Ecobank Rwanda yatanze miliyoni 5 Frw zo gufasha guhangana na diabète (Amafoto)

Yanditswe na Uwimana Abraham
Kuya 13 Ugushyingo 2020 saa 11:07
Yasuwe :
0 0

Banki y’Ubucuruzi ya Ecobank Rwanda Plc yatanze 5.000.000 Frw mu rwego rwo gufasha mu guhangana n’indwara ya diabète no gukomeza ubufatanye n’Ikigo cy’Igihugu cy’Ubuzima, RBC, guhera mu mwaka ushize aho biyemeje gufasha mu kurwanya indwara zitandura.

Ibi byabaye kuri uyu wa 13 Ugushyingo 2020, ku munsi ngarukamwaka uzwi nka “Ecobank Day”, aho abayobozi n’abakozi b’iyi banki bahurira mu gikorwa runaka cyo gufasha sosiyete, gusa muri uyu mwaka habayemo impinduka bitewe n’icyorezo cya COVID-19.

Muri uyu mwaka Ecobank mu rugendo rw’imyaka itatu yatangiye umwaka ushize rwo gufasha mu kurwanya indwara zitandura, yahisemo gupimisha abakozi bayo bose indwara ya diabète ndetse inatera inkunga Ishyirahamwe ry’Abarwayi ba Diabète mu Rwanda, ingana na 5.000.000 Frw.

Ubwo Ecobank yatangiraga ubukangurambaga bwo kwirinda indwara zitandura, yahereye ku kurwanya indwara ya kanseri, uyu mwaka yibanze kuri diabète.

Umuyobozi wa Ecobank mu Rwanda, Alice Kilonzo-Zulu, yavuze ko bahisemo kwibanda mu gukora ubukangurambaga bugamije kurwanya indwara zitandura kuko ari zimwe mu zica abantu bucece.

Yagize ati “Kuva mu mwaka ushize Ecobank yafashe umwanzuro wo kwibanda ku ndwara zitandura mu gihe cy’imyaka itatu, umwaka ushize twari twibanze kuri kanseri, uyu mwaka twibanze kuri diabète.”

Yongeyeho ati “Impamvu y’ibi ni uko twamenye ko indwara zandura ari zimwe mu zica bucece, zikaba ari zo ziri gutera impfu nyinshi ku Isi muri rusange, by’umwihariko muri Afurika, nka Ecobank rero twabonye ari ngombwa ko dukora ubukangurambaga hirya no hino, ndetse tugatanga n’ubufasha bw’amafaranga.”

Kilonzo yakomeje avuga ko babonye ko bikenewe cyane by’umwihariko muri iki gihe cya Coronavirus kuko abantu basanzwe bafite izi ndwara zitandura bazahazwa cyane n’iki cyorezo.

Umuyobozi w’Ikigo cy’Igihugu cy’Ubuzima, RBC, Dr Nsanzimana Sabin, yashimiye Ecobank ku bw’uruhare rwayo mu gufasha guhangana n’indwara zitandura.

Yavuze ko kandi ari uruhare rukomeye kandi rukenewe mu guhangana n’izi ndwara, cyane mu gihe Isi ihanganye na Coronavirus kandi bikaba byaragagaye ko abafite izindi ndwara ibazahaza ndetse ikabahitana kuruta abandi.

Yagize ati “Ni umwanya mwiza wo kumva ko indwara zitandura tutazirwanya zonyine, ahubwo tuba tunagamije ko ibindi byorezo bidahitana abantu, urugero ni COVID-19 turi kurwanya uyu munsi, abantu benshi ihitana, ni ababa barwaye zimwe mu ndwara zitandura.”

Yakomeje avuga ko kwandura COVID-19 ubwabyo bishobora kudahita bituma umuntu apfa, ariko kuyirwara urwaye n’indwara zitandura, byongera ibyago byo kuba yaguhitana.

Yavuze ko abakabaka 90% y’abahitanywa na COVID-19 ari ababa basanzwe barwaye indwara zitandura, akomeza rero gushima Ecobank Rwanda ku bw’iki cyemezo, anakangurira ibindi bigo bitandukanye nabyo gutera intambwe nk’iyi.

Umuyobozi w’Ishyirahamwe ry’Abarwaye Diabète mu Rwanda, Gishona François, yashimiye Ecobank ku bw’inkunga yabahaye avuga ko ari uruhare rukomeye mu guhangana na diabète.

Ati “Tunyuzwe no kuba turi kumwe n’Ikigo cy’Ubucuruzi nka Ecobank, kuba cyashyigikiye Ishyirahamwe ry’Abarwaye Diabète mu Rwanda mu buryo bw’amafaranga, ni ibintu bishimishije kuri twe.”

Ecobank Day ya 2020 yahuriranye n’Umunsi Mpuzamahanga wo kurwanya Diabète, akaba ari no muri urwo rwego abakozi bose ndetse n’abayobozi bapimwe iyi ndwara ku bufatanye na RBC, banagirwa inama y’uko bakwitwara mu rwego rwo kurushaho kuyirinda.

Abakozi ba Ecobank babanje gupimwa uburebure n'ibilo
Abakozi bose ba Ecobank bafashijwe kwipimisha diabète
Bafashwe n'amaraso harebwa isukari mu maraso
Umuyobozi wa Ecobank mu Rwanda, Alice Kilonzo-Zulu, na we yabanje gupimwa diabète
Umuyobozi wa Ecobank mu Rwanda, Alice Kilonzo-Zulu, yavuze ko babonye ko bahisemo kwibanda mu gukora ubukangurambaga bugamije kurwanya indwara zitandura kuko ari zimwe mu zica bucece
Umuyobozi w’Ishyirahamwe ry’Abarwaye Diabète mu Rwanda, Gishona François, yashimiye Ecobank ku bw’inkunga yabahaye
Umuyobozi wa Ecobank mu Rwanda, Alice Kilonzo-Zulu n'Umuyobozi w’Ikigo cy’Igihugu cy’Ubuzima, RBC, Dr Nsanzimana Sabin, bashimangiye ubufatanye hagati y'impande zombi
Umuyobozi Mukuru wa RBC, Dr Nsanzimana Sabin, yashimiye Ecobank asaba n'ibindi bigo kugera ikirenge mu cyayo
Ecobank Rwanda yatanze miliyoni 5 Frw zo gufasha guhangana na diabète

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .