00:00:00 IGIHE NETWORK KN KINYARWANDA EN ENGLISH FR FRANCAIS

Kumva cyangwa kubona ibidahari, uburwayi bwibasiye benshi ariko buvurwa

Yanditswe na Mugisha Christian
Kuya 17 May 2022 saa 12:00
Yasuwe :

Hari ubwo umuntu aba yicaye agakomeza kumva amajwi y’umuntu azi cyangwa atazi amuzaho cyangwa se yaba aryamye cyangwa yicaye agatangira kubona amashusho mu mboni ze.

Ashobora kubona umuntu azi cyangwa atazi cyangwa se akabona amashusho y’inyamanswa.

Kumva ibidahari cyangwa kubona ibintu bidahari ahanini umuntu ari wenyine bizwi nka ‘hallucination’. Ntabwo ari ibintu byizana kuko hari impamvu zitandukanye zibitera.

Kubona cyangwa kumva ibidahari ni ikimenyetso kigaragaza ko umuntu ashobora kuba afite ikibazo cy’ubuzima bwo mu mutwe.

Akenshi bikorwa n’intekerezo z’umuntu bitewe n’icyo ziba zitekereza muri ako kanya kandi bikagira ingaruka ku mikorere y’ubuzima bwa nyiri ntekerezo.

Ibi ariko ntibyizana kuko biterwa n’impamvu zitandukanye harimo nk’uburwayi umuntu yaba asanganwe. Ugaragaweho ibimenyetso byayo asabwa kuba yagana muganga kugira ngo yitabweho.

Mu ndwara nyinshi zibitera, uburwayi bwa Schizophrénie ni bumwe mu bituma umuntu abona cyangwa akumva ibidahari.

Schizophrénie ni indwara ikomeye yo mu mutwe aho abantu babona ibintu mu buryo butandukanye n’ubwa nyabwo.

Umuganga w’indwara zo mu mutwe, Dr. Smitha Bhandari, yavuze ko abantu barenga 70% bafite ubu burwayi bwa Schizophrénie babona ibidahari, naho 60% -90% bakumva amajwi adahari ariko hari na bamwe bashobora guhumurirwa cyangwa kumva uburyohwe bw’ibintu bidahari.

Kugira indwara y’ibibyimba ku bwonko cyangwa gukura k’uturemangingo tudasanzwe mu bwonko bwa muntu bizwi nka ‘Brain Tumor’, ni indi ndwara ishobora gutuma umuntu abona ibintu bidahari.

Gukoresha ibiyobyabwenge nabyo bishobora gutera hallucination. Abantu bashobora kubona ibintu bidahari nyuma yo kunywa inzoga nyinshi cyangwa gufata ibiyobyabwenge nka cocaine ku kigero cyo hejuru.

Kudasinzira bihagije nabyo bishobora gutuma umuntu atangira Kubona ibintu bidahari. Ibi cyane bikunze kubaho iyo umuntu amaze igihe kinini atararyama cyangwa se aryama ariko by’igihe kidahagije.

Ikintu cyiza cyo gukora ni uguhamagara cyangwa kugana umuganga ako kanya niba ukeka ko imyumvire yawe idasanzwe.

Ushobora kandi kuba uzi umuntu umeze gutyo, uwo ntakwiye kuba wenyine kuko aba anyura mu bihe bikomeye. Aba akeneye umuntu umuba hafi kuko ingaruka ziterwa na ‘hallucination’ zishobora kurushaho kumwangiza.

Gumana n’uwo muntu igihe cyose ube wanamuherekeza ku banganga babugenewe kuko ushobora no kumufasha gusobanura ibimenyetso bye uko bimeze kugira ngo abe yakwitabwaho.

Mu gihe wagaragaweho n’ibimenyetso bya hallucination umuganga akuvura ahanini akurikije impamvu yabyo kuko iterwa n’ibintu byinshi.

Urugero niba biterwa no kunywa inzoga nyinshi, umuganga wawe ashobora kuguha imiti igufasha gutuza no gukora neza k’umubiri akaba yanakugira inama yo kugabanya cyangwa guhagarika kuzinywa.

Niba kubona ibidahari biterwa no kurwara umutwe ukabije, imiti ihabwa unywa inzoga siyo yahabwa uyu muntu birumvikana ko afashwa hifashishijwe indi miti.

Ubujyanama nabwo bushobora kuba igice kigize ubuvuzi bw’ufite ibimenyetso. Ubu buryo bukunze gukoreshwa cyane iyo urwaye cg ufite ibimenyetso afite ikibazo cy’ubuzima bwo mu mutwe.

Kuvugana n’umujyanama bishobora kugufasha gusobanukirwa neza ibikubaho. Umujyanama yagufasha gutegura no gushyira mu bikorwa ingamba zo guhangana n’ubu burwayi cyane cyane mu gihe wumva uterwa ubwoba nabwo.

Umuntu ufite ubu burwayi ashobora gukira bitewe n’icyabuteye. Urugero niba buterwa no kutaryama cyangwa kunywa inzoga nyinshi bushobora gukira iyo hafashwe ingamba zikarishye.

Niba kandi bwaratewe n’ikibazo cy’ubuzima bwo mu mutwe gufata imiti ikwiye bishobora gufasha imikirire yawe. Kubonana na muganga uko bikwiye ugakurikiza gahunda yo kuvurwa byagusha mu rugendo rwawe rwo gukira.

Kubona cyangwa kumva ibidahari, iyo bitavuwe bigira ingaruka mbi ku buzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .