Ubuhamya: Uko Uwimana yashaririwe n’ubuzima nyuma yo kurwara igituntu ari umumotari

Yanditswe na Evariste Nsengimana
Kuya 28 Werurwe 2019 saa 03:16
Yasuwe :
0 0

Uwimana Jean d’Amour, umugabo wo mu Murenge wa Gacurabwenge mu Karere ka Kamonyi, avuga ko yashaririwe n’ubuzima nyuma yo kurwara igituntu atwara abantu kuri moto, kugera ubwo inshuti n’abavandimwe bamuhaye akato bakeka ko yanduye virusi itera Sida.

Mu kiganiro yahaye IGIHE, uyu mugabo uri mu kigero cy’imyaka 30 yavuze ko akora akazi ko gutwara abagenzi kuri moto mu mujyi wa Kigali umwaka ushize, yafashwe n’inkorora idasanzwe ntiyamenya niba ifitanye isano n’igituntu.

Yatangiye kugura imiti yayo muri farumasi ariko akabona ntiyoroha, arushaho kunabuka kuko yamufashe afite ibiro 60, mu kwezi kumwe gusa asigarana 45 kandi arya ibikungahaye intungamubiri.

Yabajije umukozi wa farumasi yaguragamo imiti, amugira inama yo kujya kwisuzumisha ku kigo nderabuzima kimwegereye akamenya ikibazo afite.

Ati “Akimara kubimbwira, nahise ndeka akazi kuko numvaga nta mbaraga mfite, narananutse cyane, numva mu bihaha mpumeka nabi kandi ncika intege ku buryo iyo nagendaga n’amaguru ntarengaga metero 20 ntaricara.”

Uwimana yahise ataha iwabo mu Karere ka Kamonyi ahageze abantu batangira kumwibazaho kubera uburyo yari yarananutse, bakamuha akato.

Ati “Mpageze kubera ko bamperukaga ndi umusore mfite ibiro byinshi, nta kibazo mfite batangira kumbwira ngo nanduye Sida, ngo ‘Ubwo ni Sida uvanye i Kigali’ abandi bati ‘barakuroze!”

Yariyakiriye ariko ntiyacika intege! Yahuye n’umujyanama w’ubuzima amushishikariza kwisuzumisha, agiyeyo bamupima Sida, barayibura, bamusaba gutanga igikororwa.

Ati “Kubera ko nari nararembye ari ukunsindagiza, nabwiye umujyanama ko nta mbaraga mfite zo kuhagaruka nti ‘ariko wazambwira ibizamini niba barabonye indwara.”

Ikigo nderabuzima cyahamagaye uwo mujyanama w’ubuzima kimumenyeshanya ko ‘Uwimana arwaye igituntu’ amusubizayo kugira ngo atangire kwitabwaho.

Uyu mujyanama w’ubuzima yahawe imiti yo guha Uwimana mu gihe cy’amezi abiri kuko we nta mbaraga yari afite zo kuyinywa uko bikwiye.

Uwimana ati “Amezi abiri ashize numva ntangiye kuzana imbaraga, ntangira kujya kuyifatira. Ubu nayinyoye amezi atandatu numva ndakize rwose mbaye umusore, ubu nasubiye mu kazi.”

Uwimana ashima uburyo yafashijwe guhabwa imiti y’igituntu ku buntu, abaganga n’umujyanama w’ubuzima bamubaye hafi mu gihe ubuzima bwari bumushaririye.

Ati “Ubutumwa mpa abantu ni uko mu gihe bumva bafite inkorora irengeje ibyumweru bibiri bajya kwa muganga bakipimisha, babona indwara bagakurikirana imiti neza. Igituntu ni indwara nk’izindi, ukirwaye aravurwa yanywa imiti neza agakira.”

Uwimana avuga ko yatangiye kwivuza nyuma y’ukwezi n’igice abonye ibimenyetso by’igituntu birimo inkorora, kubira ibyuya nijoro, kunanuka no kumva adahumeka neza.

Mu myaka itanu ishize mu karere ka Kamonyi hagaragaye abarwaye igituntu basaga 220 ariko bose baravuwe barakira.

Mu 2018, ishami rya Loni ryita ku buzima ryatangaje ko abanyarwanda 57 ku bihumbi 10 (hafi 6900) bari barwaye igituntu mu gihe mu mwaka wawubanjirije bari 64 ku bihumbi 10 (hafi 7680). Muri uwo mwaka abasaga 580 bishwe n’igituntu mu Rwanda.

Uko Uwimana yashaririwe n’ubuzima nyuma yo kurwara igituntu ari umumotari

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza