00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri ba Kaminuza y’u Rwanda bibasiwe n’indwara z’amaso

Yanditswe na Prudence Kwizera
Kuya 16 Ukwakira 2021 saa 07:54
Yasuwe :
0 0

Ubuyobozi bw’Ibitaro bya Kaminuza bya Butare, CHUB, butangaza ko mu banyeshuri ba Kaminuza y’u Rwanda, Ishami rya Huye, bamaze gusuzumwa indwara z’amaso, abangana na 54,1% basanganywe ibibazo bitandukanye birimo n’ibikomeye bisaba ko bavurwa byihariye.

Ku wa Mbere tariki ya 11 Ukwakira 2021 ni bwo abo banyeshuri batangiye gusuzumwa uburwayi bw’amaso no guhabwa ubujyanama bw’uko bayarinda kurwara, byose bikozwe nta kiguzi batanze.

Umuyobozi Mukuru w’Agateganyo wa CHUB, Dr Ngarambe Christian, yavuze ko mu bagera ku 218 basuzumwe basanzemo abagera ku 118 bafite ibibazo by’amaso.

Ati “Twari tumaze gusuzuma abantu bagera kuri 218 ariko muri abo bose abantu 118 twasanze bafite ibibazo by’amaso bikeneye kuba byasuzumwa mu buryo bwisumbuyeho.”

“Muri abo hafi 30% ni ukuvuga abagera kuri 64 twasanze bo bafite ibibazo bikomeye, birimo ibyo kureba bugufi cyangwa kureba kure, bifite ikibazo ariko dusangamo n’abandi bakabakaba 25% ubwo ni 54 bafite ibibazo byoroheje ariko na byo bisaba ko bazagirwa inama yo kureba niba bazakenera n’indorerwamo.”

Dr Ngarambe yavuze ko ubusanzwe buri wa Kabiri w’icyumweru cya kabiri cy’ukwezi k’Ukwakira ari umunsi mpuzamahanga wo kurwanya ubuhumyi.
Yasobanuye ko muri icyo cyumweru bamanuka bagasanga abaturage kugira ngo babakangurire kwirinda indwara z’amaso no kwisuzumisha kugira ngo bamenye uko ubuzima bwayo buhagaze.

Kuba kuri iyi nshuro barahisemo kwegera abanyeshuri biga muri Kaminuza y’u Rwanda, Ishami rya Huye byatewe n’uko bamaze igihe babagana ku bwinshi bagiye kwisuzumisha indwara z’amaso kandi basanze abenshi muri bo bafite ibibazo bijyanye na yo.

Yavuze ko kuba mu bantu bose bamaze gusuzumwa, abagera kuri 54,1% bafite ibibazo by’uburwayi bw’amaso bisobanuye ko hari Abanyarwanda benshi bafite uburwayi bw’amaso bagendana batabizi.

Imibare itangwa na CHUB yerekana ko muri rusange ku munsi bakira abarwayi 48 baje kwivuza amaso, muri bo 53% ni abanyeshuri barimo 41% biga Kaminuza y’u Rwanda ishami rya Huye.

Muri abo banyeshuri baturuka muri Kaminuza zitandukanye, abangana na 28% baba bakeneye indorerwamo.

Mu bagana ibyo bitaro bagiye kwivuza, abarembye cyane bari kurwego rukomeye rw’ubuhumyi, abenshi ni ababa bari hejuru y’imyaka 60 kandi bakunze kuba bafite ubundi burwayi burimo diyabete n’umuvuduko w’amaraso.

Umwe mu banyeshyuri ba Kaminuza y’u Rwanda Ishami rya Huye, Niyokwizerwa Obed, yavuze ko akunze kugira ikibazo cy’uburwayi bw’amaso bikabangamira imyigire ye.

Ati “Njyewe iyo ndi ku rumuri rwinshi ndasoma nkabona simbisoma neza, rero byatumye nza kwisuzumisha amaso kugira ngo bandebere ikibazo mfite nivuze hakira kare.”

Mu gihe Isi ituwe n’abasaga miliyali 7.9, abagera kuri miliyoni 43 bafite ubuhumyi, naho abagera kuri miliyoni 265 bafite ibibazo by’amaso. Muri abo bose 90% bari mu bihugu bikennye n’ibikiri mu nzira y’amajyambere. Ubushakashatsi bwagaragaje ko muri ubwo burwayi 80% bushobora kuvurwa bugakira mu gihe ababufite bakwivuriza ku gihe.

Igikorwa cyo gusuzuma indwara z’amaso muri Kaminuza y’u Rwanda ishami rya Huye, kiri gukorwa n’abaganga bo kuri CHUB ku bufatanye n’Umuryango One Sight.

Intego y’uyu mwaka iragira iti ‘Dukunde amaso yacu tuyiteho’.

Umuyobozi Mukuru w’Agateganyo wa CHUB, Dr Ngarambe Christian, yavuze ko mu bagera ku 218 basuzumwe basanzemo abagera ku 118 bafite ibibazo by’amaso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .