00:00:00 IGIHE NETWORK KN KINYARWANDA EN ENGLISH FR FRANCAIS

Umwihariko w’ivuriro ryo mu Bugesera ritanga ubuvuzi bw’amenyo bugezweho ku biciro bya mituweli

Yanditswe na Ndahayo Emmanuel
Kuya 27 Nzeri 2021 saa 09:44
Yasuwe :
0 0

Amenyo, kimwe n’akanwa muri rusange, ni urugingo rukenera isuku yihariye, rugakenera kwitabwaho mu buryo buhoraho kuko rufite ibyago byinshi byo kurwara mu gihe rutitaweho.

Muri Afurika, ndetse no mu Rwanda, ubu burwayi buri henshi. Mu 2018 mu Rwanda hakozwe ubushakashatsi ku ndwara zo mu kanwa, cyane ku ndwara z’amenyo.

Ubu bushakashatsi bwerekanye ko mu bantu babajijwe, 64,9% bari bafite ibibazo byo gushirira kw’amenyo, ikibazo kigaragara kuri 60% by’abana bose mu Rwanda.

Uretse gushirira kw’amenyo, hagaragajwe ko hari n’abandi bantu benshi bafite izindi ndwara zo mu kanwa, zirimo gucika kw’amenyo, kwangirika kw’ishinya n’ubundi burwayi bwibasira amenyo.

Icyakora igiteye impungenge mu Rwanda, ni uko 70,6% by’abafite uburwayi bw’amenyo, batigeze bajya kwa muganga kugira ngo bahabwe ubuvuzi bukwiriye.

Impamvu zishobora kuba nyinshi, zirimo kuba ubu burwayi butwara igihe kinini mbere yo kugira ingaruka zikomeye zigere ku muntu, bukaba ari uburwayi buhenze kuvurwa, busaba ibikoresho bigezweho ndetse n’abaganga b’inzobere.

Iki kibazo cy’ibikoresho n’abaganga bahuguriwe kuvura amenyo mu buryo bw’umwihariko, kiracyagaraga cyane mu Rwanda.

Nubwo indwara z’amenyo zishobora gutinda kugira ingaruka, zishobora guteza ibibazo bikomeye birimo cancer ishobora no kwica umuntu. Ibi ni byo Dr. Thomas B. Lee yabonye mu Rwanda ubwo yari yaje mu bikorwa by’ubukorerabushake, byo gutanga ubuvuzi bw’indwara z’amenyo ku Banyarwanda babukeneye.

Mu kiganiro na IGIHE, Dr. Lee yasobanuye uburyo yakozwe ku mutima no kubona ukuntu hari uburyo bucye bwo kuvura abantu, bigatuma abantu barembeshwa n’indwara ubusanzwe zakabaye zivurwa zigakira mu buryo bworoshye.

Yagize ati “Nakozwe ku mutima no kubona uburyo abantu bakeneye ubuvuzi bw’amenyo, byari bibabaje kubona ibibazo bito by’amenyo bishobora kuvamo ibibazo bikomeye byanahitana ubuzima bw’umuntu, kandi mu by’ukuri ari ibibazo byashoboraga kuba byarakize vuba iyo byitabwaho hakiri kare.”

Dr. Lee ni impuguke mu buvuzi bw’amenyo, kuko yabibonyemo impamyabumenyi y’ikirenga, Ph. D, yakuye muri Kaminuza ya California mu 1989, ndetse aza no kuba umwarimu muri kaminuza mu bijyanye n’ubuvuzi bw’amenyo mu Ishuri ry’Ubuvuzi bw’Amenyo muri Kaminuza ya California.

Nyuma yo kubona ikibazo cy’uburwayi bw’amenyo kiri mu Rwanda, Dr. Lee n’umugore we biyemeje kugira icyo bakora kugira ngo bagikemure, biyemeza kujya baza mu Rwanda gutanga ubuvuzi bw’amenyo ku buntu.

Dr. Lee yagize ati “Buri mwaka twazaga mu Rwanda, dukunda uburyo ari igihugu cyiza. Icyakora buri uko twazaga mu Rwanda, twarushagaho kubona ko abakeneye ubuvuzi bw’amenyo ari benshi, twajyaga mu cyaro tukibonera uburyo abantu barembejwe n’indwara ubundi zakabaye zivurwa byoroshye, ariko kubera kutegera abaganga, ugasanga ikibazo cyageze ku rwego rukomeye, bamwe tukababaga abandi tukabaha ubufasha dushoboye.”

Uyu mugabo usanzwe ari Umukirisitu, yavuze ko amaze kubona ko uburemere bw’iki kibazo, yafashe umwanzuro wo kuza gutura mu Rwanda, ashinga umuryango witwa ‘His Hands on Africa,’ kugira ngo agire uruhare mu gukemura ikibazo ‘cyahindutse umuhamagaro.’

Ati “Twaritegereje dusanga uyu ari wo muhamagaro wacu, maze nyuma y’uko abana bacu bakuze, njye n’umugore wanjye twiyemeje kugira uruhare mu kugabanya uburemere bw’iki kibazo, twiyemeza kuza mu Rwanda tukavura aba bantu beza kandi mu buryo bubahendukiye, kuko ubusanzwe ubuvuzi bw’amenyo burahenda cyane.”

Ivuriro ritanga serivisi ziri ku rwego mpuzamahanga

Dr. Lee yagiye mu biganiro na Minisiteri y’Ubuzima ndetse n’izindi nzego, maze ahabwa uburenganzira bwo gufungura ivuriro rivura indwara z’amenyo, rikorera mu Bitaro bya Bugesera mu Ntara y’Iburasirazuba. Ku bufatanye n’abandi bafatanyabikorwa bo muri Leta Zunze Ubumwe za Amerika, Dr. Lee yabashije kugura ibikoresho bigezweho byifashishwa mu buvuzi bw’amenyo.

Muri rusange iri vuriro rifite ibitanda bine biri ku rwego rwo hejuru, bishobora kwifashishwa mu kubaga indwara z’amenyo, ndetse ibi bitanda nabyo bifite amatara yabugenewe. Ni ivuriro rikoresha ikoranabuhanga, ariko bifite imashini gufotora iryinyo, ifoto yaryo igasesengurirwa kuri mudasobwa, ibishoboza Dr. Lee kubona buri kibazo iryinyo rifite, ndetse no kugira ibipimo bya nyabyo nko mu gihe agiye kuritaka cyangwa kurikorera ubundi buvuzi.

Iri vuriro kandi rifite icyumba gisukurirwamo ibikoresho byo kwa muganga kiri ku rwego rwo hejuru, ku buryo ibikoresho byakoreshejwe, bishobora gusukurwa mu gihe kitarenze amasaha abiri, mu gihe mbere byasabaga ko ibikoresho bijyanwa gusukurirwa ahandi, bikazagaruka nyuma y’amasaha 24.

Umuyobozi w’Ibitaro bya Bugesera, Dr. Rutagengwa William, yavuze ko ibikoresho byazanywe mu bitaro ayoboye biri ku rwego rwo hejuru, kandi byagize uruhare mu guhangana n’ikibazo cy’uburwayi bw’amenyo.

Ati “Ubu dufite ibitanda bine, bishyashya kandi bigezweho ku rwego mpuzamahanga, mbere twari dufite ibitanda bibiri kandi bitangiye gusaza. Ubu hano twavuga ko haboneka serivisi z’ubuvuzi bw’amenyo ubusanzwe zabonekaga zihenze cyane, izindi zikaboneka hanze y’igihugu, ariko tuzajya tuzitangira kuri mutuweli.”

Mu gihe gito iri vuriro rimaze ritangiye, umubare w’abarigana umaze kwikuba gatatu, ndetse biragaragara ko imibare iziyongera.

Dr. Lee yagize ati “Twishimira kwakira abatugana, biragaragara ko umubare w’abatugana uziyongera, turabyiteguye kuko turifuza kuzafungura andi mavuriro aciriritse mu bice byo mu cyaro, ku buryo abantu bashobora kubanza kuvurirwayo, ubundi abakeneye ubuvuzi bwisumbuye, akaba ari bo baza hano.”

Uretse kuvura, Dr. Lee ari gushaka uburyo azajya atoza abandi baganga, ku buryo niyo yaramuka atashye, abaganga basigaye bashobora gukoresha imashini ziri mu ivuriro ndetse na ‘software’ akoresha.

Ati “Tuzigisha abaganga benshi bashoboka, umwe kumwigisha bizajya bitwara nibura imyaka ibiri, turizera ko mu gihe abantu benshi bazarushaho kugira ubumenyi, bazajya gukora mu bitaro byegereye abaturage hirya no hino mu gihugu, bityo abantu benshi bivuze amenyo, kuko biba byiza kuyisuzumisha kabiri mu mwaka.”

Uyu muganga kandi ari mu bufatanye n’ibitaro bya Bugesera kugira ngo hatangire ubukangurambaga ku ndwara z’amenyo n’uburyo zakwirindwa, ubu bukangurambaga bukazahera mu bana bato ndetse mo mu batuye mu byaro.

Dr. Lee ati “Amenyo iyo yitaweho neza nta kiabzo agira, ariko kuyitaho neza biragora kubera ibyo turya, uburyo tuyasukura, imiti y’amenyo dukoresha n’ibindi. Ni byiza ko abantu bato bamenya uburyo bwo kwita ku menyo bakibyiruko, kuko uretse kuba yerekana ubwiza bwabo, kuyitaho biyarinda kuzangirika umuntu amaze gusaza, aho biba bigoye kuyavura.”

Hari ibintu byinshi bishobora kukwereka ko ufite ibibazo by’amenyo, birimo kubabara amenyo mu gihe ushyize mu kanwa ibintu bishyushye cyangwa bikonje, kuva amaraso mu gihe cyo kuyasukura cyangwa mu bundi buryo, gukoresha uruhande rumwe, guhindura ibara ry’amenyo n’ibindi byinshi.

Mu gihe ufite ibyo bimenyetso, ushobora kugana iri vuriro riri mu bitaro bya Bugesera, ukagenda witwaje mutuweli cyangwa ubundi bwishingizi. Ushobora kandi kwandikira iri vuriro binyuze kuri [email protected] kugira ngo uhabwe ubujyanama ku bijyanye n’ibibazo by’amenyo ushobora kuba ufite, ndetse unasabe gahunda yo kwivuza.

Dr. Thomas B. Lee ni inzobere mu buvuzi bw'amenyo, aho abifitemo impamyabushobozi ku rwego rw'ikirenga, Ph. D
Iri vuriro rifite ibitanda bishya kandi bigezweho, bishyirwaho abarwayi bagiye gusuzuma uburwayi bw'amenyo
Buri gitanda gifite ibikoresho bikenewe kugira ngo umuganga abashe kureba neza ikibazo kiri mu kanwa
Hari imashini zishobora gufotora mu kanwa, zikagaragaza ikibazo kiri mu ryinyo, ku buryo gishobora kuvurwa mu buryo bworoshye
Aka gakoresho kifashishwa mu gihe cyo gufotora harebwa ikibazo kiri mu menyo
Aya mashusho atuma umuganga abona neza ikibazo kiri mu ryinyo, ku buryo kwibeshya biba bigoye cyane
Amafoto yafashwe ashyirwa muri mudasobwa, ubundi agasesengurwa hifashishijwe software yabugenewe
Icyumba gisukurirwamo ibikoresho kiri ku rwego mpuzamahanga, ku buryo ibikoresho bisukurwa mu gihe kiri munsi y'amasaha abiri, aho kuba amasaha 24 nk'uko byahoze
Imashini zifashishwa mu gusukura ibikoresho biri ku rwego mpuzamahanga
Imashini yifashishwa mu kumisha ibikoresho bitandukanye
Ibikoresho bishobora gusukurwa mu gihe kiri munsi y'amasaha abiri bigahita bitangira gukoreshwa
Amenyo yangiritse ashobora gusanwa
Nyuma yo gusanirwa amenyo, ntushobora gukeka ko yigeze agira ikibazo
Dr. Lee akunze kujya gusuzuma amenyo y'abana ku mashuri
Dr. Lee ari kumwe n'umufasha we, bavuga ko ubu butumwa ari 'umuhamagaro'
Umuyobozi w’Ibitaro bya Bugesera, Dr. Rutagengwa William, yavuze ko ibikoresho byazanywe mu bitaro ayoboye biri ku rwego rwo hejuru
Iri vuriro riherereye mu Bitaro bya Bugesera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .