Umunyarwandakazi wiga muri Amerika mu rugamba rwo gukumira inda ziterwa abangavu yifashishije YouTube

Yanditswe na Evariste Nsengimana
Kuya 19 Ugushyingo 2019 saa 07:43
Yasuwe :
0 0

Bwiza Conscience Princesse wiga muri Leta Zunze Ubumwe za Amerika yatangije urubuga rwo gusobanurira abantu ibijyanye n’ubuzima bw’imyororokere yifashishije urubuga rwa YouTube mu rwego rwo gukumira inda ziterwa abangavu kubera ubumenyi buke.

Bwiza ari gushaka Impamyabumenyi ihanitse (PhD) mu bijyanye n’Ubushakashatsi ku mihindagurikire y’umubiri w’umuntu uko agenda asaza n’indwara zikunda kwibasira abageze mu zabukuru by’umwihariko Kanseri muri Kaminuza ya California y’Amajyepfo.

Ni ibiganiro bigamije kongerera ubumenyi Abanyarwanda b’ibyiciro bitandukanye ku byerekeye ubuzima bw’imyororokere n’uko yamenya ibimenyetso bigaragaza uburumbuke bw’umugore, akabikoresha mu gihe ashaka gutwita cyangwa kubyirinda.

Yabwiye IGIHE ati “Kumenya ibi byose mu Kinyarwanda kandi bisobanuye mu buryo bworoshye bizafasha mu kugabanya ibibazo biterwa n’ubumenyi buke kuri iyi ngingo.”

Yakomeje agira ati “Impamvu yabinteye ni ikibazo twese tuzi dufite mu Rwanda cy’aho imibare y’abana b’abangavu bari munsi y’imyaka 18 batwita igenda yiyongera.”

Imibare ya Minisiteri y’Uburinganire n’Iterambere ry’Umuryango igaragaza ko mu mwaka wa 2016, abangavu basambanyijwe bakabyarira kwa muganga bari ibihumbi 17 849, mu 2017 bagabanutseho gake bagera kuri 17337.

Gusa iyi mibare yongeye kuzamuka mu 2018 igera kuri 19 832 mu gihe guhera muri Mutarama 2019 kugera muri Kanama imibare yabo yari imaze kugera kuri 15 596. Bivuze ko bose hamwe ari 70 614 guhera mu 2016.

Bwiza avuga ko iyo umwangavu atasobanukiwe ubuzima bw’imyororokere aribwo bamutera inda, bikamugiraho ingaruka zirimo guta ishuri n’ibindi bituma asigara inyuma mu bikorwa by’iterambere arimo kwita ku mwana yabyaye imburagihe.

Ubwo yageraga muri Kaminuza yatangiye kwibaza impamvu abantu banywa imiti yo kuboneza urubyaro, nta kintu na kimwe barwaye.

Ati “Ndibuka ko hari isomo ry’Icyongereza nafashe mwarimu adusaba kwandika ku ngingo twihitiyemo mpitamo kwandika ku buryo bwo kuboneza urubyaro ngereranya uburyo bwa kamere n’ubwa kizungu.”

Icyo gihe nibwo yabonye umwanya wo kumenya byinshi ku kuboneza urubyaro ‘Bituma n’ishyaka ryanjye ku kumenya byinshi ku bijyanye n’uburyo kamere ryiyongera.”

Kuva icyo gihe yatangiye gucukumbura kuri gahunda zo kuboneza urubyaro, asoma ibitabo n’imbuga bitandukanye ari naho yaguye ku gitabo, ugenekereje mu Kinyarwanda cyitwa ‘Ita ku burumbuke bwawe, imfashanyigisho ku buryo bwo kuboneza urubyaro hakoreshejwe uburyo bwa kamere, gusama mu gihe ubishaka n’ubuzima bw’imyororokere’.

Mu Rwanda kimwe no mu bindi bihugu bishyize imbere gahunda zo kuboneza urubyaro mu rwego rwo kugabanya ubwiyongere bw’umubare w’abaturage butajyanye n’ubukungu bw’abaturage n’umusaruro w’igihugu.

Ati “Umusanzu wanjye mu gushaka igisubizo kirambye cya kiriya kibazo nahisemo gukora iyi shene izajya inyuzwaho ibiganiro byigisha cyane cyane abangavu n’abandi bantu ibijyanye n’ubuzima bw’imyororokere, uburumbuke n’uko wabikoresha wirinda gusama.”

Ibyo ngo bizatuma umuntu abanza gutekereza mbere yo gukora imibonano mpuzabitsina niba ashobora gusama cyangwa atasama bitewe n’igihe agezemo cy’uburumbuke aho gukoresha uburyo bwa kizungu bwo kuboneza urubyaro.

Ati “Ubundi igitekerezo nari mfite cyari ukuvuga ku buzima bw’imyororokere no gusangiza abantu uburyo wakoresha uburyo bwa kamere mu kuboneza urubyaro bityo uwumva ari ibintu akunze tukaba tumuhaye ubumenyi bw’ ibanze.”

Yakomeje agira ati “Birumvikana ko tutari guhita tuvuga ku burumbuke tutabanje kuvuga, urugero, ku myanya myibarukiro ndetse n’ukwezi k’umugore.”

Mu gusobanurira abantu azajya yifashisha ubumenyi bujyanye n’ibyo yize, ibitabo n’inyandiko asoma ndetse anatumire abaganga b’inzobere ku bijyanye n’ubuzima bw’imyororokere.

Shene ya YouTube anyuzaho ibiganiro bye yitwa ‘Twimenye na Bwiza’ yafunguwe ku wa 3 Ugushyingo 2019 akaba amaze kuyinyuzaho ibiganiro bitanu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza