Ubushakashatsi bwagaragaje icyuho mu buvuzi bw’abavukana indwara zisaba kubagwa mu Rwanda

Yanditswe na Evariste Nsengimana
Kuya 29 Mutarama 2020 saa 10:30
Yasuwe :
0 0

Ubushakashatsi bwagarageje ko abana bavukana indwara zisaba kubagwa n’imiryango yabo bahura n’ibibazo bitandukanye birimo kuba umubare w’abaganga ukiri hasi, kuzigiraho ubumenyi buke, kubura amafaranga yo kwivuza n’ibindi bikeneye gufatirwa ingamba.

Ubu bushakashatsi bwamuritswe kuri uyu wa 29 Mutarama 2020 bwakozwe n’Ikigo cy’Ubushakashatsi n’Isesengurangamba (IPAR) ku bufatanye n’Ibitaro bya Kaminuza bya Kigali (CHUK) na Kaminuza ya Aberdeen yo muri Écosse.

Bwakozwe mu buryo bwo kuganira n’imwe mu miryango yabyaye abana bafite izi ndwara hagamije kureba imbogamizi bagira mu rugendo rwo kwivuza, mu mibereho n’ahandi n’uburyo zashakirwa umuti.

Izi ndwara zikunze kwibasira ibice by’urwungano ngogozi, guhera mu kanwa aho ibiryo byinjirira kugera aho bisohokera [mu kibuno], imyanya myibarukiro, ubuhumekero n’ibindi bikabaho mu iremwa ry’ibice by’ingingo z’umubiri w’umuntu.

Urugero ni nk’igihe umwana avutse adafite aho yitumira hasanzwe ku muntu udafite ikibazo, iki gihe bisaba ko umuganga w’inzobere amubaga, akamushakira uwo mwanya kugira ngo abashe kuba yabikora nk’abandi.

Umuyobozi wa IPAR, Kayitesi Eugenia, yavuze mu Rwanda ababyeyi benshi izi ndwara bazifata nk’izidakira, ziterwa n’amadayimoni n’ibindi kandi zishobora kuvurwa.

Ati “Ababyeyi baca mu bibazo byinshi iyo bafite aba bana. Abenshi barabihisha ntibabivuge, abandi bakumva ari indwara umwana agomba gupfana nayo. Ikindi kubavura biragorana. Ubushakashatsi icyo bwabonye ni uko 85% mu bihugu bikennye bavukana ubu burwayi bashobora kubagwa ariko twabonye ko ababyeyi badafite ubushobozi bwo kuvuza aba bana, dufite umuganga umwe ushobora kubaga izi ndwara.”

Ibi bisobanuye ko umwana wukanye iki kibazo bisaba ko azanwa mu Bitaro bya CHUK, bikamusaba gutega imodoka, gucumbika, kurya n’ibindi.

Ubu bushakashatsi bwerekanye ko nibura umwana umwe atangwaho amafaranga ari hagati y’ibihumbi 58 Frw n’ibihumbi 600 Frw bitewe n’inshuro yagiyeyo mu gihe ikiguzi cyo kuvura indwara imwe muri izo kikubye inshuro enyi z’ikiguzi cy’izisanzwe nka Malaria.

Ababyeyi b’abagore babyara aba bana kandi ngo bakunze gutereranwa, rimwe na rimwe abagabo bakabata bashinjwa ko aribo ntandaro yo kubyara umwana utuzuye.

Inzobere mu kubaga indwara z’abana zivukanwa ukorera muri CHUK, akaba ari na we gusa ubizobereyemo mu Rwanda, Dr Ntaganda Edmond, yavuze ko nibura 20% biba byoroshye ko babazwe bakiri impinja ikibazo cyakemuka, ingingo zabo zigakora nk’ibisanzwe.

Ati “Hari n’abandi bifata bisaba kuzavurwa mu byiciro. Abo rero ni nabo ubu bushakashatsi bwakurikiranye, aho usanga bazakenera kuza kwa muganga inshuro nyinshi kubera ko bavurwa mu byiciro.”

Inama zitangwa n’abakoze ubu bushakashatsi ni uko Leta yakora ibishoboka umubare w’abaganga b’inzobere mu kuvura izi ndwara ukiyongera, kuzamura umubare w’abafite ubwishingizi mu kwivuza kugira ngo byorohe kwivuza, abaganga bagakurikiranira hafi umwana uvuze agasuzumwa kare, gushishikariza ibigo by’abikorera kugoboka abarwaje igihe bagiye kwivuza n’ibindi.

Ibitaro bya CHUK bizobereye mu kuvura izi ndwara bigaragaza ko ku mwaka byakira abazirwaye barenze 1000 ku mwaka, hagati ya 400-500 bakenera kubagwa.

Bamwe mu bitabiriye imurikwa ry'ubu bushakashatsi
Dr Ntaganda Edmond uzobereye mu kubaga indwara abana bavukana yavuze ko abazivukanye benshi bisaba kwivuza igihe kirekire
Umushakashatsi wa IPAR, Roger Mugisha, ari gusobanurira itangazamakuru ibyavuye mu bushakashatsi
Umuyobozi wa IPAR, Kayitesi Eugenia, yavuze mu Rwanda ababyeyi benshi izi ndwara bazifata nk’izidakira
Nyuma yo kumurika ubushakashatsi bafashe ifoto y'urwibutso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .