00:00:00 IGIHE NETWORK KN KINYARWANDA EN ENGLISH FR FRANCAIS

Ingaruka mbi zo gukora akazi birengeje urugero

Yanditswe na Mugisha Christian
Kuya 15 June 2022 saa 10:12
Yasuwe :

Hari aho nasomye bavuga ko umukozi mwiza ari umukozi ukorana umwete n’umurava mu kazi ke kugira ngo yuzuze neza inshingano yahawe.

Nubwo bimeze gutyo, hari izindi nyandiko nyinshi zigaragaza ko gukora neza atari ugukora kugira ngo ushimwe kuko ari nayo mpamvu ituma hari abakora ku kigero gikabije cyane kugira ngo bashimishe ababakoresha.

Iyo ukora muri ubu buryo uba wongera ibyago byo kurwara indwara zimwe na zimwe ndetse ukiyongerera n’ibyago byo kwangirika bimwe mu bice by’umubiri.

Gukora ku kigero gikabije ni imvugo ikoreshwa mu gusobanura gukora cyane cyangwa by’igihe kirekire. Iyi mvugo kandi ifitanye isano n’igikorwa cyo gukora birenze imbaraga n’ubushobozi bw’ukora.

Birumvikana ko gukora birenze ubushobozi bwawe bidafite aho bihuriye no kuzuza neza inshingano zawe.

Ubushakashatsi bwakozwe n’Ishami ry’Umuryango w’Abibumbye ryita ku buzima (OMS), bugaragaza ko gukora amasaha arenga 55 mu cyumweru bishobora kugira ingaruka mbi ku buzima bw’umuntu.

Icyakora hari abayarenza bitewe n’impamvu zitandukanye ariko ibi bishobora gutuma urwara indwara zitandukanye zirimo na ‘stroke’.

Umuvuzi w’indwara zo mu mutwe mu bitaro bya Cleverland muri Amerika, Adam Borland, avuga ko gukora cyane bikabije bishobora kugira ingaruka ku buzima bw’umukozi.

Yagize ati “Niba ukora ku kigero gikabije, igipimo cy’umusemburo utera umuhangayiko [cortisol] kiriyongera, bishobora guteza ibibazo by’ubuzima bwo mu mutwe, umuvuduko ukabije w’amaraso hamwe n’ibindi bibazo by’ubuzima.”

Yavuze ko akenshi usanga abantu bakora bikabije bitewe n’ababakoresha cyangwa igitutu bashyirwaho n’imirimo bahabwa.

Adam Borland agaragaza ko hari ingaruka nyinshi ziterwa no gukora cyane birenze urugero.

Ingorane mu gusinzira

Kutabona ibitotsi bihagije ni ikimenyetso gishobora kugaragaza ko ukora bikabije. Gusinzira bituma umuntu agira ubuzima bwiza yaba ubw’umubiri n’ubwo mu mutwe, kuba rero wabura ibitotsi bishobora kugira ingaruka ku buryo ikigero cy’umuhangayiko kizamuka [stress], ingorane mu gukemura ibibazo cyangwa kuba watinda gukira indwara mu gihe warwaye.

Imihindagurikire mu mirire

Niba ukora cyane, biroroshye guhugira mu murimo ukibagirwa kurya umunsi wose. Kutarya no gusiba amafunguro bishobora gutuma isukari yo mu maraso igabanuka, bikaganisha ku mbaraga nke z’umubiri.

Kubura imbaraga zo gukora imyitozo ngororamubiri

Ku bakunda imyitozo ngororamubiri bazi neza ko ari ngombwa kuyikora mu mibereho ya buri munsi ariko iyo umuntu yakoze birenze ubushobozi bwe gukora siporo ni kimwe mu bintu ahita ahagarika.

Ubushakashatsi bugaragaza ko gukora imyitozo ngororamubiri byibuze iminota 150 mu cyumweru ari byiza, kuko bifasha kwirinda umuhangayiko, kugabanya ibyago byo kugira umuvuduko w’amaraso, gufasha kugenzura isukari iri mu maraso no kugabanya ibyago byo kurwara umutima na diabetes.

Umubano n’abandi urangirika

Niba hari igihe ujya ukumbura inshuti zawe n’ibihe byiza mwagiranaga kubera ukoresha igihe cy’umurengera mu kazi, menya ko hari ibihe by’ingenzi uri gutakaza haba ku ruhande rwawe ndetse n’inshuti zawe.

Birazwi ko iyo ufite inshuti birinda ubwigunge kandi bikongera umunezero, bifasha ubwonko gukora neza ibaze rero ugiye uzitakaza gahoro gahoro.

Ibi byemezwa na Dr Borland. Ati “Ubu abantu basigaye birengagiza ibiruhuko yewe n’ibyo bagenerwa n’akazi kabo kubera gusa guhangayikishwa cyane n’ibibategereza mu kazi kabo igihe bagaruka [ubwoba bw’akazi kenshi].”

Kwishora mu biyobyabwenge

Borland avuga ko ari ibasanzwe ko hari umubare munini w’abishora mu biyobyabwenge mu gihe bahuye n’umuhangayiko cyangwa igihe biyumva mu buryo butandukanye bishobora guterwa no gukora ku kigero gikabije.

Kunywa ibiyobyabwenge bishobora gutuma umusaruro ugabanuka, kugabanuka kw’imbaraga z’umubiri mu gihe uri mu kazi n’izindi ngaruka mbi zose ziterwa nabyo.

Ibimenyetso bizakwereka ko watangiye kugirwaho n’ingaruka zo gukora ku kigero gikabije birimo kugira umunaniro udasanzwe, kutiyitaho no kutita ku buzima bwawe, hari ubwo utangira kumva nta mpamvu yo gukora ako kazi ukora n’ibindi.

Icyakora hari bimwe ushobora gukora kugira ngo bigufashe kwirinda kugirwaho n’ingaruka mbi ziturutse ku kuba ukora bikabije.

Ushobora gushyiraho imipaka ugateganya ibikwiye gukorwa kuri uwo munsi ndetse ukagena n’igihe uri bubisoreze, ihe umurongo ngenderwaho ku buryo udashobora gukora ikitateganyijwe kuri uwo munsi kereka igihe koko bibaye ngombwa.

Mu rwego rwo kuruhura ubwonko n’umubiri tegura icyo wakora nyuma y’akazi nko gukora imyitozo ngororamubiri, gusoma igitabo cyangwa gukora yoga n’ibindi.

Gukora bikabije bishobora gutuma umuntu adatanga umusaruro yari ategerejweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .