00:00:00 IGIHE NETWORK KN KINYARWANDA EN ENGLISH FR FRANCAIS

Amabanga y’umubano wihariye wa Rwabugili na Rwakagara washibutsemo gushyingirana

Yanditswe na Nsanzabera Jean de Dieu
Kuya 25 Nzeri 2022 saa 08:32
Yasuwe :

Rwakagara rwa Gaga, ni umwe mu bakurambere bakomoka mu muryango mugari w’Abega mu nzu y’Abagaga, wamamaye cyane kubera ibikorwa bye byo guhanganira u Rwanda, ndetse n’abamukomokaho baba ibihangange bikurizaho kurema inzu y’igikonyozi y’Abega b’Abakagara.

Ni umwe mu bagabo bagiranye umubano w’akadasohoka n’umwami Kigeli Rwabugili, bihesha abana be b’abahungu gutoneshwa ibwami, ndetse baba abagaba b’imitwe y’ingabo imwe n’imwe y’iyo ngoma.

Rwakagara yabayeho ku ngoma ya Mutara Rwogera akaba yari musaza wa Nyiramavugo Nyiramongi wari nyina wa Rwogera akamubera Umugabekazi. Ni umwe mu bagiriye imimaro myinshi ingoma y’u Rwanda, yaba iya Gahindiro yabyirutseho, iya Rwogera n’iy’umuhungu we Rwabugili.

Ibimenyetso ndangamateka byinshi bigaragaza ko mu ndunduro y’ubuzima bwe, ari umwe mu babaye inshuti magara na Rwabugili mu buryo bugaragara.

Rwakagara, ni we wakemuye impaka zari zateye urwijiji ibwami, nyuma y’itanga ritunguranye rya Rwogera wishwe n’igituntu, bikaza gushinjwa Rugereka rwa Byavu ko ariwe wamuroze, biza gukurizaho no kubahiga bukware, Abega b’Abagereka bashirira ku icumu, bikozwe na Murorunkwere nyina wa Rwabugili.

Mu itanga rya Rwogera, byari byitezwe ko umugabekazi Nyiramavugo Nyiramongi agomba kunyweshwa akabisa umukazana we Murorunkwere wa Mitali ya Cumu, akimana n’umuhungu we Rwabugili. Nk’uko imihango y’ubwiru yabigenaga, iyo umwami yatangaga mbere y’umugabekazi, umugabekazi yagombaga kunyweshwa (Kwicwa arogewe mu mata) kugira ngo abise umugabekazi mushya uramukiwe n’ingoma.

Nyiramavugo Nyiramongi yanze kunywa, kuko ari umwe mu bari bamaze gusobanukirwa n’ibanga ry’ubwiru bw’iyimikabami cyane cyane iby’inzira y’ikirogoto yamenyeshaga itanga ry’umwami. Mukuru we Mucyaho wa Gaga, yamubajije ikimubuza kunywa ngo abise umukazana we Murorunkwere ku ngoma, undi aramusubiza ati “Sinapfa ntabanje guhorera Inyarubuga [Rwogera].”

Abiru baramwihoreye kuko bamutinyaga cyane kubera ibyemezo bikakaye yagiye afata ku ngoma y’umuhungu we Rwogera, agahora ari umugore utinyitse cyane.

Yakomeje gushakishwa ngo anyweshwe ariko akomeza kubacenga. Musaza we yizeraga cyane Rwakagara ni we witangiye ingoma ya Rwabugili, maze agenza Nyiramongi amenya igihe ari mu rugo rwe, nuko aramusanga amufatana imbaraga, baramunywesha, urubanza rurangira rutyo.

Icyo gikorwa cy’indashyikirwa Rwakagara yakoze, ni kimwe mu byatumye azirikanwa na Rwabugili cyane kuva mu bwana bwe, kuko byabaye akiri umwana wari ufite imyaka 13 kuko yakijije urubanza rwari rwabuze gicibwa, bikamuhesha ingoma nta mahano abaye nk’ayo mu iyimikwa rya Semugeshi.

Murorunkwere yahise aca iteka riha Rwakagara umwanya mu bujyanama bwihariye bw’ibwami kubera icyo gikorwa yakoze kandi akaba ari n’Inararibonye yariye ingoma eshatu, yagira icyo ihanura ku mahano yose

Abazi amateka y’u Rwanda kandi bazi neza ijambo Rwakagara yavuze ubwo ibwami kwa Rwabugili hateraniraga inteko y’Abajyanama b’ibwami, kugira ngo hafatwe umwanzuro y’inkuru mbi yari imaze kuba kimomo ko Murunkwere atwite inda y’umugaragu we Serutegenya kandi kizira mu mabanga y’ubwiru ko Umugabekazi ashaka umugabo.

Byabaye ihurizo kuri Rwabugili akimara kubwirwa ko nyina Murorunkwere yaba atwite indaro ya Seruteganya. Mu gushaka igisubizo cy’iki kibazo yitabaje abasheshe akanguhe batatu bariye ingoma nyinshi z’abamubanjirije, barimo Remera, Rutuganshuro na Rwakagara.

Abo ni bo bahawe iryo hurizo ariko barihabwa mu bwiru nta n’umwe uzi icyo Rwabugili ashaka kugeraho. Remera na Rutunganshuro batanze inama yo kwica Seruteganya naho Rwakagara rwa Gaga, na we utari uzi iyo biva n’iyo bigana, avuga ko niba inzoka yiziritse ku gisabo, byaba byaba byiza iyo nzoka uyikanze ikavaho maze ukayica utamennye igisabo yari yizingiyeho, kuko gifite imiziro myinshi na byinshi kivuze mu mateka y’i Rwanda.

Iyo nama Rwakagara yatanze bwa nyuma, ni yo yageze ku nzoka umwami Rwabugili, imuremamo ikibatsi cy’umugambi wo gukiza nyina wari usumbirijwe n’ibinyoma by’abatarashakaga ko abaho.

Umumaro Rwakagara yagiriye Rwabugili, mu gukemura impaka z’iyimakabami ubwo yanyweshaga mushiki we Nyiramongi wari wanze kunywa ngo abise Umugabekazi mushya ku ngoma, igitekerezo yatanze cyo gukanga inzoka yihambiriye ku Gisabo ngo ikiveho bayice Igisabo kirokoke, ni byo byamuciriye icyanzu gihoraraho ibwami kwa Rwabugili akazajya ajyayo yisanga mu bihe byose yari akiriho. Binatuma ari umwe uvuga rikijyana muri ibyo bihe.

Indi neza ya Rwakagara, ni igihe Umwami Rwabugili yari yigunze wenyine mu bihe byo kwiraburira nyina watanze. Icyo gihe Rwakagara ni we watinyutse kwinjira ibwami ngo aze kumuhumuriza kubera akaga yahuye nako.

Rwakagara yinjiye ibwami yitwaje umukobwa we Kanjogera wari umwangavu, amuzaniye Rwabugili ngo ajye amuzanira igishirira anamutekerere itabi.

Uko Kanjogera yamunyuraga imbere anamuzaniye ibyo yamutumaga byose, uko yarushagaho kuzirika ibyo se yakoreye ingoma ye, byarushagaho gucana ikibatsi cy’urukundo Rwabugili yakunze Kanjogera. Biza no kuba n’amahire, ubwo Abiru baragurizaga umugore uzeza Rwabugili nyuma y’itanga rya nyina, inzuzi zerera Kanjogera wa Rwakagara.

Mu 1879, Rwabugili yakoze ubukwe ku mugaragaro bwo gushyingiranwa na Kanjogera bwabereye ku Ngara za Bumbogo ari na ho haje kuba urugo rukuru rwa Kanjogera na Rwabugili.

Ibi bikorwa bya Rwakagara, ni na byo byaharuriye inzira abahungu be bose uko ari 15, binjira byoroshye mu nda y’ingoma y’Abanyiginya yari itwawe na Rwabugili, bayibera abagaba b’imitwe y’ingabo, bayibera abatware, bayinywera igihango biyemeza kuyigwira no kuyivira.

Rwabugili yakunze cyane Rwakagara bitewe n'inama yagiye amuha ku ngoma ye kandi zikagira akamaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .