Umuburo ku babyeyi birukira muri magendu bavuza abana babo indwara zitabaho

Yanditswe na Ishimwe Deborah
Kuya 6 Ugushyingo 2020 saa 02:48
Yasuwe :
0 0

Si rimwe cyangwa kabiri humvikanye ababyeyi bavuga ko indwara z’abana babo zidashobora kuvurirwa kwa muganga bigatuma bayoboka abavuzi gakondo barimo ababikora bya magendu.

Rimwe na rimwe hari ubwo usanga icyiswe indwara ari imihindagurikire y’umubiri ariko kubera kutamenya, ababyeyi bakajya gushakira ibisubizo mu bavuzi ba magendu biyita ‘aba gakondo’ bikabaviramo kuhasiga ubuzima cyangwa bakahakura ubumuga.

Zimwe mu ndwara zikunze kugaragara cyane ku bana bato ndetse zikaba ku isonga mu guteza impfu n’ibibazo by’imirire mibi igihe ababyeyi batagannye ubuvuzi bwizewe zirimo ‘uvula’ bakunze kwita “ikirimi’’, “guhandura uburo no guhandura ibyinyo’’.

Ubusanzwe abantu bakundaga kugaragaza ko imyumvire yo kumva ko hari ikibazo cy’ubuzima kidashobora gukemukira kwa muganga ari iy’abantu bo mu byaro, aho kuri ubu usanga no mu mujyi ihiganje cyane.

Mu makuru yakusanyijwe mu 2019 n’itsinda ry’abaganga rya RRT (Rapid Team) hagaragajwe impfu z’abana barenga batanu zakuruwe n’imigenzo bakoreweho bamwe bakabura amaraso abandi bakicwa n’imirire mibi.

Umuyobozi mu Ishami rishinzwe Ubujyanama ku Buzima bw’umwana n’umubyeyi mu Kigo cy’Igihugu cy’Ubuzima (RBC), Nyamwasa Augustin, yavuze ko akenshi usanga hari ababyeyi bafata uburwayi bwari kuvurwa bakabwita ibindi bitewe n’ibihuha byagiye bikwirakwizwa n’abavuzi ba magendu ku bw’inyungu zabo.

Yagize ati “Hari igihe usanga umwana yagize ikibazo mu muhogo “infection” ako bita ikirimi cyangwa “Uvula” mu Cyongereza, ka kabyimba umubyeyi yakwereka mugenzi we akamutera ubwoba ngo ni ikirimi akaba yirukiye kwa magendu. Bamwe mu bacibwa icyo kirimi, ibyinyo n’abahandurwa uburo bakunze kuva cyane bakaba babura amaraso bakanahasiga ubuzima iyo badatabarijwe vuba ngo bagezwe kwa muganga.”

Ubundi ikirimi ni agace k’umubiri kaba mu nzira z’ubuhemekero (mu muhogo) gafasha umuntu gusohora ijwi ndetse kakanamufasha mu buryo bwo kuyobora amafunguro mu nzira yayo kuko kayabuza kuba yanyura mu mwenge ujya mu mazuru.

Nyamwasa yakomeje ati “Ako rero niko bakata aho usanga rimwe na rimwe bitera umwana kuzagira ibibazo mu mivugire cyangwa akananirwa kurya bikaba byamuviramo ubumuga n’ibindi.”

Umwe mu babyeyi barwaje indwara bakunze kwita ikirimi yagize ati “Umwana wanjye agize amezi icyenda yarwaye mu mihogo ananirwa kurya no konka, muhaye imiti yo kwa muganga akomeza kuremba. Bandangira umuntu uca ibirimi mugejejeyo ambwira ko cyamurenze aragica.”

“Byari ukutamenya, ntekereje uko umwana yarembye hafi yo gupfa kugeza ubwo byaje kurangira n’ubundi mujyanye kwa muganga, sinakongera gukora iryo kosa kuko yari apfuye mbireba.”

Ku ndwara y’uburo, Nyamwasa asobanura ko ari imigenzo ikorwa binyuze mu gufata imisumari ikajombwa mu gatuza hagamijwe kuvura umwana.

Yagize ati “Iyo bahandura uburo bafata ibintu bisa n’imisumari bakajomba mu gatuza k’umwana bagakuramo utuntu dusa n’ibinure bavuga ko ari uburwayi hanyuma ubwo bakaba ngo baramuvuye. Ibyo bituma umwana ava amaraso menshi ugasanga ahubwo ahakuye ubumuga.”

Indi ndwara iri mu zituma benshi bagana kwa magendu ni ijyanye n’ibyinyo, ifata umwana ugiye kumera amenyo.

Icyo gihe aho yenda gutungukira harabyimba hakanaba umweru ndetse akaba yagira umuriro n’impiswi.

Abahanga mu by’ubuzima basobanura ko ibi ari ibintu bisanzwe ku bana bose ndetse ugiye kwa muganga ahabwa imiti igabanya ububabare bigashira kuko atari indwara.

Nyamwasa avuga ko iyo umubyeyi agiye kwa magendu we amubwira ko arwaye ibyinyo ko ndetse iyo atinda hari kumeraho umusatsi umwana agahita apfa.

Ati “Mu by’ukuri nta mwana wigeze ameraho uwo musatsi nta nubwo ari indwara ahubwo magendu ahita akuramo umuzi wa ya menyo yendaga kumera umwana akava kugeza ubwo ashizemo amaraso akaba yanapfa mu gihe atajyanywe kwa muganga.”

Mukayisenga Chantal we yavuze ko yumva bavuga ko izo ndwara zitavurwa no kwa muganga ngo iyo ujyanye yo umwana apfa.

Yagize ati “Njye nakuze ababyeyi banjye bavuga ko habaho indwara y’uburo ndetse ko itavurwa no kwa muganga. Ndetse bavugaga ko umwana iyo yavukanye ibyinyo aba ari ubukunguzi ko iyo batabimukuje hameramo agasatsi umwana agahita apfa. Haba hari abantu bazwi bakora ibyo bintu bakabikura bakaguha n’imiti yo gusigaho.”

Ababyeyi bagiriwe inama yo kujya bajyana abana kwa muganga mu gihe cyose babonye impinduka izo arizo zose bagize ku mubiri wabo.

Nyamwasa yashimangiye ko magendu atavura ahubwo yambura abana ubuzima.

Yagize ati “Ababyeyi bose bakwiye gushishikarira kuvuriza abana kwa muganga, kuko kwa magendu umwana ashobora kuhakura ubumuga azabana ubuzima bwe bwose kuko hari n’abahandurira tetanosi cyangwa bakahapfira.”

Agace k'umubiri ba magendu bakata bakita uburwayi bw'ikirimi
Bimwe mu bikoresho ba magendu bifashisha bahandura ibyinyo ndetse n'uburo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .