Ibintu umunani wakora wirinda kurwara impyiko

Yanditswe na Mutangana Gaspard
Kuya 14 Werurwe 2021 saa 11:45
Yasuwe :
0 0

Mu gihe mu Rwanda no ku Isi muri rusange hizihizwa Umunsi Mpuzamahanga wahariwe kumenyekanisha akamaro k’impyiko n’uburyo zafatwa neza, Abanyarwanda babarirwa hagati ya 10% na 15%, bafite ibyago byo kurwara impyiko ku buryo bwa karande.

Ni umunsi uba tariki ya 11 Werurwe buri mwaka. Inzobere mu kuvura indwara zo mu mubiri by’umwihariko impyiko, Dr Igiraneza Grâce, ukora mu bitaro bya CHUK, yagarutse ku bukana bw’indwara z’impyiko n’uburyo umuntu yazirinda.

Uburwayi bw’impyiko, bugabanyijemo amoko abiri y’ingenzi. Hari uburwayi bw’impyiko buje ako kanya, hakaba n’uburwayi bw’igihe kirekire.

Nubwo nta bushakashatsi bwihariye burakorwa ku ndwara y’impyiko mu Rwanda, Dr Igiraneza avuga ko ubushakashatsi bwakozwe ku ndwara y’umuvuduko w’amaraso na diabète, bwafasha umuntu kugenekereza umubare w’Abanyarwanda bafite ibyago byo kurwara impyiko ku buryo bwa karande.

Ubushakashatsi bwakozwe mu Rwanda bwagaragaje ko hagati ya 10% na 15% by’Abanyarwanda barwaye umuvuduko w’amaraso. Bitewe n’uko abenshi bahinduka abarwayi b’impyiko ari abarwaye umuvuduko w’amaraso, diabète ndetse n’abanywi b’itabi, bituma imibare y’abitabwaho kwa muganga irushaho kuzamuka, kuko abarwaye izi ndwara n’abanywa itabi bari kurushaho kwiyongera.

Uburwayi bw’impyiko ntabwo bupfa gutahurwa, kuko nta bimenyetso byihariye bugira. Icyakora iyo bumaze kuzahaza umuntu, hatangira kugaragara ibimenyetso birimo kubyimba amaguru, kubyimba ibihaha, mu maso, mu nda bitewe n’uko ziba zitagishoboye kuyungurura amazi kuko ziyungurura amazi zigakora inkari, kandi zikagira uruhare rukomeye mu gukora amaraso.

Iyo amazi atayunguruwe ngo hakorwe inkari, areka mu bice runaka by’umubiri, kandi iyo ageze mu bihaha birabyimba umuntu akajya kwa muganga atabasha guhumeka.

Icyakora ku burwayi bw’igihe gito bwo bushobora gukira, akenshi umuntu anyara amaraso, cyangwa inkari zikaza ziganjemo urufuro. Ikindi ni uko imyunyu ngungu nka potassium idasohoka uko bikwiye mu mubiri wurwaye impyiko, kandi ibi bituma umutima uhagarara bityo umuntu agapfa.

Dr Igiraneza Grâce yasobanuraga byinshi ku ndwara y’impyiko, yavuze ko mu bitaro byo mu Rwanda hari nibura abarwayi 100 bari ku rwego rwo kuyungururirwa amaraso, ibizwi nka dialyse.

Yagise ati « Kuyungurirwa amaraso birahenda cyane ku buryo umurwayi yishyura ibihumbi 300 buri cyumwero mu gihe atabonye umuha impyiko nzima. Iyo ubonye uguha impyiko, byo birahenze cyane, nta n’ubwo bikorerwa hano mu Rwanda.

Dufite abantu barenga 70 baguraniwe impyiko, kandi na bo ni nk’abarwayi dukurikirana. Icyo dushishikariza abantu ni ukwisuzumisha impyiko tukabakurikirana hakiri kare.»

Umwe mu baganirije itangazamakuru bari kuvurirwa impyiko muri CHUK, Nikuze Laetitia, yagiriye abantu inama yo gufata neza ipyiko, kuko ngo byamugizeho ingaruka nyinshi.

Yagize ati « Natangiye kurwara impyiko mfite imyaka 12, ariko gushyirwa kuri dialyse byo byatangiye muri Kamena 2019. Byangizeho ingaruka nyinshi, kuko kuko bihenze, kandi byatumye ntabasha kwiga neza. Icyo nabwira abantu ni ugukurikirana ubuzima bwabo. »

Mu rwego rwo kwirinda indwara y’impyiko, ni ngombwa kwipimisha no kugira bimwe mu bikorwa ukora ugamije kuzibungabunga.

Gukora imyitozo ngororamubiri

Ni ngombwa gukora imyitozo ngororamubiri wirinda kurwara impyiko, kuko ari na bumwe mu buryo bufasha umuntu kwirinda umubyibuho ukabije na diabète.

Kurya indyo yuzuye

Kurya amafunguro arimo ibyubaka umubiri, ibitera imbaraga n’ibirinda indwara wirinda kurwara impyiko ni ngombwa, kandi ukirinda gushyira mu mafunguro umunyu mwinshi.

Irinde isukari nyinshi kuko yongera ibyago byo kurwara diabète, kandi ugabanye ingano y’amavuta cyangwa ibinyabinure winjiza mu mubiri, ahubwo wongere imboga n’imbuto bikungahaye kuri fibre.

Kwisuzumisha urugero rw’isukari yo mu maraso

Kwisuzumisha urugero rw’isukari yo mu maraso, ni ngombwa kuko ni nabwo ubasha gutahura niba urwaye cyangwa utarwaye diabète, kuko diabetes ikururira umuntu kurwara impyiko.

Kwisuzumisha umuvuduko w’amaraso

Ni ngombwa kumenya niba amaraso yawe agendera ku muvuduko usanzwe, kuko kurwara umuvuduko w’amaraso bihatse ibyago byinshi byo kurwara impyiko. Umuntu mukuru akwiye kwisuzumisha nibura rimwe mu mwaka.

Kunywa amazi ahagije

Ku muntu mukuru ufite hagati y’ibilo 60 na 70, akwiye kunywa litiro ebyiri ku munsi mu guhe atarwaye impyiko. Umuntu urwaye impyiko we anywa ayo umubiri we ushoboye kuko impyiko ze ziba zitagishoboye gukora inkari, hirindwa ko yaba menshi akareka muri bimwe mu bice by’umubiri nk’ibihaha.

Kwirinda kunywa itabi

Itabi ni ribi ku buzima bw’umuntu muri rusange, kandi ni impamvu nyamukuru itera kanseri y’impyiko.

Irinde gukoresha cyane imiti igabanya uburibwe

Irinde gukoresha ku bwinshi imiti igabanya ububabare nka ibuprofène, kuko na yo iri mu byongera ibyago byo kurwara impyiko. Koresha bene iyi miti mu gihe wayandikiwe na muganga wemewe gusa, kandi ku rugero ruringaniye.

Isuzumishe kenshi uburwayi bw’impyiko

Mu gihe urwaye indwara nka diabète, umuvuduko w’amaraso, mu gihe ufite umubyibuho ukabije, no mu gihe hari uwigeze kurwara iyi impyiko mu muryango wawe.

Iyo impyiko zazahaye bisaba ko umurwayi ayungururirwa amaraso
Dr. Igiraneza yagarutse ku bintu umunani wakora wirinda kurwara impyiko
Uyu munsi wahariwe ubukangurambaga mu kwigisha abantu uburyo bafata neza impyiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .