Imbamutima z’ingimbi n’abangavu ku gukomorerwa serivisi zo kuboneza urubyaro

Yanditswe na Thamimu Hakizimana
Kuya 14 Ukuboza 2018 saa 01:16
Yasuwe :
0 0

Bamwe mu ngimbi n’abangavu bavuga ko guhindura itegeko ryabakumiraga kuri serivisi zo kuboneza urubyaro, bizakemura ikibazo cy’inda zitateguwe mu gihe abandi basanga zagombaga guharirwa abashakanye gusa.

Mu kwezi gushize Minisitiri w’Intebe Dr Ngirente Edouard yabwiye abasenateri ko hari guhindurwa itegeko ryakumiraga abangavu n’ingimbi kuri serivisi zo kuboneza urubyaro, kuko bikomeje kugaragara ko umubare w’abaterwa inda wiyongera.

Iri jambo ryakiranwe yombi na bamwe mu ngimbi n’abangavu ndetse n’ababyeyi. Gusa hari n’ababyamaganye bavuga ko bizongera ubwomanzi n’uburaya, udasize icyorezo cya Sida kuko hari n’abatinyaga gukora imibonano mpuzabitsina kubera gutinya inda zitateguwe.

Ubusanzwe amategeko u Rwanda rugenderaho nk’iryerekeye ubuzima bw’imyororokere y’abantu, ntiryemera ko abana bataruzuza imyaka 18 y’ubukure bifatira icyemezo ku kuboneza urubyaro.

Bamwe mu baganiriye na IGIHE, bavuga ko bishimiye kuba na bo bagiye kwemererwa kujya baboneza urubyaro kuko bizagabanya umubare munini w’abana baterwaga inda zitateguwe.

Bemeza ko hari bamwe muri bo baterwaga ipfunwe ryo kujya kwaka izo serivisi zo kuringaniza imbyaro ku buryo hari n’abo byaviragamo gutwita imburagihe kuko kwanga ko bafatwa nk’indaya.

Bavuga ko iri tegeko nirimara kwemezwa rizakemura ikibazo cy’abaterwa inda bakiri bato.

Uwase Aisha w’imyaka 20 yagize ati “Kuringaniza imbyaro ku bangavu ni byiza bitewe n’uko abangavu benshi usanga bari mu kigero cy’imyaka 15 kuzamura bari gutwara inda zitateguwe cyane ugasanga bamwe barava no mu mashuri bikanateza ikibazo mu miryango.”

Yongeyeho ko yumva kuri we mbere y’uko abana b’abakobwa bashaka kuringaniza urubyaro bajya babanza guhugurwa, bakerekwa inzira nyayo y’uko bakwiye kubikora kuko abenshi baba batabisobanukiwe neza.

Uwase Fridaus w’imyaka 17 wiga mu mwaka wa Gatatu w’amashuri yisumbuye, avuga ko yashimishijwe cyane n’uko hari kwigwa uburyo abana bato na bo bajya baringaniza imbyaro.

Yagize ati “Nabyakiriye neza kuko bizacyemura ikibazo cy’abana b’abakobwa baterwaga inda cyane, ariko ku bwanjye numva umukobwa yaringaniza urubyaro ageze mu rwe akifata akiri iwabo kugira ngo aheshe ishema ababyeyi be.”

Umuhungu witwa Munyakazi Jusly w’imyaka 18 yagize ati “Nibyemerwa ko n’urubyiruko ruringaniza imbyaro bizaba byiza kandi natwe abasore turabyishimiye kuko hari ababyaraga bakiri bato, ugasanga bibaviriyemo guhakana abana babo kubera ko baba babona ari igisebo kubyara bakiri bato.”

Gusa hari ababyeyi babona ko bidakwiye ko umwana aringaniza urubyaro kuko ari ibintu byagenewe abashakanye.

Umubyeyi umwe utuye mu Murenge wa Nyarugenge, utarashatse ko izina rye ritangazwa yagize ati “Ntabwo aba azi niba urwo rubyaro agiye kuringaniza koko niba aba arufite ku buryo numva hagakwiye ahubwo gukora ubukangurambaga bwo kubashishikariza kwirinda ibyabashora mu busambanyi kuko nta byiza byabwo”.

Gusa hari n’abandi babyeyi ndetse n’abayobozi b’amadini batemeranya n’iyi gahunda ngo kuko isa nk’ishishikariza urubyiruko kwishora mu busambanyi mu gihe ahubwo rwagakwiye kwifata rukazakora imibonano mpuzabitsina n’abo ruzashakana.

Kuri ubu kuboneza urubyaro mu Rwanda biri hejuru ya 50%, intego akaba ari ukugera nibura kuri 6o % mu 2024. Ubu umugore w’umunyarwanda abarirwa abana bane, intego akaba ari ukugera ku bana babiri mu 2050.

Uwase Fridaus w’imyaka 17 asanga umukobwa akwiye kuringaniza urubyaro yaramaze gushaka umugabo
Uwase Aisha w’imyaka 20 avuga ko kwemerera ingimbi n'abangavu kuboneza urubyaro bizagabanya inda zitateguwe
Munyakazi Jusly w’imyaka 18 avuga ko bizafasha n'ingimbi zagorwaga no kwitwa Papa imburagihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza