Abarokotse Jenoside yakorewe abatutsi mu Karere ka Rulindo, bafite indwara basigiwe na yo, bagiye kuvurwa n’inzobere z’abaganga baturutse ku Bitaro bya Gisirikare by’i Kanombe.

Ku bufatanye bw’Ikigega cya Leta gitera inkunga abarokotse Jenoside batishoboye(FARG) na Minisiteri y’Ingabo kuva tariki 1 Kamena 2014, ni bwo inzobere z’abaganga baturutse kuri ibi btaro bya Gisirikare bazavura abaturage barootse muri Rulindo basigiwe indwara na Jenoside.

Abarokotse Jenoside bavuwe mu Karere ka Gatsibo/ Photo MoD

Ikipe itegura iki gikorwa yagiranye ikiganiro n’ubuyobozi bw’Akarere ka Rulindo tariki ya 19 Gicurasi 2014.

Umuyobozi w’Akarere Rurindo Kangwagye Justus, yashimiye abateguye iki gikorwa abizeza inkunga y’akarere mu guharanira ko kizagena neza.

Kangwagye Justus yabwiye IGIHE ko iki gikorwa cyari gikenewe agira ati” Kizabera ku kigo Nderabuzima cya Kanyinya mu Karere ka Nyarugenge, hamwe no ku biro bya Rutongo”.

Akomeza avuga ko abazajya kwivuza baturutse hirya no hino mu mirenge y’Akarere ka Rurindo, hateganyijwe uburyo bazagera aho iki gikorwa kizabera kandi ko abo bizaba ngombwa ko barara, bazacumbikirwa.

Yagize ati “Ibyo byose byarateganyijwe, abarokotse batishoboye bazafashwa ku buryo bwose”.

Umuyobozi wa FARG Theophile Ruberangeyo, yavuze ko igikorwa cyo kuvura abafite indwara zikomeye kurusha abandi kimaze imyaka 2, bikaba byaratangiriye ku turere dufite abacitse ku icumu benshi kandi bababaye kurusha abandi.

Yasabye abayobozi ubufatanye, kuko hari uturere bitagenze neza bitewe no kutagira ubufatanye mu gihe Rulindo ari akarere ka 20 kazahabwa ubu buvuzi.

Abaganga bazahagera ku itariki ya 1 Kamena batangire imyiteguro, kuvura bitangire ku itariki ya 2 Kamena 2014.

Igisabwa abarwayi ni icyangombwa kigaragaza ko barokotse Jenoside yakorewe Abatutsi n’ ikarita ya mituweri. Kuvura bizamara iminsi 5 ariko abarwayi bakaba bagirwa inama yo kuza kare, kuko hari aho bizaba ngombwa ko bavurwa iminsi irenze 1 bitewe n’uburwayi bafite.

Iki gikorwa kiba inshuro enye buri mwaka kikaba gikorwa hibandwa ku ndwara z’ibyorezo hifashishije ubwisungane mu kwivuza buhendutse.

[email protected]