00:00:00 IGIHE NETWORK KN KINYARWANDA EN ENGLISH FR FRANCAIS

Urukiko rw’Ikirenga rwangiye abaforomo n’ababyaza gutanga serivisi zo gukuramo inda

Yanditswe na Umwali Zhuri
Kuya 19 March 2022 saa 12:29
Yasuwe :

Urukiko rw’Ikirenga rwagumishijeho ko gukuramo inda bikorwa na muganga wemewe na leta, ni nyuma y’ikirego cyari cyatanzwe n’Umuryango Uharanira uburenganzira bwa muntu mu Biyaga bigari (GLIHD), wareze Guverinoma y’u Rwanda usaba ko abaforomo n’ababyaza bemererwa gukuriramo abantu inda.

Iki kirego cyaburanishijwe mu Ukwakira 2021, umuryango GLIHD umenyerewe mu gukora ubuvugizi ku bibazo byerekeye ubuzima bw’imyororokere n’uburenganzira, wagaragaje ko hari ikibazo mu ngingo ya 125 y’itegeko riteganya ibyaha n’ibihano mu gika cya kabiri ndetse n’iya 126 mu gika cya gatatu, aho zivuga ko gukuramo inda bikorwa na muganga wemewe na leta.

Leta yavuze ko gukuramo inda bikorwa n’umuganga wemewe mu kwirinda ko byakorwa n’abatabasha gukemura ibibazo bishobora kuvuka nko kuva cyane ndetse n’ibindi.

Ni mu gihe Ishami ry’Umuryango w’Abibumbye ryita ku buzima (OMS), rivuga ko gukuramo inda mu buryo bwizewe kandi butagira ingaruka bishobora gukorwa mu buryo runaka bwateganyijwe kandi bigakorwa n’abantu batandukanye bo mu nzego z’ubuzima. Gusa mu Rwanda ntabwo abaforomo n’ababyaza babyemerewe.

Iteka rya Minisitiri ryo mu 2019 rigena ibigomba kubahirizwa kugira ngo muganga akuriremo umuntu inda mu ngingo ya kabiri, rivuga ko umuganga wemewe na Leta ukuriramo umuntu inda ari umuntu ufite ubumenyi mu buvuzi bw’abantu, ufite nibura impamyabushobozi y’icyiciro cya kabiri cya Kaminuza mu ishami ry’Ubuvuzi kandi wemewe n’urwego rushinzwe kugenzura imirimo y’ubuvuzi mu Rwanda, ukorera mu kigo cy’ubuvuzi cya Leta cyangwa cyigenga.

Umunyamabanga Nshingwabikorwa wa GLIHD, Tom Mulisa, avuga ko guharira bamwe uburenganzira bwo gukora iyi serivisi ari ikibazo kuko abaganga bahari ari bake ugereranyije n’abaforomo.

Mulisa avuga ko nko mu bice by’ibyaro usanga nta baganga bahari serivisi nyinshi z’ababyeyi zitangirwa ku bigo nderabuzima kandi bikorwaho n’abaforomo n’ababyaza benshi.

Ati "Ikibazo twagaragaje ntabwo ari cyo cyasubijwe n’urukiko. Twasabaga urukiko ko abaforomo n’ababyaza bemererwa gukuriramo abantu inda kugira ngo iyi serivisi igere ku baturage bose biboroheye. Urukiko ahubwo rwitaye gusa ku burenganzira ku buzima".

Mulisa yavuze ko bagiye kureba ikindi bakora.

Kabatesi Olivia washinze Umuryango Empower Rwanda, asanga niba abaforomo n’ababyaza bashobora gufasha umubyeyi kubyara mu gihe muganga adahari, nta cyatuma batanamufasha gukuramo inda, keretse mu gihe bisaba kubaga bikorwa n’inzobere.

Avuga ko itegeko ryo gukuramo inda riha amahirwe abashobora kwirihira ikiguzi cy’ingendo nyinshi n’ibindi kuko umuntu ashobora kujya ku bitaro iminsi myinshi mbere y’uko ahabwa serivisi yo gukurirwamo inda.

Umuyobozi wa HDI, Dr. Afrodis Kagaba, yabwiye The New Times ko kwegereza izi serivisi abaturage bizagabanya umutwaro w’abatabasha kuzigeraho.

Ati "Iyo abaturage bashobora kubona serivisi ku muganga wemewe na leta gusa, bivuze ko basabwa kujya ku bitaro. Turamutse tugize amahirwe menshi abaforomo n’ababyaza bakwemererwa gutanga izi serivisi kuko umuntu ashobora kubabona ku kigo nderabuzima atavunitse".

Kagaba avuga ko hakiri icyizere ko binyuze mu biganiro hashobora kuzabaho ivugururwa ry’iri tegeko.

OMS igaragaza ko nibura 45 ku ijana by’inda zikurwamo zose bikorwa mu buryo butemewe mu gihe 97% byazo ari izo mu bihugu biri mu nzira y’amajyambere.

Mu 2019 Minisiteri y’Ubuzima mu Rwanda yabaruraga abaganga bemewe na leta 1648. Habarurwaga kandi abaforomo n’ababyaza 15,050 aho 7,593 bakoraga mu mavuriro n’ibitaro bya leta.

Abaforomo n'ababyaza basabirwaga kwemererwa gutanga serivisi zo gukuramo inda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .