Minisante yakanguriye abagabo kujya bisuzumira abagore kanseri y’ibere

Yanditswe na Evariste Nsengimana
Kuya 3 Gashyantare 2019 saa 12:22
Yasuwe :
0 0

Minisitiri w’Ubuzima, Dr. Gashumba Diane, yavuze ko hari ibimenyetso by’ibanze abantu bashobora kubona ku mabere yabo, bikababurira ko bashobora kurwara kanseri y’ibere, ashishikariza n’abagabo kujya basuzuma abagore babo.

Yabigarutseho kuri uyu wa 3 Gashyantare, ubwo hizihizwaga umunsi mpuzamahanga wahariwe kurwanya Kanseri, igikorwa cyahujwe na Siporo rusange.

Abitabiriye iyi Siporo rusange yabereye ku Kimihurura mu Mujyi wa Kigali, babwiwe ibimenyetso, ibitera n’uko bakwirinda kanseri zitandukanye ndetse ababyifuza barayisuzumwa.

Dr. Gashumba yavuze ko kanseri y’ibere umugore ashobora kuyisuzuma itaramugera kure, buri gitondo akumva niba nta tubyimba turimo, niba ritahinduye ibara cyangwa imoko yinjiye mu ibere.

Ati “Ibyo rero iyo ubibonye uhita wihutira kujya kwa muganga kugira ngo batazasanga kanseri yarakurenze.”

Dr. Gashumba yavuze ko atari abagore gusa bagomba kwisuzuma kanseri y’ibere ahubwo n’abagabo babo bagomba kubasuzuma.

Ati “N’abagabo mushobora gusuzuma abagore banyu kanseri y’ibere. Ukareba buri gitondo, ese ibere ry’umugore ntabwo ryahinduye ibara, ukarikanda ukareba ko nta tubyimba turimo. Mujye mumenya uko abagore banyu bateye, murebe ko imoko itinjiyemo, umubwire uti ‘nyabuneka tujye kwa muganga”.

Dr. Gashumba yababwiye ko mu bitera kanseri bagomba kwirinda harimo kunywa inzoga n’itabi, kurya ibiryo birimo amavuta menshi ahubwo bakitabira gukora siporo ngororamubiri no kwisuzumisha hakiri kare.

Kuri Kanseri y’inkondo y’umura ishobora gufatira abagore mu mibonano mpuzabitsina, Dr. Gashumba, yavuze ko mu Rwanda hari urukingo rwayo ariko ko ruhabwa abakiri bato gusa.

Umugore urwaye kanseri y’inkondo y’umura arangwa no kuva amaraso kandi atari mu mihango no kubabara mu kiziba cy’inda.

Hakizimana Alexis, w’imyaka 40 wari witabiriye iyi Siporo, yabwiye IGIHE ko atari azi ko Kanseri y’ibere, umuntu yayisuzuma ariko agiye kujya abikorera umugore we.

Ati “Ntabwo nari mbizi ariko nk’uko Minisitiri yabidushishikarije, numvise byoroshye ku buryo abagore bajya bisuzuma ariko n’abagabo tukabafasha, twabona hari impinduka zabaye, tukihutira kubajyana kwa muganga.”

Umuyobozi ushinzwe gahunda yo kurwanya Kanseri mu ishami rishinzwe indwara zitandura mu mu kigo cy’igihugu cy’ubuzima (RBC), Dr. Uwinkindi François, yavuze ko nta bushakashatsi bwimbitse burakorwa ku ndwara za kanseri ariko ko abisuzumisha bakiri bacye.

Yavuze ko umubare w’abisuzumisha utararenga 2000 ku mwaka ariko ugereranyije n’umubare w’abanyarwanda bose, nibura abasaga 10700 bazirwara buri mwaka, abagera ku 7000 zikabica.

Kanseri ziza ku isonga mu Rwanda harimo iy’inkondo y’umura, iy’ibere, iy’amara n’iy’igifu.

Ishami ry’umuryango w’Abibumbye ryita ku buzima (OMS), rigaragaza ko mu 2018 kanseri zishe abarenga miliyoni 9.6 muri miliyoni 18.1 by’abari bazirwaye.

Umunsi wo kurwanya Kanseri wahujwe na siporo rusange
Minisitiri w’Ubuzima, Dr. Gashumba Diane, yavuze ko hari ibimenyetso by’ibanze abantu bashobora kubona ku mabere yabo
Ababishaka basuzumwe ibimenyetso bya Kanseri

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza