Abandura Virus itera Sida ku mwaka bagabanutseho 50% mu Rwanda

Yanditswe na Evariste Nsengimana
Kuya 22 Ukwakira 2019 saa 08:45
Yasuwe :
0 0

Ubushakashatsi bushya bwerekanye ko umubare w’abantu bashya bandura Virusi itera Sida mu Rwanda, ugenda ugabanuka uko imyaka ishira, by’umwihariko ukaba waravuye kuri 3/1000 (barenga ibihumbi 10) mu 2014 ukagera kuri 1/1000 (barenga 5400) mu 2019.

Ibi bivuze ko habayeho igabanuka risatira 50% mu myaka itanu ishize.

Ubu bushakashatsi bwamuritswe ku mugaragaro kuri uyu wa 22 Ukwakira 2019, bwagaragaje ko u Rwanda rwateye intambwe idasanzwe mu gukumira icyorezo cya Sida, by’umwihariko rukomeje kuza imbere mu gufasha abayirwaye kubona imiti no kubarinda ingaruka zayo.

Bwakozwe ku bufatanye bwa Guverinoma y’u Rwanda, Gahunda ya Perezida wa Leta Zunze Ubumwe za Amerika (USA) yo kurwanya SIDA (PEPFAR), Ikigo gishinzwe kugenzura no gukumira indwara cyo muri USA (CDC) n’Umushinga wa Kaminuza ya Columbia ushinzwe kurwanya virusi itera Sida (ICAP).

Bwakorewe ku baturage barenga ibihumbi 30 bari mu kigero cy’imyaka 16-65 n’abarenga ibihumbi icyenda bari hagati y’imyaka 10-14 bo mu ngo zirenga ibihumbi 11 basanzwe mu ngo hagati ya Werurwe 2018 na Kanama 2019.

Bimwe mu byavuye muri ubu bushakashatsi bigaragaza ko umubare abantu bakuru bari hagati y’imyaka 15 na 64 bafite Virusi itera Sida utagabanutse kuko ukiri ku gipimo cya 3% (basaga ibihumbi 210) wahozeho mu myaka 17 ishize. Abari hagati y’imyaka 15-49 bari ku gipimo cya 2.6%.

Muri rusange abantu bakuru bari hagati y’imyaka 15-64 bandura Virus itera Sida ku mwaka bwerekanye ko bari ku gipimo cya 0.8%, bangana na 4500.

Muri iyo myaka, abagore bandura Virusi itera Sida ku mwaka mu Rwanda bari ku gipimo cya 3.7%, abagabo ni 2.2%, abari hagati y’imyaka 10-14 bari ku gipimo cya 0.4% mu gihe abari muri iyo myaka bafite virusi itera Sida ari 5900.

Mu bakuze bafite virusi itera Sida, 76% bigaragara ko igenda igabanuka mu maraso aho abagore bari ku kigero cya 79.1% naho abagabo kuri 70.5%. Ibi biterwa n’uko igipimo cy’abafata imiti igabanya ubukana igenda yiyongera.

Impungenge ku bangavu

Ubu bushakashatsi bwerekanye ko ubwandu bushya ku bagore bari mu kigero cy’imyaka 55-59 buri ku gipimo cya 6.5% mu gihe abagabo bafite imyaka 50-59 buri kuri 7.4%.

Gusa iyo urebye mu rubyiruko usanga biteye impungenge cyane cyane ku bangavu bari mu kigero cy’imyaka 20. Bugaragaza ko abangavu bari mu kigero cy’imyaka 20-24 bandura virus itera Sida (ari 1.8%) bikubye inshuro zirenga eshatu bagenzi babo b’abahungu (bari kuri 0.6%).

Umuyobozi w’Ikigo cy’igihugu gishinzwe ubuzima (RBC), Dr Nsanzimana Sabin yagize ati “Abahungu n’abakobwa bafite imyaka 15, igipimo cya Virus itera Sida kijya kungana hafi 1% ariko byagera mu myaka 20, abakobwa bagahita babikuba inshuro hafi enye! Ukibaza bayikuye he mu myaka ine?”

Dr Nsanzimana yavuze ko bishoboka ko muri iyo myaka bishora mu bikorwa by’ubusambanyi cyangwa ikaba ikigero bashukwamo n’abagabo bakayibanduza.

Ati “Muri macye birasaba ngo abareberera abo bana n’abafite imishinga ibitaho, ibarinda uburwayi bafate ingamba kuko izisanzwe ntacyo zahinduye kuri iki kibazo.”

Ubu bushakashatsi bugaragaza ko ku rwego rw’Intara n’Umujyi wa Kigali, Ubwandu bushya bwayo bwiganje mu Mujyi wa Kigali ku gipimo cya 4.3%, Intara y’Uburengerazuba kuri 3%, Uburasirazuba n’Amajyepfo kuri 2.9% naho Amajyaruguru kuri 2.2%. muri rusange mu mijyi buri ku gipimo cya 4.8% naho mu byaro kuri 2.5%.

Minisitiri w’Ubuzima, Dr Diane Gashumba yavuze ko nubwo hari intambwe ishimishije yatewe, imbogamizi zigihari mu gukumira Virusi itera Sida ku buryo inzego bireba zikeneye kongera imbaraga mu byo zikora n’ubufatanye hagati yazo.

Intambwe idatsikira ku kwesa intego ya Loni

Ubu bushakashatsi bugaragaza ko Guverinoma y’u Rwanda yamaze kurenza zimwe mu ntego Ishami ry’Umuryango w’Abibumbye rishinzwe kurwanya SIDA (UNAIDs) ryihaye yo kugeza ubuvuzi ku bafite virusi itera Sida mu 2020.

Ni intego (90-90-90) isobanura ko mu 2020 abafite virusi itera Sida bazaba bazi uko bahagaze ari 90%, abafata imiti 90% naho kugabanuka kwa virusi itera Sida bikaba 90%.

Ubushakashatsi bugaragaza ko ikigero cyo kumenya uko abantu bahagaze ari 84%, abafata imiti ari 98% naho ikigero cyo kugabanuka kwayo mu mubiri kiri kuri 90%.

Minisitiri w’Intebe Dr Edouard Ngirente wari witabiriye uyu muhango yagize ati “Imibare iragaragaza ko u Rwanda rurimo gutera intambwe ishimishije mu gukumira Virusi itera Sida. Ibyo birugira igihugu cya mbere kigeze kuri iyi ntambwe kandi twizeye ko nidukoza muri ubu buryo tuzagera ku musaruro mwiza.”

Dr Ngirente yavuze ko hakwiriye gukomeza gushyirwamo imbaraga kugira ngo ibyo bigerweho, ashimira abagize uruhare muri ubwo bushakashatsi barimo abajyanama b’ubuzima basanzwe banafasha mu gukumira icyorezo cya Sida.

UNAIDS igaragaza ko ku Isi mu bantu barenga miliyoni 39 bafite virusi itera Sida, 79% aribo bazi uko bahagaze, batatu muri batanu bayirwaye bafata imiti igabanya ubukana gusa naho 53% by’abafite virusi itera Sida ntabwo bipimisha ngo bamenye uko bahagaze.

Minisitiri w'Intebe Dr Ngirente yavuze ko intambwe u Rwanda rwateye mu kwita ku bafite virusi itera Sida nta kindi gihugu kirayitera kugeza uyu munsi
Uyu muhango wo kumurika ubu bushakashatsi witabiriwe n'abayobozi batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza