwanda rubona abana benshi bagana mu itorero kugira ngo bigiremo ibyo kuba Intwari n’imyitozo njyarugamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza